Happy New Year!

仲有幾個鐘, 2007年就成歷史.

今年可能工作上變化多既關係, 感覺過得好快.

不過變來變去, 工作仍然沈悶...

除夕與否, 我都係匿喺屋企詐死. 年紀大, 唔好要我出去同人逼.

新年願望, 貪心既我有好多:
1, 工作順利, 最好有得再上一層樓, 小人遠離我, 仲有唔好激死左我老細
2, 唔想再見阿靚仔醫生咁多, 雖然佢係靚仔...
3, 減肥成功
4, 賺多d
5, 賺多dd
6, 再賺多d

祝所有我識既人2008年事事順利, 笑口常開, 身體健康.

我繼續去做couch potato, 出年見!

死, 真係好肥!

個口日日話要減肥, 但就連續大吃大喝左幾日.

我覺得我塊面包左, 手臂同條豬脾又粗左, 個肚越睇越似有左三個月.

不如俾我死左佢把啦.

假期過後

勁唔想返工, 但都要向現實低頭.

今日唔洗問當然係冇mood做嘢, office得小貓幾隻, 我兩個老細都下個禮拜先返, 可想而知我有幾閒.

其他人都同我差唔多, "及"到有位哥仔不停上網, 祕書姐姐們則聚埋一堆傾足大半日, 隔離team肥仔老細頻頻落樓煲煙.

是日蛇王之冠為我附近一位祕書姐姐, 聽住佢煲左好耐電話粥, 細聲講大聲笑, 然後11點幾, 精神奕奕既佢話唔舒服走先. 唔... 好可疑. 亞軍係隔離再隔離team老細, 3點幾就偷走, 大老板5點鬆人, 肥仔老細緊隨其後5點20分, 跟住我前面位靚女不停食左好多朱古力之後, 5點半走埋.

簡直係奇景, 去到5點45分, 大部份人已經閃晒.

我6點零一分先走, 實在係好員工既典範, 絕對應該加人工.

X'mas 2007

今個聖誕做左d乜?

23/12: 無聊地入左西貢, 其實都唔知入去做乜. 食完飯四處遊蕩, 見到架去海下灣小巴, 又無聊地入左海下灣, 行左去露營人士堆度八, 八左一陣, 某君隻high tech航海錶預測就快有雨落, 走為上著! 跛跛地既我行到想死, 幸好某君晏晝食得飽, 夠力孭我出去, 途中仲有閒情研究係咪遇到靈異現象.

一路都冇雨, 超!

24/12: 走左入南丫島, 唔係食海鮮, 係食齍. 食完去表演跛腳行沙灘. 好在洪聖爺灣唔係好大, 唔係死得. 之後坐喺沙灘談心(講廢話), 幾浪漫! 浪漫左約一個鐘, 隻腳好痛, 走得未呀喂?

返家睇完Invasion再睇Number 23, 差唔多天光先瞓.

25/12: 請參看上一篇.

26/12: 扮遊客上山頂, 行左個圈.

26/12 (剛剛): 腳痛, 喺度捽腳.

聖誕後感: 平時又唔見我行咁多, 跛左腳就差唔多日日四圍行, 呢d咪就係賤格囉. 仲有, 今年聖誕禮物係奔肌止痛膏一枝.

再一次證明我係天才, 哈哈哈哈哈~

跛腳的我, 全日在家無所事事, 東摸摸西攪攪, 睇下書, 上下網, 本來好悠閒.

偶然打開一個奇奇怪怪既email, 點解會係公司account send過黎既?

睇完後晴天霹靂, 今次大檸樂!

Email係關於公司既compulsory online training, 共四個topics, 每個topic均要pass一個test先為之完成, 至少75分先合格, 需要喺12月28號pass晒所有tests.

登時記起當日收到個email就隨手forward去自己personal account, 原意係想喺屋企慢慢做, 點知過後就忘記左呢件事...

死啦, 人地十月尾send黎, 我到今日掂都未掂過.

硬著頭皮打開training materials, 嘩, 水蛇春咁長, 又悶...

睇左第一個topic既四份一, 已經感到頭昏腦脹, 把心一橫求其"立"下就算, 快速跳到test部份, 死就死啦!

結果, 兩個鐘頭內做左三個tests, 一個83分, 兩個100分. 仲有一個要上公司intranet做, 星期四返工再算.

不得不讚下自己, 我實在係做multiple choice既天才.

如果六合彩揀數字都咁準, 我發左好耐.

聖誕日

東主腳痛, 在家詐死&發脾四ing.

今日某君家天氣預測: 密雲, 間中有狂風雷暴.

Anyway, Merry X'mas...

又瞓唔著

瞓唔著, 胡思亂想ing.

點解...

返工日日投訴唔夠瞓, 放假有得瞓又唔瞓.

返工日日望放假, 放假時又埋怨冇嘢做好悶.

到有街去時又唔想去, 嫌人迫.

又恨過白色聖誕, 真係有機會去時又嫌貴, 結果又係邊度都冇得去.

話左放假會執屋, 放假了, 一日到黑喺屋企, 硬係唔願郁.

想去食餐好d既X'mas dinner, 遲遲唔去訂枱, 有鬼得食, 茶餐廳算啦.

講左差不多成年要減肥, 個friend約去做gym又唔想去, 身形越黎越膨脹都未有行動.

總結: 我既行動力實在係好差.

瞓唔著, 反省ing....

又到聖誕

一向對聖誕冇咩感覺, 我一唔係小朋友二唔係教徒, 三, 我懶到出汁又粗枝大葉, 叫我花心思諗點慶祝買禮物佈置, 同叫我去死冇咩分別.

可幸某君係同一類人, 所以過時過節, 我地主要節目都係會周公, 頂多租DVD返黎睇下.

今年, 居然有突破, 某君提議廿四號晚去沙灘漫步, 嘩, 咁浪漫???

於是乎, 上天就安排左我無啦啦拗柴, 拉傷左條豬脾, 好痛, 一遞起隻腳就好X痛, 被迫行到隻企鵝咁樣.

搭巴士有人讓位俾我, 香港人真有同情心...

我想像唔到跛下跛下既我, 喺沙地掙扎時可以有幾浪漫.

妖.

俾人"jip"

朝早, 如常唔夠瞓, 如常懵下懵下, 頭腦一片空白地行去巴士站.

一位OL打扮女子, 睇黎應該係遲大到, 匆匆忙忙兼慌失失地向前衝, 越過死下死下龜速前行既我時, 仲好唔客氣地"jip"左我一聲.

望住向前急行既OL, 覺得佢件衫好怪, 點解背脊有舊嘢拱起既?

謎底好快解開, 只見舊不知名物件隨住該女子既急速步伐一直向下滑, 然後, "啪"一聲, 一個衣架應聲落地. 哦, 佢眼瞓程度應該同我有得揮, 成個衣架攝住個背脊都唔覺!

衣架既主人一下疾步, 轉身見到個衣架都呆一呆, 佢作出最明智既決定, 詐睇唔到, 走!

繼續疾走前, 佢見到目睹事發經過並陰陰咀笑既我, 又"jip"左我一聲.

我落硬地獄

坐喺Pret-A-Manger, 一手拎住份三文治大啖咬, 一手拎本小說刨, 好悠閒, 所以上天安排左個人黎煩我.

一個廿多歲女仔, 一屁股坐喺我旁邊: 小姐, 可唔可以同你傾兩句?

我一臉狐疑望住佢.

女仔: 我係基督徒黎架, 你有冇返開教會架? 有冇興趣跟我去睇下?

我(心果句): 真係oh my god啦今次. (口果句): 冇興趣, sorry.

女仔: asfdsatytryewfiurjhnjkgflbmkgfljtyuuihjnkjnkljmnjbhjgssoiurj.... (長篇大論講左好多耶穌, 又天堂又地獄又全能既主又佛教拜偶像要落地獄等等老生常談, 好悶)

冇興趣同佢糾纏, 食埋個包, 起身走人.

佢居然捉住我隻手執問我: 乜你唔覺得感動架咩? 你點解唔肯嘗試去接受主?

我(如有神助地爆出一句): 因為我驚, 你有冇睇過路加福音十二章五十一節?

對方呆一呆, 鬆手, 我走人, 嘿嘿~

我無意反宗教, 亦唔係歧視基督徒, 不過我暫時實在冇去信既慾望, 你要信唔關我事, 我唔信唔該你都唔好理我咁多, 仲有唔好踩人地既宗教黎抬高自己宗教, 咁樣只顯得佢地自己心胸狹窄, 令人反感.

註: (路加福音 12:51-53) 你們以為我來，是叫地上太平麼‧我告訴你們，不是，乃是叫人分爭‧從今以後，一家五個人將要分爭，三個人和兩個人相爭，兩個人和三個人相爭‧父親和兒子相爭，兒子和父親相爭‧母親和女兒相爭，女兒和母親相爭‧婆婆和媳婦相爭，媳婦和婆婆相爭‧<-- 神是愛?????

咁就四年

回顧過往幾年, 結婚週年我地係咁過既.

第一年:
大家都冇左件事.

第二年:
食左餐都幾貴既意菜. 不過, 幾日後先發現, 我地記錯左日子, 在正確日期後十日慶祝...

第三年:
原本都係冇左件事, 多得老媽一通來電才如夢初醒, 已經冇可能book到枱, 草草食左餐飯就算.

今年:
出奇地兩個都記得, 諗住上山頂浪漫一番. 點知一向愛同我過唔去既老天又玩嘢, 某君居然無神神被大客急call北上救駕. 早唔叫遲唔叫? 真係夾都未必夾得到咁啱.

頂.

Party

由於要方便公司眾老外聖誕返祖家, 公司就將X'Mas Party推前在12月7號.

Party喺"死雞酒店"舉行, 主題為Friday Night Fever, dress code係七十年代服飾, 不過冇硬性規定. 我邊會有七十年代服飾? 特登買件? 好難啦. 最後只係著條叫做好樣少少既裙就算. 我個部門冇人作任何特別打扮, 財務部人士真悶蛋.

我地一行人主要為食同抽獎而去, 一到步二話不說就食呀食呀食, 果然係一流酒店, 食物質素唔錯, 但係班staff服務頗一般, 攞碟豉油都一個推一個, 等足半個鐘. 今時今日咁既服務態度邊得架?

飲飽食醉, 去dance floor睇班鬼佬發癲, 成班友食左fing頭一樣, 亂跳亂擰, 失禮死人, 加埋奇形怪狀既所謂70s衣著, 實在可用慘不忍睹黎形容.

企到腳仔軟, 終於等到抽獎時刻. 二千人爭一百份獎, 咁都俾我抽到, 獎品係Cross筆一枝, 雖然唔係大獎, 都好過冇. 成個部門得我抽到, 哈哈.

嘢又食完, 獎又抽完, 成班發癲胡亂影相, 跟住狂隊酒.

我諗我飲左起碼七, 八杯紅酒, 兩三杯白酒, 兩三杯香檳... 班waiters經過就斟, 斟左我就飲, 都數唔到咁多.

醉又唔會醉, 本小姐不嬲飲得, 不過, 又病ing正在食感冒藥既我, 原本唔應該飲酒, 任性妄為之下, 而家勁唔舒服.

好彩某君出左trip, 唔係又要俾人哦.

聽日我唔到十二點係唔會離開張床.

電話

我個電話唔知點解特別多人打錯, 耐唔耐就要我發下脾四. 可能有人會話, 打錯你個電話啫, 洗唔洗發脾四呀? 以下兩個個案.

個案一:
約年多前, 我身在內地. 電話響.

我: 喂?
哥哥仔: 唔該王小姐丫.
我 (內心@#$%^&*ing): 冇呢個人喎, 你打錯啦.
哥哥仔: 唔好意思.

收線.

三分鐘後, 電話又響.

我: 喂?
同一個哥哥仔: 唔該王小姐丫.
我 (內心@#$%^&*ing兼唔係幾好老脾):　冇呢個人呀, 仲有呢個係長途電話黎架先生!
哥哥仔（理直氣壯）:　但係我搵果位王小姐係喺外地架喎!

吹Ｘ漲. 唔鬼理佢, 收線.

又分幾鐘後, 電話再響.

同一個哥哥仔: 唔該王小姐丫.
我 (發火): 你係咪玩嘢?
哥哥仔(依舊理直氣壯): 我對過幾次係呢個電話冇錯喎!

再講落去我會爆血管, 收線, 熄埋機, 睇你點打! 條X街累我無啦啦交多左電話費!

之後開返機, 阿哥哥仔留左言俾我... 叫阿王小姐打返俾唔知咩公司阿Paul喎...

個案二:
今日, 喺公司發白日夢ing, 電話響.

我: 喂?
哥哥仔: 唔該劉XX先生丫.
我: 冇呢個人...
哥哥仔(打斷我): 咁呢個電話係咪6xxxxxxx呀?
我: 係...不過冇你講果個劉XX先生...
哥哥仔 (又打斷我): 咁你知唔知點樣聯絡到阿劉生呢?
我(不耐煩): 我唔識佢...
哥哥仔(再次打斷我): 咁你知唔知佢屋企或者公司電話...
我 (打斷返佢, 爆粗邊緣, 頗大聲): 我話我唔識呢個人呀!!!
哥哥仔(居然仲好意思雞啄唔斷): 但係根據我地公司紀錄呢...

頂佢唔順, 掟電話.

類似個案不時發生, 何必偏偏選中我?

撞死人咩!

行去Landmark果邊食晏, 經過新世界大廈, 見到阿彤叔同一班人喺大廈門前吹水.

冇咩特別, 但就吸引左班無聊路人甲乙丙丁停步眼啤啤, 塞住條路.

努力地喺人牆中穿插, 迎面行來一個抽住大袋嘢既四眼哥哥, 白裇衫吊腳西褲襯皮鞋, 好一個文藝青年/電車男cross-over! 只見四眼哥哥一路向前行, 頭卻擰往彤叔方向, 目不轉睛望到實.

結果... 四眼哥哥同不耐煩一味向前亂衝既我, "嘭"一聲撞埋一齊. 我隻腳上五吋下五吋位置, 狠狠地食左佢個袋一記無情力.

痛到我向後退兩步, 怒罵一句, "行路望前面丫!" 四眼哥哥似乎完全聽唔到兼察覺唔到果下碰撞, 仍舊忘我地一路前行一路緊緊盯住彤叔. 莫非佢係彤叔頭號蕃薯???

撞到我隻腳瘀晒, 妖.

一週回顧

成個禮拜冇蒲頭, 話聲俾大家知, 我仲健在. 唔出現既原因只有一個 ---- 懶.

回顧下過去一週:

星期一 - 行屍走肉般返工, 老細出左trip, 全日忙住發白日夢, 六點十五分走人. 點解唔係六點? 厠所要排隊囉.

星期二 - 行屍走肉般返工, 老細出左trip, 全日忙住發白日夢, 六點十五分走人. 點解唔係六點? 厠所要排隊囉.

星期三 - 行屍走肉般返工, 老細返左黎... 做到停唔到手. 七點, 第二邊個老細約我老細去飲嘢, 佢閃完我即閃, 七點幾先走得, 嘩, 好辛苦.

星期四 - 行屍走肉般返工, 繼續做呀做, 悶爆. 六點老細又同人去飲嘢, 我離位吹水, 六點半走人.

星期五 - 行屍走肉般返工, 極冇心機, 全日忙住發白日夢, 老細居然五點半就閃, 咁我當然準時六點閃, 今日早左十分鐘去厠所, 唔洗排隊.

回顧完畢.

火警演習

今日長記大廈火警演習, 程序如下:

17:00 - 火警鐘響, 請各租戶離開辦公室, 從後樓梯迅速並有秩序地走落地面, 往遮打花園集合.

17:05-17:20 - 地面有工作人員幫忙點名, 走到上氣不接下氣, 汗如雨下既各位, 每人可得屈銀紙蒸餾水一枝, 補充水份.

17:20打後 - 各位可自由返回辦公室.

壞份子走火警程序如下:

16:50 - 搭lift落地面, 往Starbucks集合.

16:55-17:15 - 飲咖啡

17:17 - 施施然行往遮打花園, 點名呃枝水.

17:20 - 返回公司等放工.

P.S. 我係壞份子之一.

碟仙

之前睇Discovery套 A Haunting, 有班所謂靈魂學家喺間鬧鬼既屋度用碟仙招靈, 我又諗起N年前都玩過一次碟仙.

當年初到澳洲報到, 老媽隨行. 有日唔記得同阿媽&五叔傾開d咩, 講起碟仙, 阿媽話佢後生時玩過一次, 講到鬼咁過癮, 惟恐天下不亂既我猛話好想試, 天性八卦既五叔都話好有興趣, 第二晚佢居然真係買左個Ouija Board (西洋碟仙) 返黎.

我地三個決定即晚午夜就玩招魂大會!

終於等到夜闌人靜之時, 我地熄晒廳既燈, 點幾枝蠟燭, 就在客廳開壇. 根據隨盒附送既 instruction sheet, 原來可以指定請邊個上黎. 有意思! 請個名人上黎吹下水都唔錯, 請邊個好呢? Da Vinci? Newton? Mozart? Einstein? Hitler? JFK? Marilyn Monroe? John Lennon? 李小龍?

兩個大人嫌我麻Q煩, 最後都係決定求其請一個算.

按instruction sheet所教既開埸白講左一次, 等左幾分鐘都冇反應, 重複開埸白, 都係冇反應, 再講, 隻碟仔仲係唔郁, 攪錯呀!

正沮喪間, 隻碟仔突然極緩慢地移過去Hello一字處...

抬頭望我媽同五叔, 一個一臉緊張, 一個一臉惶恐, 相信唔係佢地玩嘢.

我口震震照住預先準備既問題紙, 讀出想問既問題. 果時離開學只有幾日, 所以問題都不外乎係讀邊班, 宿舍同房叫咩名等等, 非常無聊. 我唔記得佢答左d乜, 印象中命中率都好低.

問到冇嘢好問, 三人心情亦由緊張興奮轉為悶到傻, 於是乎就請阿鬼兄離去. 點知...

可能對方覺得我地幾條友仔問埋d毫無深度既問題, 兼夾草草收檔, 唔過癮, 佢不停喺板上打圈, 唔肯走!

我地重複又重複, 好聲好氣叫佢返歸, 講到口水乾, 又好驚, 佢最後遊多左好多個圈, 玩左我地起碼十分鐘, 先肯去寫住Goodbye果度.

仲有下文, 鬼兄走左後, 大家都有極唔舒服感覺, 我同五叔即時彈起身去開燈, 唔知係巧合定咩, 兩盞燈都係閃一閃就啪一聲燒左膽, 仲要係同時進行! 全屋再次陷入漆黑一片!

三條友, 嚇到"呀!!!!!!!!!!!!!!"

瞓唔著

瞓到半夜, 無端端醒左.

喺床上碌黎碌去, 努力令自己再次入睡.

半睡半醒間, 突然望見半打開既窗簾後, 微弱街燈映照到一個無頭身影喺度慢慢隨風飄動...

遠處偶然傅來一兩聲淒厲既狗吠, 為當時情境增添幾分詭異.

好眼瞓, 頭腦不大清醒既我, 嚇到毛管棟.

****************************************

Flashback 回幾個鐘頭前.

孤寒成性既我為左慳幾廿蚊, 自己洗恤衫.

