Inspired by Minna

又要上大陸, 我最最最最憎上大陸偏偏份份工都要上, 真淒慘. 仲要鬼死咁早上...

有個超級靚女friend介紹我上女人網睇 office鬼古, 有d又真係幾奇奇怪怪. d古仔既共通點就係全部都係有驚無險, 似乎d鬼怪係想整古人多. 名符其實"鬼咁無聊".

我以前仲喺D記時有次充軍九龍灣某up dup廠廈, 一星期返足七日, 日日做到夜一夜. 有晚卒之頂唔住, 發燒. 同事驚我死喺佢地面前急急打發我走. 我暈陀陀, 懵下懵下行過馬路等車. 等車既位置後面係個鐵絲網, 圍住塊好多垃圾既空地.

一路等一路覺得腳後面有野郁, 聽真d真係有腳步聲, 仲有d好似指甲刮落黑板度既吱吱聲. 九龍灣工業區夜晚11點幾, 除左我地幾個唔願收工既賤人仲喺度磨爛蓆之外, 真係四野無人. 我心諗邊個玩野呀, 嘈嘈閉, 正想拎轉頭望時個"鬼"字突然喺腦海浮出...

已經好唔舒服, 仲要撞鬼? 個天唔係咁玩我呀嘛? 好, 我一於詐唔知, 乜都聽唔到聽唔到聽唔到. 但係架死人車又等極都唔到﹐ 極度無聊兼八卦既我終于忍唔住向後望, 太黑初時望唔清楚, 淨係見好多黑影喺地上面, 望清後, 哇!!! 原來有起碼超過五十隻大老鼠, 喺度爭奪幾大袋垃圾入面既殘羹. 有幾隻由鐵絲網爬左出黎, 喺離我腳後兩三步位置踱步...

果次係第一次近距離見咁大群老鼠. 個場面好震撼, 最衰果陣d手機冇得影相, 唔係影低嚇人都好.