行屍走肉

死得啦我瞓得兩個鐘, 今日又化身喪屍四圍嚇人.

眼瞓到有幻覺, 行行下有樹葉飄落黎我以為係飛小強, 迅速向右一避, 嚇到旁邊肥師奶擘大個口望住我.

又慌失失去追架2A巴士, 上左車先醒起自己要過海, 面懵懵落返車. 幸好我今日頭髮蓬鬆面色蒼白雙目無神, 俾我撞到一仆一碌既無辜乘客都只係默默承受, 冇向我母親送上最真摯慰問. 香港人真友善.

去到紅磡我又拎住張冇錢既發達通反覆地嘟, 後面位好心阿叔提我要增值. 呢位阿叔真係好脾氣, 不過阿叔後面位阿姐好似想星我兩巴咁款.

食完早餐魂魄先歸位, 不過好似歸唔晒. 算, 反正個個星期一對我黎講都係遊魂日.