洗完晾左兩件喺廚房, 仲有一件隨手掛喺睡房窗, 諗住有風吹吹下好快乾. 冇手尾既我掛完件衫, 懶理窗簾仍舊半開, 碌上床大覺瞓. 同樣冇手尾既某君, 當然唔會咁好死幫我拉好窗簾.

原來一件掛喺窗邊既恤衫, 喺昏暗燈光下可以有上述效果.

解開左個謎後, 冇手尾既我仍係懶得拉埋半開既窗簾, 倒頭繼續會周公.

果隻瞓唔著既狗, 仍在間間斷斷地吠, 可想而知一向醒瞓既我瞓得有幾好.

收聲啦衰狗!

嬌嗲

巴士上, 一妙齡少女全程用把嬌嗲非常既BB聲同電話另一端講唔停, 聲浪頗大, 兼令車內氣溫降到極低, 害得我收工想喺車上小睡一會都唔得.

想當年我有次心血來潮想玩嘢, 打左個匿名call俾某君, 再用把自以為嬌嗲無比既聲同佢講嘢...

我: 喂~~~ Honey呀?

某君(居然一秒都冇猶疑): 你喺邊度打黎點解冇caller ID架?

我(冇癮): 乜你認得我把聲既?

某君: 我點解會唔認得你把聲?

我: 冇唔同咩?

某君: 有咩唔同呀?

真係無話可說, 可能我天生只有惡死粗魯既DNA, 嬌嗲不來.

後話,

我: 我不嬲唔係叫你honey架喎!

某君: 超, 你叫我乜我都應架啦!

我: 咁我叫你死肥仔你應唔應?

某君(沒好氣): 應囉!

嘻嘻, 從此佢就多左個外號.

差不多每晚重複的對話

我: 今晚去邊食飯?
某君: 你話啦!
我: 你話啦!
某君: 你話啦!
我: 你話!
某君(嬉皮笑臉): 你話!
我(開始不耐煩): 你話呀!
某君(still嬉皮笑臉): 你話啦!
我(開始發脾四): 頂... 一係去返XX啦!
某君(依舊嬉皮笑臉): XX唔好食架喎!
我(勞氣ing): 咁你話啦!
某君(繼續軟皮蛇): 你話啦!
我(開始有火): 你最麻煩你話呀!
某君(繼續鬥氣): 你更麻煩你話!
我(火在燃): 妖你食蕉算啦!!!
某君(懶係寬宏大量): 是但啦, 你話XX就XX啦, 費事諗啦!
我(火勢猛烈): 你又話唔好食! 唔好委屈自己喎!
某君(嬉皮笑臉): 行啦! 行啦! 肚餓啦!

差不多既對話通常喺叫嘢食時會重複一次.

仲未好番

病足一個禮拜, 居然仲未好, 一日到黑暈陀陀發軟蹄, 咳到斷氣咁滯, 攪到放假邊樹都去唔到(都冇人敢約我出去).

坐喺屋企發左大半日吽豆, 終於頂唔順, 去街!

內心鬱悶, 做咩好呢? 俗語有云"財散人安樂", 病到周身唔安樂既我, 最啱去shopping散財.

其實好暈, 冇咩心機睇, 但最後都成功買左幾件衫一對鞋, 幾本小說, 又掃左大堆零食, 幫自己銀包減磅後, 攰到死既我冇力行去巴士站, 橫掂都洗開, 唔爭在洗多幾廿蚊, 一於搭的士返屋企.

做左一日敗家女, 財係散左, 不過唔覺安樂左, 返到屋企孤寒成性既我開始肉痛, 死啦, 今日先11號, 仲有十幾日先出糧...

反正冇胃口, 今晚既晚餐係梳打餅兩包, 心諗不妨病多幾日, 食少d, 慳番d.

咳咳咳咳咳咳咳

仲未咳完, 咳到個喉嚨損左, 心口又痛. 就快連個肺都咳埋出黎.

雖然聽日星期六, 但係都冇咩心機.

病情持續

成晚咳到天光, 瞓左三個鐘都唔知有冇.

上次既藥已經食晒, 朝早再去睇醫生, 今次要食特效藥, 仲有大大枝止咳馬尿, 再加多隻強勁鼻敏感藥.

離開醫務所, 其實好想即返歸倒頭大睡, 但未食早餐既我又想先行搵食, 行下行下居然就行左去公司果邊, 唉, 都一埸黎到, 上去囉...

呢個故事教訓我地, 睇開個醫生同工作地點同區, 係好愚蠢既!

哼, 嬲緊呀我!

病到死下死下, 一個二個問候都冇句, 淨係識得挖苦我!

滿心期待上獅子銀行網站, 火都黎, 隻"你阿爸爸"又抽唔到!

嬲病交迫, 冇心情寫, 瞓先!

WHY ME?

等到今早零晨時份, 個肚終於肯放過我.

點幾鐘, 仍在上網四圍八, 睇sa妹個blog得知佢病左, 正想留言問候, 某麻煩管家佬大喝一聲: 點呀? 你捨得死去瞓未?

痾到手軟腳軟既我無力駁咀, 乖乖熄機死去瞓.

四點左右, 模模糊糊醒來, 手腳冰冷, 頭痛欲裂, 喉嚨像被火燒, 週身骨痛, 鼻塞...

無聊既我攤在床上死下死下之際仲有閒暇去諗: 咦? 咪同sa妹一樣?

係sa妹感染力強, 定而家d過濾性病毒已經進化到可經由互聯網傳播?

雪上加霜地, 天濛光時肚瀉回歸...

我究竟做錯左d乜?

大瀉日

股市未瀉, 係我瀉啫...

話說今日去東涌羅漢寺拜阿婆兼食齋, 雖然話涼左, 不過行行下都幾熱.

以前寺內收留左唔少流浪貓狗, 每次去我都會盡情調戲一番, 但係今日唔見晒d貓, 狗就得返兩隻, 點解既? 去晒邊? 還左俗?

羅漢寺齋菜保持一貫水準, 好食過寶蓮寺果d粗製濫造貨色, 仲有有豆香味既自製山水豆漿, 熱死辣辣之下又再次將醫師"戒絕涷飲"既叮囑忘記得一乾二淨, 灌左大杯冰凍豆漿, 大鑊, 又賴嘢, 跟住五個鐘頭內瀉左四次, 食左藥都唔覺有效.

而家個肚仍在忙碌地翻騰, 唔知到幾點先肯放過我.

咁就一個月

放工喺街上見唔少打扮奇形怪狀之士, 往"爛鬼坊"方向進發, 先記起原來話咁快又萬聖節了.

萬聖節之餘, 我亦已經游離太平洋攻入長江一個月多dd, 初時聽聞有臭死人厠所, 內心忐忑不安左一輪, 可幸臭味只襲下游, 我等在上游之輩可安心隨時入厠所蛇王.

仲未捨得去影相整staff card, 行上一層樓都懶, 我都唔知自己會拖到幾時.

今日終於攞到個password可以自由上網, 不過為安全起見, 未過probation都係扮住乖先.

工作方面, 好多新嘢, 同太平洋及以前做過既公司都唔同, 但又冇話唔慣既, 我不嬲都係煮到黎就食.

同事都ok, 遺憾係...冇靚仔, 妖...

星期一, 渴睡ing

想當年喺D記經常一個禮拜返足七日, 少則十二個鐘多則通頂, 但仍面不改容, 越捱越勇.

離開D記, 都唔好得幾多, 返五日半經常變左六日甚至乎六日半, 頂得住喎!

跟住去到太平洋, 頭一年絕不好過, 埋數時段, 十一二點係等閒事, 仲要鬼死咁遠, 長期睡眠不足, 都咬實牙關捱過去了.

到今時今日, 返五日, 公司離屋企只係半個鐘車程, so far 最夜收工果晚都只係八點, 點解我會咁謝?

今日又如行屍走肉, 慒下慒下上車, 跟住睡魔即call, 瞓到過晒站, 行返轉頭行到身水身汗, 估唔到唔洗再搭火車, 我都依然係呢副德性, 真係冇得救.

點解瞓到八點, 足七個鐘, 都仲係咁眼瞓?

光陰似箭

覺得今年過得特別快, 眨下眼原來就快十一月! 07年好快會成為歷史.

老媽話, 當你覺得時間過得極快既時候, 就即係話你已經老了... (無言)

但係點解, 每日等收工既時間又會咁難捱?

IQ

嘿嘿, 我一手拎住匙羹"畢"雪糕, 雙眼間中啤下啤下個電視, 一手捉住隻老鼠遊遊下, 一心三用下做左"非屎卜"個IQ test, 結果有136分. 如果我專心d做, 可能再高分d都唔定.

某君充分表現出"吃不到的葡萄是酸的, 溝不到的女是肉酸的"既小器作風, 頻頻話個test一定係淺到無倫, 極有可能係俾弱能人士做既. 我叫佢試下做, 佢又死都唔肯. 哼.

不過我始終都係一個數學白痴. 今日又拆唔掂個"畢直"啦, 好彩仲可以恃住新黎咩都唔識走去搵老細求救, 遲d點算?

放完假, 失落...

一連三日既假期又結束, 今次放完假後, 要等到x'mas先再有假放...

放假冇咩做過, 除重陽例行節目拜山之外, 其餘時間都離不開食同瞓, 非常無聊.

個鼻好左兩日, 琴日起病情再度惡化, 仲衰過之前, 夜晚鼻塞到完全無法入睡, 好幾次要起身抖氣兼呻鼻涕, 成晚瞓唔夠四個鐘.

今晚都係咁既話, 死得, 聽日又成隻厲鬼咁返工.

開始有嘢做

飲左兩劑苦到跳舞既苦茶, 晚間鼻塞情況略為改善, 叫做瞓得好左, 但乞嚏依舊, 鼻水仍係長流. 坐喺公司時最為嚴重, 因為冷氣其凍. 我諗, 公司名應該喺中間加多個"凍"字先啱(唔明? 閣下太純情, 幫你唔到).

今日被分派一個好煩既report, 老細係咁倚講解幾句, 就閃左去開會, 剩低我一條慒婆慒盛盛對住堆數發呆, 研究良久點樣將A數搬去B sheet B數搬去C sheet C數又搬返去A sheet, 一個上午就在解謎遊戲中渡過. 重大發現, 原來唔上網唔玩死雞脾唔玩MSN, 時間一樣可以過得好快.

下晝, 明顯地大部份員工都holiday mood, 喺度埋頭研究另一個report既我, 不時聽到四週同僚細聲講大聲笑, 一係就打私人電話雞啄唔斷, 有d仲離奇失踪. 被身邊環境影響, 工作意欲盡失(賴得就賴), 成個晏晝忙住去厠所, 同去pantry搜刮有咩飲.

是日hea到七點先撇, 俾足戲我老細, 算係咁啦.

我係鼻涕蟲

鼻敏感發作, 狂打乞嚏鼻水長流, 夜晚一瞓落床就鼻塞.

好辛苦啊!

第一日返工

如常瞓到最後果分鐘先起身, 頭也不回衝出門口.

成8:30先上到巴士, 心諗實遲到, 第一日就咁, 真樣衰. 一路搭車一路諗一陣用咩藉口解釋.

點知, 天助我也, 原來係好快架, 15分鐘就到中環啦, 上到公司都係50分咋, 呵呵!

是日冇嘢做, 老頂叫我自己睇住files先, 今個禮拜take it easy喎, 下個禮拜先同我慢慢go through d嘢. 哦, 好呀.

除左悶d之外, 都ok既.

Facebook

早幾年興玩Friendster, 我都有join, 但身邊朋友仔似乎都不大熱衷, 所以好快厭倦, 已有超過一年冇log in過.

近期興起Facebook, 好處係有極多無無謂謂applications供攪攪震用, 又可從眾多networks嘗試找尋失散多年同學仔朋友仔. 托Facebook既福, 近日同班小學同學仔網上相認(雖然有好幾個都面目模糊, 唔知係乜水), 又搵返個失去聯絡多時既中學同學.

不過相熟朋友們依舊不太熱衷玩Facebook, 而近日重遇既小學同學, 都係add左就算, 冇咩特別互動情況, 即virtual drink都唔洗旨意會收到一杯. 咁又係既, 幾廿年冇聯絡, 真係一見返就攬頭攬頸咩, 可能佢地同我一樣困惑, 諗緊"呢個究竟係乜水???" 又或者我當年正經好學生形象太過深入民心, 佢地覺得我唔會玩呢d嘢?

放完假lu

快樂既日子總係過得好快, 過埋聽日, 我呢個難得既假期就結束.

有d唔捨得添...

好Q無聊

如常八點起身, 某君被我疏擺引誘下, 曠工兩粒鐘, 兩條友悠閒食早餐去.

今日洗左厠所, 幾乖.

好無聊

繼續享受我個難得既假期.

賤人如我, 有得大覺瞓時又唔瞓, 居然朝朝八點幾起身, 無所事事, 頹廢一整天.

今日做得最有建設性既, 係去City'super買左大包零食返黎累己累人.

極無聊下去八婆網睇八婆鬧恆X少奶, 刨左幾份報紙, 睇左好多blogs, 發現我同sa妹原來愛食同一隻梅乾. 單聲sa妹知, 呢幾日唔洗去銅鑼灣City'super掃貨, 因為有條傻婆掃晒啦.

無聊

之前問過A銀號可唔可以今個禮拜返工, 唔係因為我特別勤力, 係實在好無聊冇嘢好做. 可能嚇左佢地一跳, 以為請左個變態工作狂返去, 討價還價後叫我下個禮拜先好浦頭, 都好啦.

今日無聊到上網亂search一通, 哈, 居然俾我亂打亂撞搵到個N年前舊同學既blog, 好戇居地留左個message俾人, 都唔知佢仲記唔記得我呢個傻婆.

又無聊到走去玩Facebook個電影quiz, 估唔到我既電影知識唔錯, 不愧喺video shop踎左幾年.

仲有半日捱...

A

原本諗住乖乖地返新工, 點知無啦啦殺出份更好既工, 公司大d人工高d褔利又好d, 諗唔到點解唔去, 結果, 好衰女地返左日半就同人bye-bye.

似乎我真係逃唔出個A字, 請看下列facts:

千挑萬選既母校 - A字頭
某君原名 - A君
D記對我唔錯既老闆 - A君
D記對我唔錯既經理 - A君
N記對我唔錯既經理 - A君
介紹我入太平洋既agent - A小姐
過氣老細1 - A君
過氣老細2 - A女士
過氣老細個老細 - A君
兩位好同事 - A小姐
將會做既公司 - A銀號
介紹我入A銀號既agent - A記
未來老頂 - A君

既然我同個A字咁有緣, 不如改過個A字頭既名, 大家覺得"天使"呢個名啱唔啱我?

F先生的問題

F先生(神神秘秘): 之後去邊頭返工呀?

我: 灣仔

F先生(懶叻): 哦! A先生果間! 明白曬!

WHAT?!

為免其他太平洋同事有同樣誤會, 現澄清一下, 我份新工同A先生絕無半點關係, 請勿亂估!

別了太平洋

終於黎到"我在太平洋的日子"既最後一日. 回顧過去4年3個月多dd既日子:

最無所適從係初來時戇居居老細唔見左, 但又要即開波做嘢, 碰釘再碰釘.

最勞氣係有d人教而不善, 踢一踢, 分開幾次郁; 一係就大堆歪理話你知點解唔郁.

最谷氣係有時對住班固執既日耳曼民族, 有理說不清.

最無助係經常無啦啦整pat蘇州屎你執, 仲要係唔知頭唔知路, 生活充滿surprises.

最安慰係請到幫得手又抵得諗既人返黎齊齊執屎.

最開心兼慶幸係識到一班合得來既好同事.

最瘋狂係一年一度既X'Mas party.

仲有好多好多, 未能盡錄. 最初諗住騎牛揾馬, 結果做左咁耐, 自己都估唔到. 我會好懷念好懷念呢一千五百幾日.

後記: 基於極度懶惰既關係, d鎖碎嘢未執晒 (係, 我知我衰...), 今日又無神神話要去新公司面聖, 冇理由一抽二"lung"去...唯有再抽時間返黎執拾細軟, 重九拜山我會路過太平洋. 唔知有冇人得閒應酬下我 (順便幫手執嘢), 有既話, 拜山見!

Second Last Day...

今日繼續近期食呀食呀食既生活. 北上尋歡, 同一眾深圳同事飲餐茶 (註: 圖為資料圖片, 我地冇咁大食).

飲飽食醉, 臨別依依, 答應保持聯絡, 將來我北上或佢地南下的話都約出來聚一聚. 冇所謂, 有得玩有得食我實奉陪.

仲有一日就游離太平洋搬去個"灣"果邊, 希望唔會好似茫茫大海咁暗湧處處.

四日!

我好叻, 食左蝦丸冇面腫, 不過食得太飽, 成晚瞓唔著. 熱氣加上唔夠瞓, 下爬生左粒大瘡.

今日中秋, 記得舊年中秋係死期日, 雖然有得休半day但我同I小姐都留守公司乖乖做嘢. 真係光陰似箭, 咁就一年! 明年今日, 唔知仲會唔會寫blog? 今日一齊飲茶慶中秋既同事, 出年已經唔會再喺埋一齊, 我會懷念你地!

中秋節快樂!

仲有五日!

今日依舊忙住扮忙.

俾咖喱仔捉到我做錯嘢, 哈! 樣衰!

趕住去打邊爐, 哥小姐話蝦丸好正喎! 明日報告有冇面腫.

倒數第七天

唔計週末, 餘下啱啱好仲有七日喺太平洋.

每日忙住扮忙, hehe~

倒數第八天

終極騎尼面試.

問題一:
如果有日你返到公司見到你同事觸電瞓低左, 你會點? (公式答案啦, 小學生都識. 其實好想答: 睇下同呢個同事交情去到邊先再決定點做)

問題二:
假設你去大陸出trip俾人打劫, d證件冇晒, 你又會點? (車, 可以攞"臨通"家嘛)

問題三(轉英文台, 面試者拎出一舊馬型水晶擺設):
呢舊嘢係一個客送俾我既, 你可唔可以講下你覺得呢隻馬代表咩, 個客送俾我又有咩特別意思呢? (即係亂up, 開正我果"飯")

問題四(仍舊係英文台, 面試者拎出LV銀包一個):
呢個銀包又係客送既, 你可唔可以話我知點解d客會經常送嘢俾我? (繼續廢up, 順便擦下鞋, "個客緊係好滿意你既service先記得你同送嘢俾你啦")

問題五(轉普通話台):
面試者#2用普通話問我返大陸d分公司有咩做.

問題六:
有個客發爛渣話我地公司俾左d爛貨佢, 請即席寫英文信一封同個客交代.

問題七:
面試者隨手拎份南華早報出黎圈一段嘢, 請譯做中文.

問題八:
正常問題, 點解想轉工, 之前幾份工做d咩, 想揾份點樣既工之類.

問題九:
假如你見到個staff將公司d支票簿亂掉亂放, 你會點?

問題十:
如果你叫個staff幫你去銀行唱錢, 佢三點鐘出去, 到五點幾仲唔蒲頭, 打俾佢又冇人聽, 你會點? (打去差館呀急症室呀check下條友係咪俾車掃低左先...)

最後問題:
你覺得自己今次面試表現如何? 10分滿分你俾幾多分自己? 你覺得自己會唔會有得2nd in?

我當然有得2nd in. 鑒於大家痴線程度相彷, 一拍即合, 唔該10月開工.

倒數第九天

每次揾工都遇唔少騎尼人士, 今次亦唔例外.

例一:
Interviewers有兩個, 一個後生d一個老d. 老果個全程眉頭深鎖眼厲厲, 好似我爭佢好多錢唔還一樣. 成個interview歷時一粒鐘, 呢個阿叔怒啤左我起碼50分鐘, 問過兩條問題咁大把, 一條問我結左婚未, 另一條問我而家間公司喺邊. 後生果位就玩棟篤笑一樣, 頻頻講左好多唔好笑既笑話, 自己講自己笑到趴喺張枱度, 好抱歉地我完全唔知笑位喺邊, 而個阿叔則一直懶理旁邊條友郁來郁去大聲講廢話, 繼續怒啤我, 氣氛極度詭異.

結果: 唔成功. 可能我唔識喺適當時候歇斯底理地笑埋一份, 所以冇請我.

例二:
一個所謂sourcing office, 極混亂, 似入左個垃圾堆多過辦公室. 面試者係一中年阿叔, 講嘢陰聲細氣, 事後諗, 陰陽怪氣更加貼切... 面試中我經常要側起隻耳先聽到佢問乜, 後來阿叔見我撞聾得交關, 碌張凳黎到我面前, 極近距離地問問題 (近到我聞到佢既口氣).

結果: 成功. 不過我俾佢果下近距離接觸嚇怕左, 唔玩.

例三:
面試位FC小姐可能玩慣急口令, 講嘢速度大概係每分鐘一百字. 佢初初開口問嘢時我以為佢講外語, 呆左一呆, 佢重復問我先知原來係廣東話! 我盡量講快d配合阿機關槍小姐既速度, 但實在自愧不如, 佢唔止講嘢速度快, 轉話題速度亦都極快, 聽君一席話, 當堂心跳加速, 腎上腺素狂升, 差d標埋冷汗.

結果: 成功. 但為左我心臟健康著想, 推左.

(待續)

倒數十天

四年幾前無心插柳下游左入太平洋, 人工唔係話好荀, 做又唔係話好好做, 仲要遠到死, 好幾次差d游離洶湧波濤上岸去, 都被扯回海中心繼續浮沉.

原本以為要一直做汪洋中一條小船, 靠岸無期, 估唔到年頭居然有人向我招手, 當中不乏財雄勢大之士, 又在無心插柳既情況下, 揾到個大靠山, 大之餘更係人工高福利好, 點知, 喺太平洋人情同銀彈攻勢之下, 我又跳返落茫茫大海. 其實當時心情好複雜, 一方面為放棄個好offer感到可惜, 另一方面又因為可以留喺個熟悉既環境暗暗感到安心.

年中地震後, 心諗連阿邊個邊個都走咯, 不如我都走啦. 半認真地send下信, 半認真地見下工, 又俾我見成兩份, 不過一份唔肯等我一個月, 一份臨叫我去簽約先同我講有超過一半時間要留喺大陸, 結果兩份都不了了之. 呢兩份後, 又有兩份價錢福利都傾好埋, 話同上頭商量好就通知我返工, 跟住就冇左下文, 打去一問, 佢地話公司管理層臨時有變, 個post hold 住先喎(都唔知係唔係...).

谷鬼氣, 加多幾錢肉緊去揾工見工, 我就唔信我揾唔到! 但係跟住見幾份工地點人工都唔係幾好, 有間衰到叫我去見後先話少五千你做唔做, 真係請我都要諗過先. 果時心情極度忐忑不安, 唔通我同太平洋緣未了, 仲要浮游多幾年?

終於兩星期前有轉機, 無啦啦有間個幾兩個月前send信去既公司叫我去interview, 冇帶住太多期望去見, 竟然一拍即合, 地點ok, 人工ok, 冇理由唔去.

雖然份工係咪真係適合自己都未知, 但觀乎過往經驗, 凡係無厘頭見返黎既工我一般都做得幾好, 再白痴地做埋I小姐好耐之前俾我既"生日與到職日超準測驗", 唔, 成績唔錯, 好兆頭也.

今日終於有新同事黎承繼我既衣鉢, timing好到不得了, 我去都去得安樂了.

最後, 希望新同事生生性性, 做得長長久久, 冇咩事唔好揾我...

十年前後

網上見到呢篇嘢, 有d感觸...

十年前，結識新朋友是交換名字，交換電話；十年後，做朋友是交換卡片，交換電郵。
十年前，認識而有來往的，叫朋友；十年後，認識而有來往的，大部分叫同事。
十年前，能夠談天的都是知己；十年後，能夠慷慨解囊的才算朋友。
十年前，聖誕節是朋友節，普天同慶；十年後，聖誕節即情人節，請勿打擾。
十年前，每月的零用錢，是公開的秘密；十年後，工資是不能公開的秘密。
十年前，朋友聚會是汽水與籃球；十年後，朋友敘舊是啤酒與唱 K。
十年前，什麼話題也可以刨根問底；十年後，我們熟練「點到即止」的技巧。
十年前，約會沒有目的；十年後，沒有目的就沒有約會。
十年前，見面每問「讀了什麼書」；十年後，見面只問入了什麼股。
十年前，相約看電影，結伴去暢泳，日子無憂無慮；十年後，相約做婦檢，結伴做按摩，生活疲憊多慮。
十年前，習慣直斥對方的缺點；十年後，學懂包容對方的短處。
十年前，只需學習與朋友相處；十年後，還要懂得與朋友的另一半相處。
十年前，大家活在相同的生活圈子裏，簡單而專一；十年後，我們在不同的圈子打滾，複雜而多變。
十年前，我們漫談「理想」；十年後，我們謾罵「現實」。
十年前，認定的那幾個知己金蘭；十年後，謝天謝地，他們依然如故，與我常在。

上班偷懶問卷

上網無意中見到既, 貪得意填下.

1.準時上班嗎？
睇心情
　
2.會否買早餐回公司吃？
會, 唔食早餐我會頭暈

3.回到公司做的第一件事？
開電腦，check emails
　
4.回到公司後什麼時候才正式處理公事？
睇心情, 頭一個鐘多數睇下新聞
　
5.座位附近有同事嗎？會一邊工作一邊和他/他們聊天嗎？
坐房冇同事在附近, 可用skype或msn吹水, 有時會嗌出去
　
6.和同事聊天的除了公事外，最多是傾談關於……？
咩都有
　
7.吃午飯時會否用盡午飯的所有時間？有多餘的午飯時間你會怎處理？
通常唔會用盡, 多出既時間用黎上網, 或小睡, 或發呆
　
8.公事／私事，在公司裡的百分比大約是多少？
50/50
　
9.所謂私事……是指讀書？睡覺？打機？聊天？還是其他？
試過真係瞓著, 經常聊天, 仲有上網四圍遊寫blog睇人地d blog食嘢睇書send junk mails打私人電話剪指甲發白日夢等
　
10.老闆／上司臨時請假，你會繼續如常上班，還是乘機偷懶做私事？
月頭月尾冇得偷懶, 其餘日子, 請參考題9
　
11.下班前多久你會執拾妥當準備好下班？
通常OT起碼半個鐘先走
　
12.能否在公司上網？能否接上IM（例如MSN, ICQ, Y!M, AIM, QQ, GTalk……等等）？（如回答不能的，請跳過以下的題目，回答最後的問題）
能
　
13.上網的話你會做什麼？
想做咩就咩囉
　
14.如果公司禁止上網／ＩＭ，你會否有辭工的念頭？
會
　
15.最瘋狂曾經在上班時做過的私事是什麼呢？
揾工算唔算瘋狂?

一年容易又911

又黎到呢個6年前令全球震撼既日子.

默哀中...

Luciano Pavarotti (1935-2007)

最初知道Pavarotti呢號人物, 係N年前喺澳洲睇電視重播一套舊戲"Yes, Giorgio", 果時對呢條頗有幽默感, 樣又卡通既肥佬已留有印像.

90年世界杯final, 3 tenors既concert大受推崇, 我之後幾年喺video shop做part-time, 3 tenors concert出左video後舖頭日播夜播令我有幸聽過不下數十次.

3 tenors之中, 我覺得高高大大有d惡死樣既Placido Domingo做指揮更加台型十足. 個人較鐘意Jose Carreras, 但輸蝕在天生一副苦瓜乾面口加身型矮小, 而出名"唱出九個高音C, 有謝幕17次紀錄"既Pavarotti, 肥嘟嘟cute爆身型, 終日笑嘻嘻, 註定佢係最受歡迎果個. 最愛佢唱O Sole Mio, 雖然呢首歌被某d人評為cheap及唔正宗.

當年舖頭有個鬼妹個男朋友係奧地利人, 原本喺維也納一酒店做廚, 後來relocate左去Sydney. 佢話有幸見過肥佬歌王一次. 話說肥佬有次去當地開show, 就住佢工作果間酒店. 一日肥佬order左個cheese platter上房食, 點知好不滿意地打回頭, 原因係: 份量太細! 廚房於是乎將份量稍稍加大, 再拎上去, 都係不滿. 最後阿大廚把心一橫整夠正常份量既三倍俾佢, 肥佬終於滿意了, 仲好nice咁去同大廚握手拍晒膊頭云云.

食咁鬼多, 唔怪得知胰臟出事.....點都好, 活得到七十一歲, 榮耀大半生, 已經好有福氣. 遺憾佢趕唔切做埋個巡迴世界告別演唱, 就要先行告別呢個世界.

好想去旅行

俾I小姐挑起條癮, 好想出外走走. 老媽又不停晒命買到澳門威尼斯人套票, 啱啱過左去歎世界, 攪到我更加想歎返個short trip. 最好去東南亞, 平平地, 食下嘢麻沙池下做下spa...

速成, 欲速則不成...

屋企部腦俾我地輪流勞役幾年, 兩星期前終於打柴. 某君部notebook我只有limited access, 因佢成日霸住黎做嘢睇股票, 累得我連續兩個週末都要拎公司部腦返去上網 (同事們千萬唔好以為我係勤力到個個weekend拎部機返去做嘢).

卒之的起心肝買左部notebook, 靚靚白色殼, 襯返我高貴純潔既外表, 哈哈, 哈哈.

不過我開心得太早, 部機行Vista, support唔到南極星, 而一直以黎我都係靠南極星拼音打中文...

說來慚愧, 我對大部份中文字都係只知其音其形不知其詳細寫法, 雖則速成唔需要識晒成個字點寫, 但較繁複既字我記得到頭就記錯左尾, 有時見得到就記得, 見唔到個字霎時間要諗既話好多時腦中一片空白. 當年在某君指導下學速成, 多次被鬧"文盲". 傻更更既我經常要查漢英字典睇返個字點寫, 又被某君inch "不如你查字典copy & paste算啦!"

結果, 當然係半途而廢, 學左少許皮毛後就用返南極星.

而家折墮了, 又要從頭苦學, 幾日來都唔知發左幾多脾氣死左幾多細胞了.

貓

返家途中見大黑貓一隻由後巷彈出, 又肥又壯, 眼仔碌碌, 踎低諗住調戲一番, 黑貓不屑理會, 轉頭逃去無蹤.

同貓既淵源要由我細個講起. 小時家中養有惡貓一隻, 唐貓品種, 麻包袋色 (就姑且叫佢麻包袋), 脾氣極臭, 動不動張牙舞爪. 原本跟隨阿爺在米舖做滅鼠組長一職, 舖頭結束後便退休做其大食懶, 仲呼朋喚友帶一堆食客返家黐飲黐食.

麻包袋同我冇乜感情, 不過佢基本上個個都唔係好睬, 平時除開飯時間外都好少見佢蒲頭, 偶然會喺電視機頂攤屍, 條死人尾係都要fing落黎擋住個畫面.

小時候既我唔係太喜愛貓, 試過一腳踩左落唔知邊隻衰嘢玩到死狀可怖然後棄置一旁既老鼠屍首度, 好嘔心. 麻包袋同佢班friends有時會喺我地天台晒太陽. 一次我上去天台唔知做咩, 見一隻貓(唔記得係咪麻包袋)喺唔夠一尺闊既圍欄處懶有型地踱步. 眼見佢若果叉錯腳就會做空中飛貓, 俠義心腸既我二話不說兩手一伸, 想捉佢返落地. 結果, 我俾隻兇悍無比既癲貓where爛左件衫......

真正變得愛貓, 應係由小四左右開始, 果陣耐唔耐會去下個哎吔親戚屋企, 佢養有三色貓乸一隻, 呢隻貓乸好特別, 愛食魷魚絲同撕成條狀既白麵包, 有呢兩樣食物在手, 貓乸可任由你搓圓撳扁肆意非禮, 十分過癮. 後來貓乸學人偷嚐禁果生左貓B四隻, 嘩, 可愛到暈.

聽聞貓狗可見到靈界朋友, 屋企狗狗係偶會對住空氣狂吠, 我唔識狗話, 所以問唔到佢地係見到嘢定純綷口痕想吠下. 至於我家養過既貓, 印像中除左食同瞓同狗開片外, 又唔覺佢地曾經有過任何不尋常舉動.

唔知聽日會唔會再見到大黑貓? 買唔買定個罐頭去等佢好?

出門遇怪人 (三) --- 小朋友 (& 佢地的惡死阿媽)

個案五﹕

逼到死既地鐵上, 一中年女人推住個B, 拖住個約三,四歲妹妹仔上車. 女人摺起BB車, 抱起個B, 叫妹妹仔自行捉實條柱企穩. 奈何車廂逼到癲, 叫個細細粒小朋友穿越多條大人既腿去揾條柱捉住, 談何容易? 聰明既小妹妹於是就近取材, 扯住附近一個姐姐條裙當扶手. 此舉立即得到母親讚許, 佢話, "係啦, 捉實姐姐條裙裙啦, 唔係跌跌架啦."

得到母親嘉許後, 妹妹再大力d扯實姐姐條裙, 以防跌跌. 個姐姐則非常狼狽, 因為佢著既裙係橡根頭, 俾個妹妹出力地越拉越落, 越拉越落...

眼見就快露底了, 姐姐毅然將手上電腦向地下一掉, 空出手來抽返起條裙. 此舉嚇得妹妹縮手, 失平衡撞向旁邊一人, 妹妹即時扁咀想喊咁款.

妹妹阿媽見狀, 即好言安慰, 怒目對住個姐姐口up up話佢嚇親細路女, 冇同情心, 俾個小朋友抆住都唔得. 跟住再下一站佢就怒氣沖沖落車, 剩低一臉無奈既姐姐獨力面對四方既嘲笑目光.

果個姐姐咪我囉!

個案六:

火車上, 呆呆坐著既我正想收拾心情會周公去, 誰知到站車門一開, 震耳欲聾既燥音即傳來. 只見兩個師奶拖住一男一女著住幼稚園校服細路上車. 師奶有師奶傾到口沫橫飛, 細路有細路瘋狂地尖叫追逐. 好不幸地, 佢地坐正我對面.

兩個師奶自顧自傾計, 懶理兩個細路V哇鬼叫四處跑四處爬, 兩個玩到冇嘢好玩, 居然玩比賽爬柱. 兩隻百厭星爬爬下, 女果個失平衡"線"返落黎, 一腳就踩左落我度, 可憐既我當日著住涼鞋, 登時痛入心.

我望住條靚妹正想教訓佢幾句, 佢阿媽已經先發制人, 用極高聲浪大鬧我好擺到對腳咁出, 如果整親佢個女扭親腳點算?

咁都得??!! @#$%^&*&^%$#@...

師奶一輪叫囂, 條靚妹挨喺佢身邊作嬌嗲狀. 當時個靚妹望住我個樣不知幾得戚, 真係好有撲前星佢兩巴既衝動!

自我評價

睇得內地CV多, 發覺佢地好興寫個簡短既"自我評價", 自我介紹下, 講下自己有咩優點, 有d仲會講埋自己理想既career path係點, 想做份點樣既工, 懶有誠意.

近年香港呢邊都見有d人加個類似既小段落喺個CV上, 套用幾年前一個agent向我所講, 咁樣會令個CV更加"eye-catching", 顯得我更加"sincere"喎!

真係要我整段評價既話, 寫咩好? 我份人貪玩貪食, 唔係好鐘意讀書, 唔係好熱衷做嘢, 做人冇計劃, 永遠煮到黎就食, 唔係話冇能力, 係怕辛苦唔想出全力, 冇乜理想, 冇乜目標. 夾硬講優點可能係記性好, 但只限記古靈精怪嘢, 同我有興趣既嘢(咪即係古靈精怪嘢囉), 正經果d通常只能短暫記得. 仲有咩呢? 哈唔記得左lu.

當然可以老吹, 車到天花龍鳳都得架, 我又做唔出. 前面提過個agent阿姐話我可以humble少少, 講下自己對未來既plan, 教埋我點寫, 我又懶得寫, 最後阿姐寸我"冇heart". 唔知死既我當時駁咀, 話我花時間整理自己既experience出黎已經好有heart啦. 結果阿姐冇幫我做任何referral, 抵死!

不過到今時今日, 我個CV都係冇加到個所謂既自我評價上去. 有冇人有寫架? 借我抄得唔得? 我想變得有heart...

出門遇怪人 (二) --- 幫忙

繼續...

個案三:
又係火車上, 返ing工, 極度眼瞓既我正在專心釣魚, 突然被拍醒.
眼前係一個笑到四萬咁款既阿伯, 佢話: 靚女唔好意思呀, 可唔可以幫下忙呀?
瞓到懵左既我 (但仍聽到佢叫我靚女, 睬下佢囉): ...幫咩....?
阿伯隊張六合彩飛黎我鼻前: 阿伯唔記得戴老花鏡, 睇唔到, 不如你幫我填丫~
仍未懵完既我懵盛盛接過: ...哦....
跟住阿伯一路up咩冧把, 我一路填.
填完, 繼續瞓.
冇幾耐又俾人拍醒, 又係個阿伯. 今次係幫佢撳手提電話...
聽完阿伯聲若洪鐘咁講完個電話後, 我已經睡意全消.
隔一陣阿伯又拍我. 呢次係幫佢填出入境健康申報表 (SARS期間過關要填).
再隔一陣阿伯又再隊個電話埋黎, 想打多個電話...
又隔一陣阿伯搽萬金油 (好彩佢冇叫我幫佢搽), 好大陣味.
隔一陣again阿伯問我有冇紙巾, 遞過俾佢後佢不停吐痰...
再再隔一陣阿伯問我攞多張紙巾, 隊隻沾滿痰涎既手過黎....
我成包送俾佢!
呢日路程特別漫長, 未試過有一朝會咁期待快d到站, 終於到了, 我飛奔落車.
唔係話連老人家都唔想幫, 不過我硬係覺得個阿伯似係玩緊我多d.

個案四:
朝早瞓醒唔舒服, 搭地鐵去睇醫生.
發呆中, 一西裝友出現眼前, "Hi, 我叫XX呀, 點稱呼呀?"
我 (呆): er......
西裝友: 我朝朝呢個時間搭車都見到你架, 做個朋友丫?
我 (呆完, 突然精靈): 咁你一定認錯人, 我平時唔搭地鐵既!
西裝友 (死撐): 唔係喎, 我真係見過你架喎, 你喺XXX上車架係咪丫? (超, 佢實係睇住我上車先知)
我 (都死撐): 唔係.
Dead air......
西裝友: 咁...可唔可以做個朋友?
我: 點解先?
Dead air again......
到站, 不幸地, 西裝友都係同一站落車, 跟鬼住, 煩.
上ing電梯, 西裝友: 小姐, 做唔成朋友啫, 但係可唔可以請你幫幫忙?
我 (好奇): 幫咩?
西裝友從公事包抽出文件一份: 我係XXX保險架, 幫手做份問卷丫?
吹~~~~~~漲!

出門遇怪人 (一) --- 霸道路人

見工遇得怪人多, 平時行街搭車都遇唔少, 我有時諗係咪我本身係怪人一個, 所以特別吸引到呢d人埋身?

個案一:
火車上, 企在一旁發呆, 突然有個滿面暗瘡印兼有少少鬥雞既哥哥仔唔知由邊度彈到我面前, 距離極近...
哥哥仔 (兩眼發直望住我, 語氣急切): 小姐, 你隻手錶好靚, 喺邊度買架?
我 (嚇親, 驚魂未定...先後退一步保持距離): Um...朋友送既.....
哥哥仔 (向前行一步, 語氣仍然急切): 係呀? 我都想買隻咁既錶送俾人, 你可唔可以打俾你朋友, 問下佢喺邊度買架?
我 (再退後一步): 嚇...而家打???
哥哥仔 (又行前一步, 頂...): 唔方便呀?
我 (再退): 係呀...
哥哥仔 (再行前...更加逼切地, 仲作勢捉我隻手): 咁一係你除隻錶出黎俾我睇下?

正惶恐間, 到站! 謝天謝地! 走~鬼~呀~~~~

個案二:
巴士上, 拎住本八卦雜誌揭下揭下. 一開始已留意到隔離師奶一路裝我本書, 冇理佢.
突然, 阿師奶像發現新大陸一樣, 伸手指黎狂篤我本雜誌, 興奮地向同行師奶講: 咦呢個咪林青霞?
師奶二號一望, 同樣興奮地答: 係喎! 你話係咪真係離婚呢佢?
師奶一號: 阿小姐可唔可以借本書我地睇下?
我都未答, 師奶已經老實不客氣一手搶過雜誌, 同佢個friend聲大大兼極度興奮地研究林大美人既離婚傳聞, 同埋林大美人個樣老左好多等等.

到我落車時, 兩個師奶先意猶未盡, 依依不捨地俾返本"巢蚊蚊"雜誌我...

又講見工

之前寫過一篇見工奇遇記, 同I小姐吹開水, 原來我多年見工都有唔少經典經歷.

多年前見過一間公司仔, 見我果位係個年約五十, 奇貌不揚既阿叔. 一輪自我介紹問下d行貨問題後, 阿叔突然問我有乜嗜好, 放假會去邊同做乜, 佢d眼神有d奇怪, 但我不以為意, 隨口答過後, 佢問我屋企有咩人...見我有d猶疑, 阿叔話只不過係想多了解下我背景, 睇下我適唔適合份工. 有d牽強但入世未深既我仲未醒水, 照答. 阿叔靜左一陣, 然後佢問我拍拖未... 咩話??? 見我呆一呆, 阿叔繼續話不如出去office以外既地方食飯傾下計. 嘩! 同你好熟呀? 食飯?! 佢既眼神越睇越變態, 我唔記得後尾講左d乜黎推佢, 總之草草見完即閃!

又係多年前, 俾個agent昆左去見份佢極力推介既工, 去前佢同我講明五天工作, based in HK, 兼條件極荀, 咪去囉. 去到interview, 越講越唔對路, 個interviewer不停講大陸間廠點點點, 隻字不提香港office. 一問之下, 原來佢地短期內香港office就會關門大吉, 北遷大陸. Interviewer仲好奇怪我點解會全不知情, 用有點責備既口吻問我"究竟有冇諗清楚架?" 我提議揾個agent問問, 佢打左一次電話唔通後都擺出副唔想再嘥時間理我既態度出黎, 結果個interview在尷尬既情況下草草結束. 後尾我終於揾到個agent大興問罪之師, 佢死撐話個客冇同佢講清楚. 當我傻架? 我真係唔信!

都係多年前, 都唔記得係咩工. 上到去, 個晦氣既receptionist點我去reception旁間房仔度等. 坐左好耐, 終於有個自稱HR既女仔入黎掉低份form俾我填, 填好等左好耐好耐, 佢先入黎收form兼拎我d certs去影印, 又等好耐好耐好耐, 佢先再次出現俾返文件我. 睇下隻錶, 勁, 淨係等, 填表, 等, 再等, 都攪左兩個鐘. 再等呀等呀等, 間房越坐越凍, 出去問下reception姐姐可唔可以較細d冷氣, 專心啤住個mon既佢頭也不回, 答一句"冇得較架喎!" 頂, 咩態度呀!? 正想再追問點解會冇得較, 同埋仲要等幾耐時, 有個男人一路傾手提一路行黎, 示意我入房坐低. 哦, 終於有得見. 房間內, 呆坐一旁既我聽住個哥仔講講復講講, 時間一分一秒過去, 佢都冇收線既意圖. 我不停東張西望撥頭髮咳咳咳咳咳, 佢先捨得收線開始發問. 問答歷時五分鐘左右, 阿大忙人手機又響, 佢又雞啄唔斷講講講講講, 良久後收線, 問我, "頭先講到邊呀?" 我又由頭講多次, $%^&*#佢丫, 講唔夠三句佢個死人電話又響! 之後, 我勁行貨地求其up左d嘢, 走人! 是次interview歷時四個幾鐘, 好凍, 好餓, 好急, 好慶...

近期d, 兩年多前既事, 俾公司某嘮騷王日日提住公司就執, 咪見下工諗住揾定後路. 一日去見間都叫做有規模既公司, 上到去原本一路感覺良好. 個interviewer係一位中年女士, 初時冇乜嘢, 傾傾下黎料, 佢問我有冇信教. 其實入佢房時都已經見到枱面一個十字架, 牆上又一個十字架, 櫃上更有聖經一本, 但我冇理會, 佢信咩唔關我事. 咁佢問到, 我咪照直答冇. 點知佢即時擺出一副不屑表情, 話, "屋企拜神架?" 我話d老人家裝香拜下祖先咁囉. 佢更加不屑, 話"即係拜偶像啦!" 我心諗拜祖先同拜偶像好似係兩回事黎喎, 但係當然不動聲色. 個阿姐跟住猛同我講耶穌... 結果又係草草見完速逃.

有時諗起, 都唔知好嬲定好笑.

折墮童年 (PG家長指引, 含暴力)

細個時父母感情唔太好, 好多拗撬, 原因係一個對父母愚孝, 難為了老婆, 一個就唔識反抗只識喊...見過好多次阿媽以淚洗面, 老豆就只識黑起塊面發脾氣, 十問九唔應, 再唔係就奪門而出.

阿媽經常心情唔好, 火氣極大, 我有任何嘢唔順佢意, 如默書測驗考試低過九十分, 講錯嘢, 打爛嘢, 倒瀉水, 病左要睇醫生等等, 都俾佢打到九彩, 一個禮拜差唔多有四五日都同我切磋武藝, 型式層出不窮, 常用既有九招, 如下:

1. 藤條炆豬肉 -- 傳統型, 呢個我諗冇人唔識
2. 拳打腳踢 -- 好玩d既變化型加入追逐成份, 屬帶氧運動, 有益身心
3. 變型衣架 -- 手執衣架狂抽, 抽到衣架完全變型為止, 按需要另備新衣架再抽
4. 連環兜巴星 -- 一巴星落左面再迅速反手用手背打埋右邊面, 動作乾淨俐落, 練就上乘功力時五個手指印可平均分怖面上, 清晰可見
5. 拖鞋狂拍 -- 以有一寸厚底之女裝拖鞋為佳, 打小人一樣, 快速向住對方狂拍, 部位不拘
6. 皮帶狂抽 -- 同#5差唔多, 只不過係拍變左抽, 動作較有美感
7. 刀柄扑頭 -- 用具菜刀一把, 難度極高, 力度要適中, 落位要準, 務求令對方暈得一陣陣但又唔會真係瞓低
8. 木尺扑手 -- 半寸厚木製間尺打手心, 但有變種版係曲起手背扑打指根關節, 同樣地屬高難度動作, 太大力會打斷手骨, 太細力又唔夠痛
9. 枕頭蒙面 -- 普通枕頭一個, 將對方打倒地上後用枕頭蓋面, 亦係極高難度動作, 時間要拿捏得準, 以免對方真係窒息而死

讀書靠住小聰明加死好命, 小學階段一直名列前茅阿媽好少有籍口出手. 但係其他方面有時好難避免, 正所謂多做多錯, 少做少錯, 唔做就唔錯; 為令被丙到飛起次數減少, 我細細個就識扮死物, 坐埋一二角, 唔出聲, 唔郁, 最長可以同張梳化融為一體達六個鐘之久, 期間除左去廁所同飲水食嘢會郁下之外, 其餘時間我都在努力地扮一張凳. 久而久之, 個人都變得呆呆鈍鈍, 沉默寡言.

曾經試過被丙後心口劇痛多日, 但又唔敢出聲, 上PE堂偏偏又要我地跑圈, 天生運動神經脆弱既我平時都唔係跑得快, 加上心口痛更加慢上加慢, 上完堂後有幸得老師在全班同學前"表揚"我跑包尾, 同學仔紛紛耻笑"死肥豬走唔郁!" 後話, 近年照X-ray發現一邊胸骨凹陷, 一段脊骨亦凹陷, 唔知同呢次心口痛有冇關係?

又有一次, 受完拖鞋刑後翌日整條右臂腫脹瘀黑, 非常壯觀嚇人, 同學仔小息時都黎參觀我條手臂, 一時之間成為風雲人物, 好不威風.

當年家住西灣河, 其時未有地鐵, 朝朝勁塞車. 果時每朝要六點起身, 務求在7:45準時到校. 成日聽到人話細路仔每日要有九至十個鐘頭睡眠, 我小時除放假外真係未試過瞓多過六個鐘. 話說我媽在阿嫲要求下, 每日湊左我放學食完飯就去佢度煮飯兼湊我細佬(我細佬同阿爺阿嫲住), 眾人食完飯洗埋碗, 先的我返屋企. 冇人加班還好, 有人加班的話, 餐飯分分鐘食到十點, 再飛van仔返家, 可能已經十一點, 阿嫲唔鐘意我喺佢度讀書做功課, 話"書書"聲唔好聽, 所以我返家後先可以開始做功課, 多嘢做時可能要做到點幾兩點...

而家睇返轉頭, 阿媽確有先見之明, 原來佢係為我今時今日入會計呢行鋪路. 當年在D記我出名"唔洗瞓", 佢地又點會估得到, 我係經多年訓練既一個奇人?

就放榜講我放榜

原來會考就快放榜, 又令我呢個老嘢懷緬過去起黎.

澳洲鳥獸省考既係HSC (Higher School Certificate), 可以話係中學畢業試兼大學入學試.

果邊並唔係一試定生死, 學校分都計一部份, 所以就不斷有好多校內assessments, 一部份係tests, 一部份係小型projects形式. 懶惰成性既我抱住不怕死既精神, 貫徹一直以黎臨急抱佛腳既惡習, 每每到test或交功課前兩日, 甚至一日前先動手溫習/做嘢. 可想而知, 成績係幾咁"驕人".

其實果時一直諗住會報讀Fine Arts, 呢d比較特殊既學科係唔洗睇HSC成績, 只係做個portfolio去報名然後面試就得. 我天生冇咩叻, 畫公仔卻有一手, 所以從來冇擔心過, 繼續胡混, 放心偷懶.

可能連個天都睇唔過眼, 要教訓下我, 安排左個盟塞老豆走黎攪亂檔, 攪到我如意算盤打唔響, 無啦啦被逼報左入學要求甚高既會計系.

離考試時間尚有約半年, 正常既學生應該已急如熱窩上的螞蟻, 但係任性既我一心想同老頭子鬥氣, 於是依然故我, 對學校assessments愛理不理, 幾多分就幾多分, 幾大就幾大啦!

終於, 考mock了, 成績普普通通, 冇乜點掂過d書都科科合格, 雖然有兩科係掹車邊合格, 都算係咁.

正式考試時我都係隨心所欲, 喺屋企鐘意就瞓下覺, 鐘意就睇下電視睇下雜誌, 心情靚就去週街遊蕩, 間中真係諗唔到有咩做先拎本書黎望望.

我實在後知後覺得交關, 到放榜前一晚先真正知驚, 個心全晚狂跳, 輾轉難眠. 心知付出既努力實在好有限, 考得唔好係抵死, 真係"滿江紅"的話, 點算?

醜婦終需見家翁, 第二朝一大早就捕住喺個信箱邊等派生死狀, 終於, 九點幾, 型仔得很既郵差叔叔騎住電單車經過, 交低一個大信封俾手震震既我.

不得不承認我確係有考試運, 我最最憎最最唔識早已放棄既Maths居然有九十分, 呢件係發生喺我身上一大歷史縣案, 極大可能係改錯卷, 雖然百思不得其解, 但我梗係唔會蠢到去查卷. 其他科目都考得唔錯, 以為肥左佬既Physics都有六十幾分. 估唔到校內成績在合格邊緣既我, 竟然可在公開試搶番d分返黎! 一時間, 好想仰天狂笑.

講呢個經歷出黎, 除左想當年之外, 呢個故事仲教訓我地, 一分耕耘, 唔代表一定有一分收穫, 呢個世界永遠有d乞人憎既人(係我呀, 點丫?)唔知點解死好命, 一世符碌, 又有d人唔知點解運氣硬係爭少少. 總之, 個天企喺你果邊既時候, 你可以所向披靡; 個天想玩你既時候, 你事事不順衰到貼地.

當然, 呢篇嘢仲有點點晒命成份.

後記: 為免大家睇到心理不平衡向我咀咒, 下一篇我考慮下講我既折墮史.

十年

無意中喺櫃桶底揾到本過期BNO, 一望之下原來我係97年7月29號返港既, 嘩, 咁就十年!

呢十年做過d咩呢? 頭半年, 混混噩噩食玩瞓, 跟住九年半, 捱騾仔.

十年來自己最大既改變, 咪就係老左, 同埋可能比以前卑鄙左.

唯一力保不失既係磅數好大機會回復十年前咁重..死啦死啦...

最開心係叫做有d積蓄, 雖然儲得慢但都叫做有加無減.

最難過係兩位好錫我既老人家已然仙遊.

最遺憾係到今時今日仲未中六合彩.

其他都冇乜特別, 冇咩好講.

十年後唔知又會點?

豎琴

趁未執得住, 繼續無聊.

年頭屎忽痕想扮文人雅士去學下樂器, 原本想學番小提琴, 但係不知何解自小手指尾發育不全, 當年學習時已因呢隻殘廢指累我經常抽筋, 痛苦不已, 都係咪攪. 學鋼琴嘛, 咪又係要用手指尾, 唔洗諗. 曾經有衝動跟tata去拎兩枝棍仔學"扑嘢", 但對中樂實在興趣不大.

諗下諗下不了了之, 過左幾個月, 上網遊遊下無意中見到有豎琴老師招生, 老嫩不拘, 有教無類, 貪得意留低貓址查詢. 問明靚女老師幾十歲阿婆都肯教, 更重要既係, 彈豎琴只需8隻手指, 我兩隻殘廢尾指可以繼續殘廢, 實在太好了, 於是乎, 六月開始就符符碌碌學豎琴.

十幾年後再次睇豆豉, 有點吃力, 但仍勉強應付得來. 音樂係咪可以陶冶性情我唔知, 我都一樣臭脾氣冇耐性, 不過攬住個琴又不期然覺得自己成個人優雅左, 哈哈, 我係淑女 (自我陶醉中).

學左個多月, 感覺良好, 現正挑戰對我黎講算高難度既"Greensleeves"一曲, 亦有意買個琴返家玩下, 已經得到大善長某君口頭上應承提供資助.

希望今次唔係三分鐘熱度, 因為個琴都幾貴...

就快執笠啟示

懷著極度哀痛心情向眾好友好同事們宣告: 本blog可能會在不日內執笠.

開blog年多來無聊文章達二百, 算係做事素來冇恆心既我既一項創舉, 在此感謝大家一直以黎既支持, 我先有心機有心情一篇又一篇地寫落去. 可惜, 我實在唔知呢個blog仲有幾多日命...

關blog原因如下:



上圖女性身體祼露, 男性亦只有樹葉一堆遮蔽重要部位, 淫褻不堪, 經此一upload, 本blog現已成為不雅網站, 隨時會被影視處勸喻停止運作.

圖為Adam and Eve, Domenichino (1581-1641) 作品, 圖解:

老細 (飄浮半空衣衫不整左手攬住保齡球豎起右手食指之老人): 頂你丫, 阿叔行轉背換衫去碌ling你兩條XX就響樹偷蘋果食?!
無聊睇熱鬧群眾: 哦~~~你地死啦今次!
無聊睇熱鬧群眾again: 炒佢地魷魚趕佢走啦!
無聊睇熱鬧群眾once more: 抵死啦老細飯後果都敢偷食!
Adam: 嗱唔關我事呀我咩都唔知道架, 個衰婆叫我食架咋...
Eve: ......

無言

早上, KFC內.

我: 一號餐奶茶拎走唔該!
靚女: 一杯奶茶拎走?
我: 一號餐...
靚女(懶醒地打斷): 一號餐喺度食, 飲咩?
我 (慢慢講, 續個字講): 一個一號餐, 飲奶茶, 拎走!

靚女行開攞嘢.

十多秒後靚女返黎擺低瓦杯裝熱檸茶一杯.

靚女: 唔好意思呀小姐魚柳包要等.
我 (開始黑面): 我係要一號餐, 唔係魚柳包, 飲熱奶茶, 拎走
靚女 (呆望我數秒, 再望一望收銀機): 哎吔唔好意思!

靚女急急腳走開.

又約十多二十秒後靚女取回紙杯裝飲品一杯加鬆餅一個.

俾錢走人.

返到公司, 打開杯嘢落糖, 係架啡黎既...

開多d會啦你地!

又接到心急女士既order, 叫我地部門要開多d會, 促進更緊密合作喎!

我怕既係, 越開得多會, 越撩多d屎出黎, 我頭上既問號會越黎越多...

仲有, 學麗莎姐話齋, "借問聲", 我去邊度揾咁多時間成日開會? 開得會黎唔洗做啦! 都仲未計每日要預少則一兩個鐘多則唔知幾多個鐘去應付心急女士d奪命追魂calls喎!

琴晚約左人食飯, 幸運地到六點半都仲未有call, 歡天喜地收工赴會去. 就在我離目的地約五分鐘路程時, 手提響, 冇來電顯示, 不妙! 一聽之下果然係心急女士越洋追魂, 佢打黎問一個數... 大姐我已經收左工仲要個數係好幾個月前既事黎啦喎, 邊記得呀! 心急女士心急地話: 唔緊要, 你係咪喺公司附近丫? 係既話你返去幫我揾丫?

真係俾佢吹到啤一聲, 幸好I小姐及時救駕, 唔係我喺車上吐血就樣衰喇.

唔知係咪年紀大唔受得壓? 瞓到半夜又唔舒服, 喉嚨劇痛, 週身骨痛.

今朝又再擺低兩舊俾醫生, 今個月第三次了, 靚仔醫生就快以為我愛上左佢.

多事之夏

天有不測風雲, 人有旦夕禍福; 入夏以黎, 工作上風雲驟變, 禍不單行. 先係由上至下, 人事變動變動再變動, 再加上某d人唔生性, 做嘢何止一波三折, 五折六折都有.

已經壓力大, 仲有一位心急女士日日一到下晝就黎奪命追魂call, 疲勞轟炸快則一粒鐘, 慢則分上中下三集分段折磨, 嘮嘮叨叨重重複複問呢樣問果樣吩咐呢樣吩咐果樣, 懶理太陽伯伯早已收工你餓到胃痛煩到頭痛坐到腰骨痛, 兼要個半鐘頭車程先返到屋企.

一早知道呢位阿姐已練成追魂call最高境界 --- 午夜凶鈴. 以為佢只會對自己友施展呢項絕技, 原來佢對內對外一視同仁, 懶理對方身份及自己尷尬處境, 更加懶理對方感受, 充份發揮"全民皆可丙, 眾生皆可煩, 人人要受我差遣"既無畏無懼(無腦)精神.

繼觀摩字母先生既"駝鳥政策", "A字膊"同"太極推手"達四年之久後, 再一次有幸與高人交手, 見識上乘功夫, 太平洋實臥虎藏龍之地也!

肥

初初由澳洲返港時, 達到我一生人最重既高峰. 仲著得落澳洲細碼衫覺得自己好fit既我, 喺香港買衫受到一次又一次既打擊. 幸好做嘢後身心皆受到折磨, 體重回落到理想level.

減磅成功後雖然唔講得係好窈窕, 但起碼體重多年黎都keep得住. 估唔到入黎呢間公司後, 終於失守!

第一年冇乜變化, 第二年原本好地地, 但俾醫生發現我貧血, 下令唔準減肥唔準戒牛肉, 要補身. 中西藥加食返紅肉狂補大半年後, 身體狀況有改善, 但體重亦都隨之上升, 一上磅, 嘩, 重左差唔多10磅!

努力地每星期做瑜珈跳舞, 一年下來有d成績, 體重回落, 褲頭都鬆埋, 實在令人振奮. 不過我開心得太早, 一朝瞓醒, 頸以下完全僵硬, 一郁就痛到我叫救命, 街口黃綠話我睡姿不正, 冇嘢既冇嘢既! 打針食藥後略有好轉, 但兩星期後又痛過! 一照X-ray, 哦, 你條頸生骨刺喎!

醫生叫我停一排唔好做運動, 懶人如我, 停左一排又一排, 都仲係的唔起心肝去做返運動. 再加入夏後狂隊雪糕, 體重直線上昇, 身型正向住冬瓜型極速邁進.



唔掂, 真係要做d嘢, 見班靚女們做瑜珈做得咁happy, 我又去拉下d已經硬晒既筋骨至得.

繼續疲勞

星期五, 一早就聽到個都算算地係壞既消息, 唔係太令我驚訝, 因為預左. 黎緊既日子就辛苦I小姐了.

星期五晚, 沖涼中, 成頭成身番梘既我遇到極不幸事件 ----- 冇水!!! 我頂! 早唔冇遲唔冇人地洗白白先黎冇!? 在企缸罰企良久, 快中暑時先有返水, 仲要窒下窒下, 幾驚無啦啦又再死俾我睇! 匆匆洗淨走人. 打去管理處投訴, 阿伯話: 「"牡" (音如牡丹花個牡)呀, 都"牡"人投訴"牡"鼠喎! nee再試試?」 唉! 嘥氣!

事隔半個鐘都冇, 某君返家去沖涼時都不知幾好水, 個天擺明玩我!

星期六一早有事外出, 三十幾度高溫下搭著架一滴冷氣都冇既巴士. 我完全覺得自己係身處桑拿房! 忍唔住去向司機大佬投訴, 換黎極度晦氣既答案: 「冷氣壞左呀阿姐! 我都就黎暈低啦!」 我@#$^%&丫, 晨早流流就俾人寸. 未瞓醒既我唔識反抗, 唯有傻戇地返埋位繼續焗桑拿.

星期日去剪下d煩惱絲, 原本冇乜嘢, 但剪剪下居然攪肚痛, 我下晝食左半份三文治咋喎! 髮型屋旁一向乾淨無比既廁所昨日情況實在嚇人. 詳情唔講啦, 總之兩格廁所都好似兇案現場一樣... 最慘係我唔去唔得................

今日一早北上, 再一次證實, 防蚊貼係冇用既! 我一雙玉(肉)腿慘被大群餓蚊蹂躪, 咬到一撻二撻, 又紅又腫又痕又痛, 睇黎聽日要以長褲示人.

已經疲乏不堪既我再收一個壞消息, 實在係一波未平, 一波又起, 唔知我同I小姐點死!

身心俱疲

係人老左特別會掛念從前, 定近排壓力大導致精神失常? 一連四晚都夢見自己返回學生時代, 做功課, 開夜車, 默書, 測驗, 考試... 清醒時做做做, 睡夢中繼續忙碌, 朝朝起身都好似冇瞓過一樣.

發袋瘟

Anya Hindmarch一個其貌不揚既環保帆布袋, 多得明星效應及雜誌狂煲, 在世界各地都引黎大批名牌奴隸打崩頭去搶, 香港當然都有份.

好佩服d人既毅力同韌力, 三十幾度無視條街熱到痴肺, 為個袋甘願請日假去瞓街, 排足十幾個鐘, 唔知佢地平時做嘢係咪都係咁有魄力? 我自問冇咁既能耐, 幾鐘意都好, 要咁樣買既話我寧願唔要. 一個袋, 值唔值得花咁多時間精神?

買到又點? 就算閣下係VIP輕易買得, 恐怕好多人都會估你係以下其中一種:
1. 排十九幾個鐘搶返黎
2. 貴幾倍價錢買
3. 大陸老翻

總之就戇居.

病, 要回下氣

秉承放親假都要病一病既傳統, 琴晚起開始發燒 (等我仲埋怨左一晚個冷氣唔凍).

今日又要擺底兩舊水俾醫生.

食左藥, 呆滯中, 加上死期就到, 故休blog數天.

唔好太掛住我.

我的前半生 -- 愛情篇 (三)

返香港頭半年, 工又未揾到, 日日無所事事, 終日沉迷ICQ, 俾我識到加拿大既K君. K君後來返港探親, 咪順便約出黎食飯, 繼而交往. 佢返加後我地keep住聯絡, 夜晚成日拎住個手提匿喺被竇同佢煲粥. 佢又成日喺加拿大寄小禮物過黎俾我, 令我喺父母面前講左好多大話, 免得佢地問長問短, 一時話係舊同學, 一時話上網bid嘢. 曾經有一段時間我好熱衷移民去加拿大, form都填埋所有嘢做晒, 只差在見移民官. 不過long distance relationship始終係好難維持, 漸漸K君既電話越黎越少, 最後無疾而終.

有嘢做有錢洗當然係要申請信用卡, 一日咁啱經過花肥銀行貪得意入去拎張form, 俾我識到銀行職員E君. 對住E君既一年間, 佢做過最令我感動兼感到唔好意思既事就係, 我婆婆出殯前一晚, 喺維園陪喊到滿面眼淚鼻涕既我坐左六個鐘, 飯都冇食. 果晚仲係聖誕前夕, 佢book左枱食飯結果因為我邊度都唔想去, 衰到要踎公園. 不過後尾都係唔夾, 佢太愛管我, 又分.

從同事口中得知, 公司同事A君話想追我. 呢個A君唔係衰人, 只不過個人小器到極點. 我同佢好少單獨約會, 多數都係成班同事出去, 但大家住得近既關係, 每次夜歸都係A君送我返家. 有時大家會有車唔搭, 慢慢行路返去. A君小器病唔發作時其實幾nice幾好傾, 我亦有嘗試過去接受佢, 但係佢實在太多時間在婆媽小器mode中, 小器到令人好難當佢係男人....

果時好多jobs都跟住S君做, 佢係我其中一個supervisor. 呢條S君沉默寡言, 講多句都費事. 平時公司成班人出去飲飲食食佢都唔會參與, 我成日喺背後叫佢自閉佬. 跟佢出job實口臭, 一日頂多講五句說話. 朝早: "早晨!"; 晏晝: "食飯囉!"; 食完飯:"幾錢呀?"; 黃昏: "收工囉!"; 去到車站: "Bye-bye!". 四個字可以形容: 悶到痴肺!

有次又係同S君出去做嘢, 喺間靜到針跌落地下都聽得到既房仔度各自埋頭苦幹, 我明顯地悶到吽晒, 托住個頭, 鼓埋泡腮. S君突然問一句, "你聽唔聽classical music 架?" 我呆一呆, 心諗乜佢唔係啞架咩? 跟住隨口(帶點晦氣&寸)答, "聽! 咩唔聽呀? 你有咩唔明就問我啦!" 果日平時出左門口就分道揚鑣既S君, 居然話陪我一齊搭車. 我好衰格咁話, "我洗鬼你陪!" 但佢又笑口噬噬跟住.

後來靜左一排, 佢冇嘢同我講之餘我都冇理會佢. 有次老細又點我地兩條友出去做嘢, 放工S君竟然約我去睇戲, 仲好鬼浪漫地去睇"鬼眼". 咦? 原來呢條友對鬼鬼怪怪變態縣疑戲都好有興趣架喎! 睇完戲去食泰菜. 咦? 原來呢條友仔又係發神經要飲冬蔭功加辣架喎! 話題打開左, 傾左一晚後, 佢最後既問題係, "如果我追你你點?" 我 (輕佻), "超, 你都唔好玩既!" 佢 (嬉皮笑臉), "我好好玩架, 你放長雙眼睇下啦!"

於是乎, 一睇, 就睇左差唔多八年了!

我的前半生 -- 愛情篇 (二)

第二位受害人C君, 大學year 1時認識, 印尼華橋, 虔誠基督徒. Oh my god.

C君人品其實唔錯, 細心有禮, 管接管送, 疏財仗義. 不過個人正經得過份, 頗悶. 對左佢一年左右已經有d厭倦, 開始唔想應酬佢. C君可能見我態度變得冷淡, 居然傻仔到諗錯左方向, 走黎向我求婚! 嚇Q死, 阿哥仔你冇嘢呀嘛? 果時我19, 佢20... 決斷地拒絕左佢, 我既理由非常之偉大, 我話我要讀埋個degree, 闖一番事業, 點可以咁快嫁? 你等得既等十年啦. 點知, 佢竟然話女人有老公有仔女咪得囉, 洗乜讀咁多書洗乜拋頭露面出去做嘢? 得, 就憑佢呢一句, 我發現我地原來係唔同年代既人, 係咁先, bye-bye.

C君後識左又係同學既馬來西亞華橋P君. 佢同C君完全相反, 貪玩任性, 某程度上有d似我, 大家熱情冷卻度都相妨, 幾個月後就和平分手.

阿叔住院期間, 日日為家事瑣事佢既事東奔西跑. 一日衝衝忙忙追火車時差d將個哥哥仔撞左落路軌, 佢係澳籍希臘裔大大隻健身教練J君(又J!). 所以話, 男女邂逅幾騎尼幾難以置信既情況都有可能出現... 同一段時間, 有日獨自喺food court醫肚都有個南美裔哥仔X (唔記得咩名) 埋黎搭訕. 亦係同一段時間, 喺學校library識左由中東去澳洲讀master (Physics!) 既M君.

嘩, 突然間好忙! 又要四處奔走, 又要應酬三位哥仔, 實在係可以用"疲於奔命"黎形容. 論樣貌身型J君贏晒, 論幽默感X勝出, 論學歷家底 (中東呀~ 中東喎!!!), 當然係M君. 不過, 嫁去中東要包頭, 仲可能要同另三個女人share一條佬; 講笑話唔可以當飯食, 過左一排我開始覺得X其實幼稚可笑, 言語乏味; 而J, 老實講, 我唔係好頂得順男人個胸大我咁多......

點都好, 多謝佢地三位喺我最無助最煩既時候充當我既出氣袋.

跟住果年, 離開生果市去烏鴉鎮, 一日食晏時有個韓國仔埋黎搭枱, 年青人嘛, 好快混熟. 就係佢既關係識左佢個friend, 澳洲長大既韓國仔J君 (又係J...). J君讀 jewellery design, 大家對藝術音樂都有興趣, 甚為投契, 成日約埋一齊食飯吹水. 死火, 佢又諗埋一邊, 幾星期後居然向我示愛, 仲叫我搬去佢度住!

我當然係拒絕, 點知佢以為我係性格保守接受唔到同居, 話可以等到畢業即刻結婚. 當時好想問佢係咪發燒, 定high左嘢. 講極都唔明, 嬲得滯掟電話費事嘥口水! 之後當然不了了之, 冇再見.

過左幾個月, 有日喺學校佢拖住個同鄉女仔埋黎打招呼, 話係佢女友. 見到佢女朋友我打左個突. J君可能以為我果一"突" 係出於妒忌? 佢笑一笑昂首闊步行開.

講返J君女友, 白白淨肥嘟嘟, punk頭勁smoky eyes黑色唇膏黑色指甲油. 乜原來佢鐘意呢類型??? 唔通我之前喺佢心中型像都係呢挺"中毒look"????? 害得我返宿舍照鏡良久. 多得J君, 以後我都識得多加注意, 唔好俾自己有黑眼圈......................(待續)

我的前半生 -- 愛情篇 (一)

唔係含住銀匙羹出世既我, 十四歲時一個任性既決定, 跟住幾年就不斷在富人身邊打滾, 不知不覺形成超級發錢寒性格. 為錢奔馳為錢愁既我一直對自己有日成為大富豪存有不少幻想, 反而對愛情就冇咩點諗過.

十六七歲時, 神推鬼使地令我識到J君. 事緣每年year 12畢業前都要整色整水一番, 攪下活動, 而我果年學校就整左場charity fashion show, 揾當地設計師捐出服裝, 由學生們擔任models, 所有收益撥歸兒童醫院. 印像中成個form連同負責老師懶係認真地開過幾個會傾過詳情, 我有參與, 不過全程遊魂. 記得好似係班鬼妹大部份肥得滯冇可能著得落d衫既關係, 攪左好耐都揾唔夠models, 大家非常頭痛. 我? 一直置身事外.

一日唔記得較鬧鐘, 瞓醒時已經8:10, 大鑊! 我地果時係返8:20, 點齊名然後去assembly. 裙拉褲甩地仆返學校, 飛奔去theatre. 離遠已見一班同學一字排開企喺個foyer度, 幾個老師同兩個不知名女人神色凝重地企喺班女面前. 玩咩呢?

避過老師目光快步閃入去, 正想攝入相熟同學身邊時俾其中一個不知名女人捉住拉左出去, 嘩想點呀? 個女人繼續叫左十餘個女仔出去罰企, 然後打發剩餘女孩子返去上堂. 同同學耳語一番後終於有d眉目, 原來果位阿姐黎揀models, 佢會攪個速成班訓練班女點行. 哦, 原來如此, 佢地都幾desparate, 連我都要揀埋.

其實好想側側膊逃之夭夭, 但係老師們惡死地話唔準say no. 十幾人中又得我一個中國人, 唔見左好覺眼. 跟住就慘了, 連續兩星期, 每朝7點準時返去著住對四寸高踭鞋學行學走位學擺pose, 放學後又留到7點繼續行. 晚晚小腿抽筋抽到我嗌救命. 幾經辛苦先捱到做完個死人fashion show, 當晚最惡頂就係化妝set頭坐足幾粒鐘, 唔好食嘢丫唔該, 會整花個妝個胃腩又會凸出黎. 我頂...

做model既感想: 好核突(d衫), 好痕(化完濃妝塊面敏感), 好痛(雙腳抽筋), 好急(廁所都唔得閒去), 好冇私隱(在幾十人前換衫), 同好肚餓(十二點幾食完飯餓到夜晚九點幾). 事後有人盲左眼睇中我話我可以去日本發展, 仲黎?! 多謝夾盛惠.

原來盲眼既仲有一個, 我同學個堂大佬也, 聽個衰女包話條傻佬果晚有幸見到我喺台上發姣之後就茶飯不思, 好想結識我, 已經俾左我個電話佢啦喎. 唔係呀嘛咁大整古!? 過左幾日果然有件自稱J君既麻甩仔打黎揾我.

上天對我不薄, 呢位J君原來靚仔之餘佢老豆仲交關地有米, 如果我係廿幾三十歲適婚年齡的話, 呢條友絕對識得過. 但係, 果時我得十幾歲, 可以有幾認真? 再加上"人鬼殊途", 睇怕佢都係貪新鮮, 好快就會正正經經揾返個鬼妹仔同佢拍拖. 玩玩下叫做拍左半年, 死, 佢好似想黎真. 為免再拖落去會有麻煩, 我籍口識左第二個炒左佢魷魚.

分手分得乾淨利落, 之後就再冇見過J君. 不過果期當旺, 好快又識一個................(待續)

我的前半生 -- 工作篇 (二)

D記生涯就係一個字: 捱. 每日平均返12個鐘, 話就話五天工作, 不過唔該你星期六日都返工, 公眾假期? 入左D記先知我原來唔係公眾既一份子, 有超過一半機會都係要開工. OT allowance更係一個笑話. ET(eat time)就有我地份! 加班廿個鐘呀? 求其施捨返兩個鐘過你啦!

不過路係自己揀既, 辛苦都預左, 頂硬上啦! 睇返轉頭, 其實呢份工做得比我想像開心. 印像最深係充軍蛇口既日子, 一至日返晒, 最早收工果日都零晨12點, 捱到極殘. 不過成team人又出奇地夾, 做完離隊時都不知幾咁依依不捨.

喺D記一年就勇猛地(兼撞彩地)考埋CPA餘下三科. 考完試, 又係時候諗下前途. 我應該繼續喺D記捱落去, 成世做"疴凸", 定出去闖下? 又在無心插柳既情況下, 過左H記銀行第一關, 不過2nd in時我在新記地產捱緊騾仔過晒鐘去唔到, 對方亦大枝嘢地話唔會同我約過個時間, 非常可惜. 但同時又為我打左枝強心針, 如果H銀號都肯見我, 即係話自己有市場啦.

之後見過好多份工, 有A記菲林, E記時裝, C記地產, H記貨運, I記銀行等. 其中C記地產個offer最吸引, 但係講明日日OT同有屎要執, OT都冇所謂, 反正捱慣, 但執屎喎! 我未做過commercial, 執唔執得黎呀? 聽聞舊屎都唔細添! 到最後, 去左N記工業做, 起碼都叫上市公司, 人工又唔錯.

N記呢份工頗辛苦, 多嘢做之餘老細係超心急人士, 日日催呢樣催果樣, 要求多多兼夾要求高, 都做得好吃力. 但我不得不承認N記確係令我學到好多嘢, 有好多係做"疴凸"未必接觸到既. 喺N記做左7-8個月左右, 居然有個曾經聯絡過既agent自動送上門話介紹荀工, 份工確係荀, 不過要長駐大陸我又唔係好願.

個agent又燃點起我既希望, 個市都好似唔係好差喎, 不如又試下揾唔揾到間再大d既公司做? 又抱住試下冇壞, 唔得都冇損失既心態, 半認真地send下信, 有唔錯既工就去見下, 玩左大半年, 俾我喺SARS肆虐, 個市勁死既時候見成左而家呢份工.

見呢份工極騎尼, 見左agent先, 後來agent話個老細喺台灣set up新公司, 好忙, 頂多都係返黎喺機場果邊見下我然後即飛返台灣, 唔得既就電話interview. 去機場見工? 得喎反正我住附近, 即時一口應承. 之後冇晒回音, 又成日揾唔到個agent, 算啦都係衰左架啦. 就在我毫無準備下既一個晚上, 接到個電話, 對方自稱係間唔知咩公司既CFO, 好在佢喺我以為佢白撞前up得出我個名, 唔係我已經收左線. 嘿嘿, 估唔到真係phone interview咁兒戲! 人地一場打黎咪傾下計囉, 亂車一輪後我都冇左件事. 點知幾日後就有offer!

果時心情唔係興奮, 係好困惑, 真係咁樣就有offer? 上佢公司個website睇完又睇, 又唔似係呃人既公司. 為安全起見我更加犧牲左一個星期日既下晝千里迢迢去佢office"及"下. 多番確認後, 雖然個offer唔係話好正, 公司又遠到死, 但念在佢衰衰地都叫做跨國企業, 花一年半載時間喺度浸下都唔錯. 好啦, 去啦!

呢間公司好多嘢都係我以前未接觸過既, 不失為一個幾好既經歷. 做左年多時想走, 點知有得升職加薪; 再做多一年時又想走, 揾唔啱; 然後到今年年頭, 覺得三年幾真真夠晒皮, 揾到份工話埋要走, 又走唔到.

唔係要三年再三年卦....?????

我的前半生 -- 工作篇 (一)

冇錢洗關係, 好細個已經成日諗住揾錢. 16歲就偷偷地去學人捧餐, 點解要偷偷地? 俾我阿叔知道實向我老豆匯報, 費事又吵大鑊. 但係由於功課太忙, 冇做落去.

入到大學, 去video shop做 shop assistant. 呢份job係有幸得到老豆approved既, 果時好搏, 所有冇人肯返既shifts我做晒, 於是乎12/24, X‘mas Day, Boxing Day, new year's eve等等, 都可在店內揾到我既蹤影. 雖然生活費係足夠了, 我亦終於喺過左去4年多後第一次可以買下衫褲鞋襪豪一番, 但我仍然係過住絕少social life既生活, 鬼咩, 個個得閒出去玩既時候我都要返工! 冇辦法, 點都要犧牲一樣.

97 回港, 初時覺得揾工好易. 小試牛刀apply間小型會計師樓, 即刻有offer. 再apply下銀行, 又得. 之後放一百二十個心去美加大玩特玩一個月, 諗住做嘢後冇可能玩得咁盡. 點知, 盡興歸來, 散盡錢財後, 就遇著股市PK...

跟住落黎幾個月, send極信都冇回音. 等等復等等, 最後到第二年一月先揾到份audit做, 小型local firm, 人工仲要低過之前個offer, 冇得揀之下都要做架啦. 其實除左人工低之餘呢份工都唔錯, 工作唔多又唔難做, 日日遲到返工準時收工. 但係做左年幾, 開始覺得悶, 始終係細公司, 見黎見去都係果d, 學到既嘢好有限, 再加上已經撞彩考左兩科CPA試, 更加雄心壯志想出外闖闖. 可惜, 寄出去既信全部石沉大海. 唔通真係咁就一世?

唔經唔覺去到2000年, 揾工揾到心灰意冷, 去到放棄既邊緣, 跟住上網見到"逼five" (註: 當年A記仍健在, 故未係"逼科")請人, 求鬼其隊幾封信出去, 得就得唔得就算, 當我認命兼認輸. 點知今次居然有回音! D記E記P記都叫我去見, 由於D記離我公司最近, 佢又約得早, 我見完行返公司都唔係遲到好多, 即唔洗攞假, 所以第一間就見左D記先. 去interview果朝其實好眼瞓, 平時邊有咁早起身! 我懵盛盛連筆都唔記得帶, 填form時去問reception 姐姐借筆仲俾佢晦氣地"jip"左幾聲厲我幾眼.

Interview時同條肥仔partner談笑甚歡, 可能冇咩期望, 喺冇壓力下全程嘻嘻哈哈亂up無謂, 我都唔記得講過d乜, 到走得時睇下隻錶, 先知原來已經10:15, 碌到返公司10:20, HR阿嬸堅持我要填表請50分鐘假, 頂...

"逼five"職位一向多人爭, 當時對轉得成工信心不大, 心諗過多幾日"係咁倚"見埋E記P記, 起碼對自己有個交待, 跟住就一切如常繼續混混噩噩有日過日. 兩日後, 喺個客度做緊嘢, 一路聽住佢地幾個師奶staff講湊仔經一路托住個頭抄抄寫寫悶到發瘟之際, 電話響, 嚇到我筆都飛埋.

一聽, D記俾offer我! 人工多四成! -----------------(待續)

我的前半生 -- 學業篇 (二)

澳洲間學校功課多到無倫. 逢星期二都有十九幾萬樣嘢交, 一到weekend就做到隻狗咁. 交唔晒罰留堂做, 直至做完為止, 死未? 幸好成日有人肯借嘢我抄. 果時一到週一就係忙亂抄功課日.

學校香港人唔多, 得三四個. 初初都有兩句, 後尾慢慢冇計傾. 一句講晒: 話不投機半句多. 果時反而同三四個鬼妹好老友. 好可惜, 呢間學校學生個個非富則貴, 人地十六歲生日都要包酒店function room整個ball, 我實在冇可能出席. 冇錢關係, 當年我只係拎住AUD500逃亡海外, 食嘢買嘢都要諗過度過. 租件靚衫去ball? 簡直天荒夜談. 朋友們一定覺得我好怪, 叫親我出去都唔去, 人地叫多幾次都費事再叫. 仲係同學時日日見住, 感情還好, 畢業後就四散冇再聯絡.

我喺澳洲既中學階段就在做功課做餐懵同全無social life既情況下結束. 好多人都話去到外地讀書會覺得d數易讀, 呃人既! 我一樣在合格邊緣徘徊, 後來要讀低level既數學先有幸高分返d. 英文同Fine Arts最好, 揀大學時一心諗住讀Fine Arts或Eng Lit., 多得我老豆, 又係一波三折...

老父唔知點解一定要我讀IT, 猛話讀Arts冇出路. 好不幸地我讀太小兒科既Maths入唔到IT, 佢就係都要我讀Business. 我想揀Marketing, 唔得, 一定要揀Accounting. 諗住唔鬼理佢先斬後奏, 我阿叔又係都要話佢知我揀乜. 之後點? 唔好講啦. 總之為免發生家庭慘劇我被逼妥協.

混混噩噩入左生果大學讀會計, 頭一年已經覺得好難讀. 唔係有班豬朋狗友抄下功課出下貓, 唔洗旨意讀得上. 俾我掹車邊過左兩年, last一年諗住捱埋佢快快趣趣畢業, 個天對我真係好, 嫌我悶俾d磨練我, 果年我阿叔身體出現問題, 入左大半年醫院. 我細佬果時都喺澳洲, 但佢竟然趁呢個時候索性連屋企都唔返, 日日放學就唔知揸左架車去邊度玩. 淨得我一個日日跑醫院, 返工, handle埋阿叔d私人嘢如卡數租金電話費等等等等. 又冇車, 好多時交一張電話費單就用左我大半日.

偶有一次唔得閒去醫院, 阿叔就打電話俾香港所有親戚投訴, 攪到我電話響唔停俾人鬧到癲. 佢日日complain醫院d嘢難食, 一次放學特登撲去買個飯盒俾佢大老爺, 點知阿大老爺話唔啱口味, 食左兩啖就成盒掉左. 我當時實在好有衝動殺人.

渡日如年咁捱到年尾, 考試全軍覆沒(根本好多科冇去考), 仲收到學校信話要踢我出校. 原因係跟據移民法, 拎住student visa既留學生係有attendance既規定, 而我果年返唔夠學....

死死地氣去醫院求個見住我東奔西跑既醫生幫我寫求情信, 叫做通融俾我過骨, 但係Year 3既嘢就要全部重讀. 喺生果大學又再捱多半年, 以前既同學都畢晒業咁滯, 讀到好冇心機, 成績麻麻. 後來決定離開去間小鎮大學讀埋餘下既一年. 一來好想轉新環境, 二來我已經白交左一年學費, 細佬亦都快要入U又要洗大筆, 我轉去d窮鄉僻壤平好多.

估唔到, 喺呢個"烏鴉鎮"係我喺澳洲最開心既一年. 早知早d走!

終於, 97回歸時, 亦係我畢業歸來日!

我的前半生 -- 學業篇 (一)

由幼稚園開始已經好好戲, 事實上表面係乖學生既我, 上堂有95%時間係發白日夢同做其他嘢 (如畫公仔, 傳紙仔). 但小時樣貌肥肥鈍鈍傻夾戇, 加埋唔多出聲, 令老師們紛紛錯覺我係文靜好學既乖學生, 我幾叻, 去到中學畢業都冇俾人揭穿.

雖然由細到大都唔鐘意讀書, 但睇返轉頭又覺得自己其實幾有讀書天份同考試運. 我係"臨急抱佛腳"既死硬支持者, 唔到考試前一日唔洗旨意我會揭下本書, 俾人丙到九彩都係咁話. 天生係打天才波能手, 由幼稚園到小六, 年年都考十名內. 不過我同考第一冇咩緣, 除左K1時考過第一外, 之後最叻果次都只係第二.

小學時以優異成績畢業既我, 派位雖唔理想, 仍有幸考入兩間老媽子心儀既所謂名校. 我本人就較喜歡間男女校, 但係阿媽係都要我讀女校. 是但啦! 上到中學, 一向較弱既數理科目更弱, 年年唔係Maths同Science拖累, 名次會好好多. 其實如果我勤力d多溫習多練習, 應該可以將勤補拙, 不過我唔係咁既人. 年年派成績表都俾班主任鬧, 話唔係見我文科成績好, 我留左班好耐, 次次都警告我要好好地喺數理科下苦功. 我心諗, 升到班就算, 咁辛苦做乜?

F.2 暑假去澳洲探阿叔. 我阿叔貪過癮同我約左幾間學校interview, 叫我留喺果邊讀書, 好呀, in咪in, 唔得又唔洗死. 無心插柳下, 有三間學校收左我, 其一仲係當地數一數二既貴族名校. 果時都冇諗過要去外國讀書, 故in完就算. 暑假過後, 返香港繼續混噩. 後來想drop左自己最弱既Phy/Chem, 同老豆吵大鑊, 佢話文科冇出路 (what?), 堅持我一定要讀理科, 咁即係點條死路我行啫! 阿媽又加埋把口日鬧夜鬧日哦夜哦.

最後我把心一橫, 看準老媽虛榮心, 話難得澳洲有間咁top既中學收我, 冇理由唔俾個機會自己去見識下嘛! 阿媽果然受, 拍心口話佢做補習老師既收入夠供我, 去啦! 跟住又同老豆吵吵吵吵吵一大輪, 最後老父勉強妥協, F.3果年聖誕前, 我終於辦妥所有手續, 準備飛澳洲. 對我黎講, 離開香港冇咩大不了, 仲好, 可以逃過讀理科之餘又可以逃避"常哦"既爸媽..............(待續)

我的前半生 -- 序

如果阿寶刀兄(註: 尊重個人私隱, 此乃化名)所言非虛, 過埋今年生日我已經行左人生既一半.

一於寫下我混混噩噩既前半生, 回顧過去, 展望未來, 寄望明天會更好, 收工可以收得早, 六合彩要中金多寶.

同時亦讓我親愛既同事同學同流合污既損友等等滿足睇blog探人私隱既慾望.

又老一歲

生日感想就係, 老啦老啦老啦.....

冇咩特別慶祝, 食餐飯咁啦. 浪漫燭光晚餐? 哈哈, 唔係.

禮物? 都冇. 叫某君與其花錢買嘢不如捐左去更好.

其他一切如常, 繼續駁咀繼續鬥氣繼續吵鬧繼續嗌好熱好熱好Q熱.

不速之客

端午節晚, 人有三急, 一開廁所門, 一隻極其樣衰, 伸開八隻腳有我手掌咁闊既大蜘蛛, 正在牆邊四圍遊!

想當年喺澳洲我係捕蛛能手, 但鑑於香港蜘蛛身手極其敏捷, 我又冇玻璃樽在手邊, 點好呢?

同佢搏鬥左一陣, 幾次差d俾佢逃走出廳, 我多次想引佢行去窗邊走出去都唔成功. 到最後, 滿頭大汗兼耐性耗盡既我逼不得已要大開殺戒.

同殺強一樣用化武 ---- 浴室萬潔靈. 可能蜘蛛多兩隻腳, 又大隻, 噴左頗大劑量先可以制服佢, 趁佢暈陀陀唔再四處遊走時快手快腳掉落廁所, 一沖了之. 罪過! 罪過!

今個月好黑

六月到依家諸事不順, 都唔知點解呢個月咁黑仔.

健康 - 無啦啦睇左七百幾蚊醫生, 遲d可能要照胃照腸

財運 - 股票買果隻跌果隻, 放左就狂升. 連六合彩亦打破一直中兩個字既紀錄, 踏入六月份後期期一個字唔中! 琴晚喺櫃底揾到張過期credit card statement,佢幾時跌左落櫃底??? 又要俾人罰錢!

事業 - 大量不明朗因素湧現, 擔子突然重左, 仲要應付某d睇唔開人士既投訴埋怨同晦氣說話

愛情 - 唯一不受影響, 因為都冇, 哈哈

其他 - 行路PK, 扭傷手腳, 出左門先發現冇帶銀包/電話等事經常發生; 買嘢找少左錢冇睇; 連今朝搭車都會俾個阿婆恰. 話說手軟腳軟既我好夢正酣, 突然俾人扑頭, 原來係個阿婆一嘢"亨"落我個頭度叫我起身俾佢坐! 咁都得?!!?

六月快d過快d過快d過快d過.....

十號風球呀!!!.......我個肚

貪平食左碗十蚊魚蛋粉做晚餐, 出事! 成晚不停幫襯廁所!

最唔憤氣既係, 某君隊左魚蛋粉加雲吞麵仲有油菜一碟, 點解會乜事都冇? 冇天理!

眾人反應...

關心篇:
靚仔醫生與 Tata: 你d腸胃真係幾差!

無情篇:
老媽子: 咦我約左北角X太飲茶喎, 過黎探下你丫!
我: 好呀順便幫我買兩個豬仔包丫唔該
老媽子: 超, 你住得咁近自己落街買啦, 對面之嘛!
我: .......

鬥慘篇:
老豆: 我前晚都疴呀, 嘔添呀!
我: .......

安慰篇:
某君: 又唔見我有事, 呢d係人既問題!
我: .......
某君: 你咪當排毒囉, 肚腩都細埋啦!
我 (喜出望外): 咦? 係咩係咩?

去度下條腰先!

飛強

連日大雨, 琴晚一隻唔知死既飛強跌跌撞撞飛左入我間屋.

我衝入洗手間攞武器 ---- 檸檬味浴室萬潔靈, 對住懶有型在低空滑翔既飛強一噴, 對方即時墜機跌落地上, 六腳朝天不停掙扎. 噴多兩下, 掙扎續漸減慢, 好快已全無動靜, 可以進行水葬 (沖落廁所).

檸檬味浴室萬潔靈, 殺大中小強, 即時斷氣又得, 慢慢整死佢都得. 得左!

濕滯

初黎太平洋頭兩年都係得個捱字, 人工低都算, 個個月deadline時一班經典人物都出盡力去攪攪新意思, 務求令我神經緊張, 心力交瘁, 夜一夜都不得歸家.

印像最深一次C小姐加F先生呢對寶島雙煞, 攪左pat極大既屎我歎. F先生一句住得遠要走先就去如黃鶴, C小姐send完個email出黎後都極速逃之夭夭. 結果果晚剩低我一個一面受住德國既炮轟, 另一方面逐個數對, 務求揾到一個合理解釋. 最後離開公司時間為零晨二時.

又一次, 唔爭氣既H system居然在deadline一日死俾我地睇, 時為香港時間下午3點, 入數如火如荼中! 德國方面話正在搶修, 叫全世界靜心等待. 我都知旗下仔仔女女大都籍口多多唔願做, 已經逐一打電話去叫眾人留低等. 點知一個鐘又一個鐘過去, 都係全無起色. 到最後成功令system起死回生時已經差唔多7點. 致電眾人時先知道, 原來J先生B小姐同L小姐都已大安旨意歸家去! 同老細報告情況後, 又係出絕招既時候 ---- best estimates. 是晚多得三位同僚好帶歇, 收工時間接近零晨1點.

在太平洋中漂浮兩年多, 情況略有改善. 以為終於可以鬆一口氣, 點知近半年平靜既海面上波瀾再現! 首先公司server不斷間歇性休克, 而寄望甚高既F小姐在去年年底激到我差d心臟病發, 仲有一位L小姐, 絕對係陰險之輩, 兩人被我殘酷一叮後, 頂替F小姐既A小姐表現尚可, 但頂替L小姐既F小姐就實在令人失望. 又係F字頭, 真係唔到我唔信邪...

不幸地我已經將F小姐所屬公司"過繼"I小姐旗下, 累得I小姐叫苦連天, 重演我剛來時既非人生活! 奈何我都有大堆蘇州屎要顧, 自身難保, 可以幫得到既實在唔多. 個天玩嘢都玩得好盡, 今次deadline, 個個務求快手做完快歸家時, 又會突然上唔到德國server.

實在唔知講咩好, 估唔到真係中左口水佬5-6月會有阻滯之言, 希望6月快d過去, 撥開雲霧見青天!

為左慳五毫子...

晚上九時左右, 百X超市.

收銀姐姐: 先生, 今日係無膠袋日, 一個膠袋收返五毫, 請問有冇自備購物袋?
某君 (鎮定地兼肯定地): 有

我碌大對眼望住某君, 佢居然會咁英明自備購物袋??? 叻仔喎!

跟住落黎果10分鐘, 街坊同百X員工們忍笑望住兩條低能死命將手上既罐頭雪糕餅乾薯片朱古力塞入公事包同手袋....

睇黎我都係絕跡百X一排較好, 呢排去住7仔同惠X先.

6.4特別新聞報導

3月大大一次地動山搖後, 聽聞會陸續有餘震, 終於琴日震到過黎.

剛收到消息時頗震驚, 不過諗深一層, 呢d都係遲早既事, 只不過我估唔到佢會爬左另一號人物頭.

都有少少唔捨得, 話晒對左四年, 但係天下無不散之筵席, 有d嘢係不能改變, 冇得強求.

其實之前我決意想走, 都同呢位人兄有d關係, 詳情無謂多講, 佢唔係一個衰人, 不過處事手法有時令到佢下面既人無所適從. 當然, 佢都有佢既難處, 再去深究邊個啱邊個錯都冇意思.

剛剛又發現有蘇州屎要我執手尾, 執慣執熟都唔係問題, 最慘係其他人都以為係我搞個大頭佛出黎啫.

點都好, 祝佢好運, 亦都祝我地呢班小薯仔在過渡期內唔會被折磨得太慘.

埃遊後記

個個都問我埃及去唔去得過, 好唔好玩. 我覺得, 去絕對係值得去, 但要有心理準備會冇啖好食, 同旅途會有少少辛苦. 好唔好玩就睇你對古蹟文物既興趣有幾大, 畢竟我地而家去都係睇返幾千年前既埃及, 今時今日既埃及可以話係毫無吸引力. 一心想買嘢既話就唔洗去了, 果邊實在冇咩好買.

對我黎講果邊確係有好多值得睇既嘢, 自費既Abu Simbel神廟同紅海絕對要去, 前者設計精密, 實在唔知當時埃及人係點計算到令每年2月20日同8月20日陽光可以照入廟內兩個神像 (Ra Harakhti & Amun Ra)同一個法老像 (Ramesses II), 唯獨是冥神Ptah就照唔到. 工程方面無論係幾千年前初建成, 同60年代搬到現址都係同樣地偉大. 至於後者紅海, 唔識游水當船河都好, 真係好靚.

當地人唔係太老實. 買嘢要講價之餘最緊要講明係美金定埃磅. 有團友買嘢時同賣方講價良久, 到俾錢時對方先死拗話要美金. 當地去廁所1蚊埃磅一次, 男女同價, 大小(便)同價, 有得找既. 不過守廁所門果位找錢俾你, 最好數清楚先. 有團友俾5蚊, 對方手上拎住大疊1蚊紙又唔找俾佢, 反而由褲袋摷疊神沙出黎, 全部係25 同 50 piastres (兩毫半同五毫), 團友隨手袋埋就算, 去完廁所先知對方唔知有心定無意, 找少左個幾俾佢. 仲有唔知當地細面額既紙幣係咪真係咁缺貨? 定當地人過份發錢寒一兩蚊都唔放過? 好多時俾錢佢地找, 好d果個就話冇得找, 衰d果個就索性找少幾蚊俾你算.

果邊d銀紙又係另一難頂地方, 同偉大祖國既人民幣一樣, 一個字就可以形容: 霉. 大面額既紙幣稍好, 細面額果d多係溶溶爛爛樣衰衰, 感覺好污糟, 摸完即有洗手既衝動.

當地食物全部偏咸, 炸雞炸魚同包食得最多. 之前去過既朋友同事都warn過我冇咩生果同菜食, 我好彩地日日都有得食, 不過d生果都唔知乾唔乾淨, 食過一舊西瓜黐住死烏蠅一大隻(我以為係核, 死未!). 較特別既係當地人傳統飲品大紅花茶, 佢地叫karkade, 酸酸甜甜味道有d似酸梅湯. 仲有椰棗, 船上buffet日日都有, 香港都有得賣但從未食過, 試過味道都ok.

埃及人係咪真係咁窮? 聽當地導遊講又好似唔係, 當然佢亦可能唔想講到自己個國家咁衰. 佢地個核突市容反映出當地冇咩town planning, 埃及人祖先建築方面既規範同精密計算似乎冇遺傳俾後代. 去左咁多日, 較為好樣既建築只在明顯地富庶d既洪加達同開羅機場附近見到.

我會唔會去多次? 暫時黎講, 一次夠晒!

入埃及記 - Days 8 & 9

瞓左成9個鐘, 舒服左d, 食早餐時好小心唔敢食太多, 個肚唔爭氣, 食完都係有少少肚瀉.

今日行程比較輕鬆, 先去埃及博物館, 館內唔準影相, 唔係我實多角度影Tutankhamun個金面具. 睇木乃伊要另外收費, 孤寒既我倆同全團人都冇興趣. 博物館面積唔大, 古物唔算多, 導遊都話相比起大英博物館同羅浮宮博物館, 呢個簡直可以話係小兒科.

小兒科還小兒科, 館內展品都有吸引力既, 一場黎到點都要睇下, 但唔知咩原因多件展品都資料欠奉, 有d睇完都唔知係咩黎.

離開博物館去左開羅一間叫"中國長城"既中菜館食飯. 入到去所有waiters都係當地人, 初時我地仲以為中國人係老闆兼大廚, d餸上枱後先知唔係... 相信餐館老板係曾經接觸過下中菜既當地人, 開間所謂既中菜館呃下d埃及佬而已. 菜式如下:
1) 涼伴青瓜 - 算係幾似樣, 有少少北方人涼菜feel
2) 蕃茄清湯拉麵 - 似扁意粉多過似中式拉麵, 個湯不倫不類, 冇厘味道
3) 炒椰菜 - 加左少少辣椒同洋蔥絲炒, 唔知係邊個省份既菜色? 不過都算好食
4) 薯仔牛柳粒 - 古古怪怪, 不中不西, 冇乜味
5) 翠肉瓜(似係)炒雞粒 - 同上
6) 牛肉餃子 - 皮極厚, 味道尚可, 好有誠意地用蒸籠上
7) 炸唔知咩魚加個芡汁 - 成舊黑蚊蚊死實實唔知咩黎
8) 蕃茄炒蛋 - 我食過最難食既蕃茄炒蛋, 蕃茄還蕃茄, 蛋還蛋, 乾爭爭兼冇味之餘仲無厘頭地切左d生既青紅椒落去
9) 白飯 - 好爛既飯
10) 飯後西瓜 - 最正常呢樣

食左呢餐混得唔靚既中埃混血菜後, 去香油舖參觀, 好平既關係, 買左幾個香水樽仔俾一向愛呢d小玩意既老媽. 再下一站去 papyrus (莎草紙) 畫店. Papyrus一字源於希臘語 "papuros", 英文"paper"一字就係源於此. 莎草紙係古埃及人既書寫工具, 係用盛產於尼羅河三角洲既紙莎草莖製成. 舖頭入面既畫好多都唔錯既, 由其是一幅星座圖, 但我地實在唔知我地間豆潤屋邊個位置可以擺得到, 所以放棄左買既念頭.

跟住到最後一站, 當地市集. 沙塵滾滾又冇咩好買, 行左一圈冇心機再行落去, 揾左間看來乾淨既coffee shop飲杯嘢. 團友們大都同我地一樣, 空手而回.

又返返去好核突既開羅機場, 淨係check-in攪左個半鐘, 佢counter後面好多人, 不過大部份企埋一邊吹水, 冇人做嘢. 等待期間我地無聊到走去睇當地d蒙面女人過關, 佢地有個小小房間俾呢班女士入去由女關員驗明正身, 八八卦卦地裝左好耐, 雖然只係有條小布帘隔住, 但始終裝唔到一個蒙面女人既真面目.

Check-in後又經過重重關卡出到候機室, 仲以為以當地人辦事效率班機一定delay, 點知準時起飛, 算係個pleasant surprise.

不過準時又點遲又點? 去到Doha機場都係要等到半夜12點幾先再上機........

當晚飛機抵死地真係準時抵達Doha機場, 跟住既節目就係4粒鐘既等待. 我地講左好多廢話, 無聊地意圖偷影出入VIP lounge貌似油王既包頭男人, 跟住再玩亂影. 玩到11點幾去行duty free, 買左大包朱古力返去食. 好不容易先捱到可以上機, 幸運地冇delay, 再等既話我真係會發癲.

實在太疲累, 我罕有地一上機就瞓. 07埃及之旅, 就在迷迷糊糊中結束!

多謝收看.

入埃及記 - Day7

最最最難捱既一日!! Morning call時間係零晨12:30! 眾人死下死下出lobby集合.

我地呢日要飛車由洪加達返開羅. 由於護航既軍警一日只開兩班車: 中午12點同午夜12點, 我地唯有半夜出發, 以趕得及在中午前返到開羅.

車上一直都只能淺睡, 終於上午5點幾去到中途站, 可以落車伸展下硬晒既手腳同去廁所. 就係呢下停一停, 令我有幸欣賞到日出. 係我繼N年前去阿里山睇日出後, 呢世人既第二個日出, 好感動...唔係, 係好感"凍"至真, 晨早流流得十幾度我著住件短袖衫, 凍到縮下縮下!

9點左右到達目的地, Giza 金字塔區. 首先去睇被我地稱為"糞型金字塔"既"梯型金字塔". 呢個世上最古老既大型石建築建於公元前27世紀, 經過多年風沙侵蝕已將個邊邊磨圓, 好不幸地, 望落真係似舊糞....

跟住再去睇平時明信片見得多既大中小三個金字塔, 由大至少, 分別為Pyramid of Khufu (Great Pyramid), Pyramid of Khafre 同 Pyramid of Menkaure, 仲有一d小金字塔仔, 據聞係埋葬d老婆同女既.

呢日唔算太熱但勁晒, 先一日出海操勞, 跟住唔夠瞓, 再加上越來越嚴重既肚痛, 企喺太陽底下有頭昏腦脹既感覺, 似乎有d輕微發燒同中暑既跡像. 同團有位女團友直頭已經燒左出黎, 仲又疴又嘔, 但佢同我地一樣, 難得可以親身去到世界七大奇景之一, 死頂都要繼續參觀.

雖然以前都有騎過駱駝, 今次一場去到埃及, 原本都好想試下喺金字塔腳下既沙漠騎駱駝, 可惜唔多舒服既關係, 我聞到駱駝陣體臭就有想嘔既感覺, 最後放棄左呢項活動. 入金字塔內部參觀我都被逼半途而廢, 入面實在太侷太臭, 簡直抖唔到氣, 再加上異常狹窄同矮既通道, 我要踎低慢慢沿斜路"線"落去, 落到一半我都頂唔順要折返. 不過去足全程既團友話, 落到去其實都冇咩好睇, 得舊爛鬼石棺.

捱完個金字塔, 先午飯再去睇埋獅身人面像. 去到餐廳我同某君兩個都開始肚瀉, 幸好唔係太嚴重同埋我隨身帶住止疴藥, 拿拿林一人隊一粒頂住先. 果餐都冇咩胃口食嘢, 但反正睇落都冇樣好食, 冇損失!

最後節目係獅身人面像, 再一次影左好多好多相. 捱到黃昏食埋晚飯 (去間望落幾好樣既餐廳食, 不過都係唔好食), 終於可以返酒店. 上到房我再次嚴重腹瀉, 幾個鐘內瀉左4-5次, 腳都軟埋, 食過藥後快快趣趣沖涼, 約9點就瞓覺.

入埃及記 - Day6

興致勃勃一早起身去紅海, 全團得我地兩個同另一對夫婦去, 其他團友都話泳術不精, 寧願留喺酒店relax一日. 另有六個團友話昨晚開始有疴嘔, 未能同行.

其實呢日開始我都覺個肚有少少攪既跡像, 但未有肚瀉. 有得玩唔理得咁多住, 照出海也!

紅海果然名不虛傳, 個海好靚, 海水好清好藍 (點解係叫紅海唔係藍海架呢?), 清到見到水底, 唯一可以挑剔既就係呢一日好大風. 一路出海隻船都搖得好厲害, 好彩我地唔係會暈船浪既人, 不過喺船上一仆一碌, 又為我雙手雙腳增添唔少瘀痕.

唔知係咪大風關係, 海水感覺特別凍, 直情係冰水一樣, 落水果下凍到震!

紅海珊瑚種類都唔少, 當然及唔上大堡礁, 但都非常唔錯. 喺紅海浮潛都頗危險, 因為佢d珊瑚生到好高, 高到去伸手可及既位置, 唔小心既話好容易界親. 呢頭某君叫我小心, 果頭我隻腳一伸就俾珊瑚界親腳板底, 好彩我腳皮厚先不致皮破血流, 只係劃左兩條痕. 雖然冇見紅但都幾痛, 有d後悔懶醒話唔洗著蛙鞋!

喺海中心浮潛一會就起程去Giftun Island. 個島有長長既沙灘, d沙唔係好白, 但都好過酒店對出果個"泥灘"多多聲. 我地又再在島上玩多個幾鐘, 先盡興而回.

玩到喪晒返酒店, 都就快到食飯時間. 今晚酒店將枱椅搬到室外, 食露天晚餐, 仲有歌舞雜技表演, 不過為遷就酒店眾多法國客, 全部都係法文節目. 呢餐百人露天晚宴氣氛就夠喇, 但係d嘢都依然係好難食!

9點左右返房沖涼, 跟住快快手執好行李上床小睡, 我地12點幾要午夜逃亡!

入埃及記 - Day5

今日離開隻船, 去洪加達 (Hurghada).

順帶一提夜晚可能太反瞓, 醒來時隻腳又多條痕, 兩邊膝頭都瘀左, 唔知半夜發生過咩事.

3個鐘車程後抵達洪加達, 第一印像係呢度冇開羅咁污糟破落, d屋靚d, 幾有渡假feel, 街上好多歐洲遊客周街行.

先去食個lunch, 去一間叫Star Fish既餐廳食海鮮餐, 幾新鮮, 不過樣樣嘢都好咸.

之後某d團友去shopping, 我地喺個mall行左個圈, 冇咩好買, 走左去飲嘢. 當地d鮮榨芒果汁唔錯, 好濃芒果味(不過唔夠泰國芒香), 10蚊埃磅一杯唔算貴, 飲左幾杯都冇肚痛, 我諗都乾淨卦.

下午4點幾去到下榻酒店Le Meridien, 酒店喺海邊, 外型好靚, 房間望海, 好大. 但係我地好快發現房內冷氣唔夠, 花灑好細水, 浴缸水仲會滲出房外....

酒店行出去就係沙灘, 難得黎到, 點都要濕下身, 拿拿林換泳衣走出去, 有少少失望, 行到好出好出都仲係好淺水唔係點游到, 沙唔靚, 似泥多過似沙, 水裡面咩都冇, 得幾條魚毛仔. 浸左一陣水返去酒店泳池繼續, 玩到last minute先返去沖涼食飯.

晚飯又再一次令我失望, 選擇少都算, d嘢好難食!!! 呢間酒店真係得個樣!

夜晚都係冇嘢好做, 早早上床第二朝要一早起身出紅海玩.

入埃及記 - Day4

最熱既一日, 氣溫高達45度, 朝早7, 8點已經覺得太陽極為猛烈. 由於乾燥既關係, 陽光晒落皮膚好痛.

今日搭船仔由尼羅河東岸去西岸, 再轉車去帝王谷(Valley of the Kings). 呢個山頭埋葬左62個法老王, 包括好多人講既圖坦卡門(Tutankhamun). 我地張飛包參觀三個墓室, 出名既圖坦卡門墓唔包, 要睇就要另外買飛. 不過其實d墓室冇咩特別好睇, 值錢嘢都已經搬晒去博物館, 剩低既只係一d壁畫. 墓室內非常狹窄, 空氣又唔流通, 仲要鬼咁多人. 我打消左睇圖坦卡門個墓既念頭, 冇得驗證佢個墓係咪真係有死亡詛咒.

跟住去女王殿 (Hatshepsut's Temple). 都係冇咩特別, 有好多地方都已經非常破落, 某位置圍住亂石一堆, 估計以前曾經係大殿既一部份. 一場黎到, 影幾張相啦, 突然俾人捉住手, 拎轉面一望又係一個"one dollar"阿叔, 佢懶熱情抆住我地四圍介紹, 指我地影呢度影果度, 又多次想搶去我部相機幫我影, 後來我地趁遊人多混入人堆逃離現場.

回程時去睇埋萬農神殿 (Colossi of Memnon). 所謂既神殿其實只係兩座法老 Amenhotep III 既巨型坐像, 經過3,400年既風沙吹蝕已經殘破不堪. 現時仍依稀睇得出兩座像既型態, 過多幾年可能都係逃唔過變成亂石一堆既命運!

下午去Karnak Temple同Luxor Temple. Karnak Temple個 Hall of columns有134條巨柱, 全部滿佈彫刻. 團友們貪玩試下幾多人手拉手先可以圍起一條柱, 結果係11個人先圍得住. 完成呢項壯舉後旁邊一個法國團大呼 Bravo 並紛紛舉機拍照. 但我d團友冇學到嘢去問人攞 one dollar!

夜晚食食下飯船上既staff走晒出黎載歌載舞, 好熱鬧. 餐廳經理二話不說扯左我出去跳舞, 某君扯返我逃回房中. 晒左一日原來都好疲累, 返房睡魔即急call, Bar內既肚皮舞表演我地結果冇去睇, 瞓覺幾時都緊要過睇肥婆扭腰既!

入埃及記 - Day3

早早就瞓既關係, 一覺醒來只係上晝五點多d, 某君仍在同周公子密會中. 唔知同周公子傾咩傾得咁高興? 我發現瞓緊覺既佢居然面露傻笑! 咁攪笑當然要影低佢, hehe

隻船喺我地睡夢中已航行至金安寶(Komom-Bo), 當日上午參觀既係Sobek Temple同 Horus Temple, 位置就在碼頭附近. 步行往神廟途中遇玩蛇人一個, 佢見我地一行廿人即時兩眼發光, 話我地知神廟未開門不如睇佢玩蛇先, 佢都算黑仔, 剛安頓好幾條唔聽話四圍亂鼠既蛇, 當地導遊就通知入得, 成班即時作鳥獸散!

神廟供奉鱷魚神同鷹神, 內有鱷魚木乃伊, 當地導遊話幾千年前呢座神殿係埃及人既 healing centre, 牆上除左神像同法老外仲有好多手術用具呀女人生仔等等既畫. 晨曦下既神廟雖然破落但仍然極有氣勢, 胡亂影左好多相跟住返船大吃大喝食左個豐盛早餐. 跟住冇嘢做, 返房瞓過.

下晝坐馬車去Temple of Edfu 參觀. 隻馬好瘦, 瘦到脊骨凸晒出黎, 果時又係下午太陽最猛烈既時候, 見佢拖住架車行到頭耷耷, 好慘, 個馬伕仲死命打佢要佢跑快d, 我阻止左佢, 一來我唔想隻馬捱唔住瞓低, 二來唔想食塵, 三來d馬一路行一路疴, 佢唔覺意踢左舊屎黎我度點算?

落車時我唔知俾咩界親腳, 初時仲懵盛盛地投訴, 點解個太陽晒到隻腳刺痛? 一望先知小腿有條長界痕正在爸爸聲流血. 大隊已向前行左去, 剩低我地兩個手忙腳亂求其止血, 呢個係今次旅行既第一條傷痕, 之後陸續有來!

睇完返去, 又一次見識到當地人幾咁見錢開眼. 某君想幫我影張相, 個馬車伕二話不說搶左個相機叫我地兩個合照, 影完後, 返碼頭路上條友全程EE哦哦要我地俾tip, 但其實上車前我地個當地導遊已經幫我地俾左車錢+tip, 叫我地唔洗再俾一分一毫條友仔. 我地一於詐唔識聽, 結果, 到步後我隻腳一踏地, 條友即絕塵而去, 速度之快拍得住香港小巴司機關門開車!

入埃及記 - Day2

九點多d就會周公既關係, 第二朝五點幾就醒左, 列車上唔可以要求太高, 稍作梳洗換好衫乖乖坐低等食. 領隊哥哥一再強調就算晚餐ok都好, 早餐一定難食, 我拎定杯麵出黎. 早餐派到, 原來係四頭"包"既"全包宴", 一個牛角包兩個芝蔴包仲有一塊類似切片蛋糕既物體. 食左個芝蔴包, 係硬左d, 其實都食得下, 可能我要求唔高啦. 不過有杯麵就緊係食杯麵, 食完個包再隊個杯麵, 飽到捧住個肚落車.

上午係咁易去下個大水壩同睇個"未完成方尖碑", 冇咩特別, 由其是個方尖碑, 烈日當空下行到隻狗咁上個山坡睇舊爛石, 團友們都媽媽聲. 下午得兩個年紀較大既團友留守船上, 其餘所有人都自費去Abu Simbel神廟.

初初又話有得搭內陸機, 去到又話人數唔夠唔飛, 哼! 結果要捱兩個幾三個鐘車程去. 是日午餐旅遊巴上再食"全包宴"... 路上景色極度沉悶, 沙漠又沙漠再沙漠, 先一晚瞓左足八個鐘既我, 原本唔應該再眼瞓, 但望望下窗外"佳景"都忍唔住瞓左. 瞓瞓下俾幾個大呼小叫既團友嘈醒左, 原來見到海市蜃樓! 只見一片浩瀚沙漠竟然出現汪洋大海同幾個小島, 令我不禁擔心出面真係好熱好晒....

終於到達目的地, 未行到神廟位置, 先俾大堆手持記念品既小販攔途截賣, 口中唸唸有詞: one dollar one dollar, 唸咒一樣. 唔係幾蚊都孤寒唔想幫襯, 而係我想買時自然會買, 洗咩你班友一字排開隊住晒迫我買? 即時自動聾耳陳兼盲炳上身, 聽唔到睇唔到直行直過, 夠膽死跟黎我就隊我飲緊碌水過去one dollar返佢.

神廟有幾咁偉大, 遲d睇相好過我打餐懵. 總之好佩服幾千年前既埃及人有咁既毅力同能力去起一座咁設計精密既神廟, 同時亦確係好晒好熱, 好彩有帶遮同搽防晒. 之前某君仲話我袋住把縮骨遮好師奶, 嘿嘿, 唔係我把師奶遮, 佢晒到金華火腿咁既色啦!

夜晚返船, 隻船叫Serenade, 真浪漫. 船好細, 裝修一般, 但係d嘢幾好食喎!

是晚由於冇嘢好做電視又冇嘢好睇, 都係九點幾就瞓, 非常健康!

入埃及記 - Day1

一心諗住join個貴價團去歐洲鄉村小鎮避靜, 點知唔成團, 另一個齋去瑞士又要六月一號先有團出發, 有義氣既我為免I小姐獨力面對8號deadline既壓力, 唔去. 左揀揀右揀揀, 某君見到個尼羅河船河團即兩眼發光, 好啦, 埃及就埃及.

第一日先坐八個鐘機去多哈, 夜機關係, 以為自己實瞓得著, 點知事與願違, 上機恰左個零鐘之後就眼光光呆等到落機.

落機後, 原本要等多四個鐘先有得轉機去開羅, 但卡塔爾航空體貼地為免悶死我地呢班轉機客人 (佢應該都覺自己個機場又細又悶又冇嘢好食), 安排左個四小時市內觀光, 行程如下.

第一站係去駱駝市場, 眾人感想: 好臭呀走得未呀!

跟住去舊市集同蔬菜市場, 冇咩特別, 咪街市咁囉, 晨早流流雖然攤檔開左但冇乜人, 緊係啦, 朝早六點幾咋! (可想而知我當時心情係幾咁惡劣)

然後再去個唔知咩馬房 (領隊應該有講不過我瞓左), 手多多走去攪人地d馬.

跟住聽聞仲兜左去半島電台同亞運場館, 不過我都係瞓左冇睇. 後尾去左海濱大道, 景色都係好一般. 我反而對正在興建中既海濱豪宅, Qatar Pearl, 幾有興趣, 不過我買唔起.

最後一站帶我地去家樂福超市!! 領隊哥哥話夜晚火車d嘢好難食, 叫我地買定d乾糧, 心情又涼左一大截.

返去機場一人派張餐卷去輪米. 我睇見果堆炸到死實實既炸魚炸雞就唔開胃, 零願自費去另一邊好樣少少既food court買份三文治.

之後又搭飛機, 三個幾鐘頭後終於去到開羅. 佢個機場係我見過最核突既一個, 灰灰黃黃, 燈光昏暗, 人山人海, 當地人個個唔係全灰全白全黑就全身泥黃色, 女人大部份黑布由頭蒙到落腳, 厲鬼咁樣喺你旁邊飄來飄去.

好不容易等到上車, 直飛火車站. 沿途風光如畫....就呃你既, 破破落落滿地垃圾, 舉目所見, 似乎冇一間屋係完整, 突然覺得大陸原來都唔係咁衰. 當地人好興用騾車運嘢, 見到d動物就戥佢地可憐, 瘦猛猛全身冇忽好肉, 仲要俾人咁樣勞役, 真係做人做畜生都唔好去d貧窮落後地方做.

火車站同想像一樣破舊, 火車外型亦襯埋一套樣衰衰. 果個所謂頭等車廂好窄, 我地兩人兩喼入左去, 轉身都有困難. 幸好車廂比想像中乾淨, 兩張爛凳變身成床後亦冇異味, 水喉都唔係想像中咁細水. 最最驚喜既, 係個dinner雖然賣相欠奉, 但原來味道唔差, 同我當年寄宿既膳食差唔多. 當晚係食炸魚意粉, 舊魚新鮮冇雪味冇腥味, 意粉出乎意料地al dente, 唔算差, 係果碟homus醬個賣相奇差我冇掂, 成堆嘔吐物一樣....

果晚搖下搖下好快瞓著, 都唔知幾鬼好瞓!

Holiday Mood

聽晚就出發, 仲未執晒嘢, 連要帶去既衫都未洗, 哈哈, 衰!

某君除左講廢話之外都冇做過任何有建設性既事. 我就忙住發白日夢, 返工係咁, 返到屋企都係咁.

好驚去到先發現漏呢樣漏果樣..... 想當年讀書時某次去 excursion 就係去到 motel先發覺冇帶牙刷, 呢樣嘢冇理由問人借 (有人肯借我都唔敢用), 離超市又好鬼死遠........ 結果, 我當機立斷地決定唔刷兩日牙, 趙香口膠算 (呢樣又記得帶喎).

我仲記得, 我攤喺張床度趙趙下被周公子急call左去, 第二朝瞓醒時舊爛溶溶香口膠唔知喺咩時候跌左出黎黐住喺頭髮度, 掙扎左好耐先整得甩.

越扯越遠, 好似都未講我會去邊. 不過大部份人都知, 仲未知果d, 睇圖片啦!

母女情深對話

就到母親節, 講下阿媽.

星期日上午十一點幾, 仍在床上與周公子難捨難離既我, 突然被悠揚樂韻吵醒.

原來係我個電話, 某君落街前唔知點解咁神心擺左個電話喺我枕頭邊.

我 (死下死下聲線): 喂...
我媽: 咦你未瞓醒呀?
我 (死下死下聲線): 而家醒囉...
我媽: 冇! 我想問呢, 你地琴晚咁夜返出香港, 搭唔搭到最尾果班地鐵之嘛! (特登打黎問我搭唔搭到車???)
我 (繼續死下死下): 搭到... 不過搭唔到都仲有巴士的士架阿媽....
我媽: 我知呀! (知你又問? 擺明打俾我有其他目的)

Dead air 一陣.

我媽: 喂~
我: 點?
我媽: 母親節你同我去邊食飯?
我: 琴日咪同你食左囉, 下晝一餐夜晚一餐, 請埋你睇戲添啦
我媽: 下?! 係咩? 琴日果兩餐係架啦咩?
我: 你唔係諗住正日走去同d孝子賢孫迫下話?
我媽: 咁又唔係... 不過......
我: 得! 我過數俾你!
我媽 (滿意地): 好啦! 拿識做呀下!

收線.

我媽趣緻嘛?

我係白雪公主

心理測驗一個, 擺明呃post.

火相星座（白羊、獅子、人馬座）start from Q1

風相星座（雙子、天秤、水瓶座）start from Q2

土相星座（金牛、處女、山羊座）start from Q3

水相星座（巨蟹、天蠍、雙魚座）start from Q4

Ｑ１：住在城堡裡的你，想要飼養哪種動物，以陪伴你度過無聊的時光？

（駿馬-Ｑ５；小兔子-Ｑ６）

Ｑ２：你覺得哪種顏色的蘋果最可能有毒？

（鮮紅色-Ｑ６；青色-Ｑ７）

Ｑ３：只有一點點錢，會捐給誰呢？

（賣火柴的小女孩-Ｑ７；乞討的老婆婆-Ｑ６）

Ｑ４：最希望先從魔鏡中看到的事情是什麼？

（前世-Ｑ８；未來-Ｑ７）

Ｑ５：受邀參加誤會，會穿哪種鞋子出現？

（紅色舞鞋-Ｑ９；銀色舞鞋-Ｑ１０）

Ｑ６：在森林裡迷路，誰能拯救你？

（貓頭鷹-Ｑ１０；獵人-Ｑ１１）

Ｑ７：舞會中穿什麼最會引人注目？

（設計特殊的多層次禮服-Ｑ１１；超華麗禮服-Ｑ１２）

Ｑ８：為了和王子在一起，會和家庭中的反對勢力對抗嗎？

（是-Ｑ１２；否-Ｑ１１）

Ｑ９：以下哪個是辨識女巫的特徵？

（閃電-Ｑ１３；月亮-Ｑ１４）

Ｑ１０：有兩個動物，都說自己是被魔法詛咒的王子，哪個可能是真的？

（青蛙-Ｑ１４；知更鳥-Ｑ１５）

Ｑ１１：送給王子的禮物，你會選什麼顏色的緞帶包裝？

（黃色-Ｑ１５；粉紅色-Ｑ１６）

Ｑ１２：如果和王子在一起，要犧牲自己的聲音，你願意嗎？

（是-Ｑ１６；否-Ｑ１５）

Ｑ１３：和王子的定情之吻，你想要發生在什麼情景之中？ 　

（舞會中-Ｑ２０；月光下-Ｑ１９）

Ｑ１４：王子送你的定情禮物是什麼？

（鑽石項鏈-Ｑ１９；會說話的鏡子-Ｑ１８）

Ｑ１５：吻醒王子會解除魔法，你會從哪兒吻起？

（額頭-Ｑ１８；脣-Ｑ１７）

Ｑ１６：發現王子有其他對象，你會？

（退出，祝福他們-Ｑ１７；不放棄，繼續爭取-Ｑ１８）

Ｑ１７：得到神奇魔棒，你最想要實現的願望是什麼？

（嫁給英俊的王子-Ｑ２１；學會透視術等魔法-Ｑ２２）

Ｑ１８：和王子結婚後，你覺得幸福是什麼？

(王子到處旅行-Ｑ２２；生孩子，有個溫暖的家-Ｑ２１）

Ｑ１９：想要住在哪裡的城堡？

（山丘-Ｑ２３；湖畔-Ｑ２２）

Ｑ２０：希望能和哪種類型的王子結婚？

（打敗敵人的英雄王子-Ｑ２４；沈穩治國的王子-Ｑ２３）

Ｑ２１：你是怎樣施展魔法的？

（用魔法棒-"Ｄ"；用手指-"Ｃ"）

Ｑ２２：覺得被囚禁在哪裡比較恐怖？

（海底龍宮-"Ｃ"；魔法森林-"Ｄ"）

Ｑ２３：想和誰學習魔法？

（巫婆-"Ｂ"；妖精-"Ｃ"）

Ｑ２４：居住的王國被邪惡勢力侵佔時，你會怎麼做？

(施展魔法來對付-"Ａ"；尋找其他力量來幫忙-"Ｂ"）

"Ａ"：小紅帽

熱情是你性格中的寶藏。生活中雖然會碰到許多困難，但你輕易不會被苦難擊倒。你有愛恨分明的個性，最討厭事情不清不楚，也討厭拖拖拉拉，做事有沖勁。只要你選對打拼的目標，並堅持下去，成功一定在望。對於中意的男生，你也會主動接近對方，不過膽小男生可能不太敢接受你的熱情，開朗大方的男生和你纔速配哦！

"Ｂ"：灰姑娘

耐力是你性格中的寶藏，面對辛苦的狀況，一般人都忍受不了，但善於忍耐的你，還是會埋頭努力，因為你相信路遙知馬力。性格進退有分寸的你，能得到許多朋友的信賴。但小心謹慎的你，異性緣就有點差了，因為你會防範異性，總擔心遇到壞男生，絕對需要有耐性花時間和你磨下去，等你慢慢發現他的優點並信任他

"Ｃ"：白雪公主

你有交際天分，人緣超好，能夠認識各式各樣的朋友，人際關係廣闊。在你遭遇困難的時候，只要開口，這些朋友就會跑來幫你擺脫麻煩。你的戀愛對象也常常是從朋友轉變來的。但要小心自己和普通異性朋友太ＭＡＴＣＨ，以免使自己的戀人吃醋

"Ｄ"：美人魚

溫柔是你性格中的寶藏。你不喜歡顯山露水，情緒容易波動，很在乎周圍人的想法和感受。你常為別人的不快樂而焦慮，恨不得立刻去幫助他，因?A的人緣不錯。可是當你自己碰到困境時，卻常常往壞處想，是悲觀的女生，不小心還有習慣性的自怨自艾。在心上人面前你不太會積極主動，只能默默付出，等待對方注意到你。要是有朋友和你喜歡上同一個對象，你可能還會退讓成全他們。這樣的態度，會讓你離幸福越來越遠，一定要小心哦！ 　

噪音車廂

火車靜音車廂內, 確係非常寧靜, 可能星期一關係, 大部份作上班族打班既乘客一上車都瞓到東歪西倒, 一係就兩眼發直毫無焦點在發呆.

我諗住一路瞓到落車, 點知, 好夢只能去到九龍塘.

3個師奶一上車就向眾人展示"一個墟"既威力, 用足以震破耳膜既高頻高分貝聲線互相提示邊度有位坐. 個天一向愛同我作對, 安排左噸位最夠講嘢最大聲果個坐正我隔離, 另外兩位坐對面.

跟住3個師奶全程擘大個喉嚨, 隔住一個二個企喺路中心既乘客高談闊論, 由仔女講到買餸講到買鞋講到打麻雀講到飲茶講到種花.... 口沫橫飛手舞足蹈, 我俾隔離師奶逼到半邊身啜實塊玻璃坐, 另一邊身, 我數過, 俾佢隻強而有力既手臂撞左起碼十下, 佢隻大脾都撞左我五, 六下.

落車時我一企起身, 肥師奶即時烏向前, 用佢自以為好細聲既聲線同對面講, "嘩, 嚇死人, 佢企起身咁高既!?" 我眼尾睄到幾個師奶由頭到腳打量我. 踏出車門時仲聽到句, "咁鬼死大份都幾難嫁得出!"

吹---漲!

五一過後

收唔到emails既日子係幾咁徬徨?

公司server唔知係咪誤以為香港五一假期同國內睇齊, 30號晚開始收工, 2號大夥兒返工, 收/發唔到emails外仲一度連網都上唔到. 大國手奉召到場搶救, 但係一個鐘又一個鐘過去, 毫無起色.

3號, 情況依舊不明朗, 等到下晝, 被奸人所累攪到只能用無線上網既我居然連Skype都瓜埋, 對於一間有嘢唔鐘意打電話問係都要send emails既公司黎講, 我徹底地與外界隔絕. 雖然收唔到emails有大個籍口做少d, 但托住個腮發呆既同時都不禁擔心一但回復正常會一次過收幾多個emails? 200? 500? 1,000???

4號朝早, 仍然唔得. 等到下晝, 終於有38個emails彈出黎, 全部屬4號朝早發出, 似乎2號3號既emails已經石沉大海, 衷心希望佢地永遠唔會浮出水面, 阿們.

逃過一劫

禮拜六, 冇節目, 兩條友無無聊聊週街遊蕩, 反正冇地方好去, 隨意跳上架赤柱小巴.

喺赤柱都係四處遊蕩, 食下雪糕, 撩下人地d狗, 懶係有feel企喺海邊睇下景, 跟住去飲嘢.

Mocha+cheesecake+吹水+扮有文化睇下書之後, 不如返出去行下跟住食飯.

差唔多到巴士站, 都係杯mocha唔好, 人有三急, 結果要走返轉頭解決. 某君EE哦哦, 不過又跟住去, 後來可能佢要照鏡關係, 我係先出黎等果位.

行返去巴士站, 剛好見到架63號巴士上完客絕塵而去.....

跟住二人互相埋怨, 你話我做乜無啦啦要返轉頭去廁所, 我話你做乜去廁所去咁耐. 爭拗良久, 幸好在大打出手前有小巴經過, 上車.

去到環角道轉舂磡角道位置, 首先見到既係一班人坐喺地上, 咦? 拍戲呀? 跟住一架撞到"食"晒入牆既巴士同地上超長呔痕映入眼瞼. 再望返地上一群人, 原來係可憐既受傷乘客正在接受包紮.

如果我地唔係去廁所既話, 好大可能會上到果架63號...........

樂樂﹑盈盈

兩隻國寶被前呼後擁送黎香港, 大名終於揭盅 ---- 樂樂 & 盈盈.

同意某d討論區所言, 兩個名確係幾"行". 話唔好, 又唔係, 起碼叫好意頭又易讀; 話好, 都唔覺, 普通過普通, 總之就係解開心啦, 係咁多, 深度欠奉. 反觀臥龍方面幫自己旗下熊貓改既思雪, 依寶, 萌萌等, 似乎更有意思更有心思.

廣東話係好衰既, 香港人把口更衰, 兩個名一出左, 即時有人潑冷水. "樂"不幸地同"落"同音, 令人不期然諗起"股市滑落"(!!!). "盈盈"又不幸地同"營營役役"既"營營"同音. 唔提猶自可, 一提就好覺, 啋!

個人意見, 都係某君隨口up既"旺丁""旺財"好d.

當年今日

今日係ANZAC (Australian & New Zealand Army Corps)Day, 記念一次大戰戰死沙場既澳紐軍人.

當年今日亦係我入D記捱騾仔既第一日, 眨下眼就7年!

雖然初返工冇咩特別嘢做, 但係對我黎講都已經係一項大挑戰. 之前份工返9:30, 我慣左9:40左右先到, 然後hea下吹下水做少少嘢5:30準時走人, 頂多做到6:00. 著衫又冇限制, 鐘意既著牛仔褲波鞋都冇人出聲. 入左D記, 一下子變到返8:30唔準遲到套裝絲襪仲要化個淡妝.

記得當日懵下懵下七點就起身妝扮一番, 再懵下懵下出門口. 一直到食晏之前我都係在三魂唔見七魄狀態中, 食完飯後魂魄先歸位. 相信新同事們一定覺得呢件巫婆look女人好樣衰.

之後既日子都唔好講啦, 過左兩個禮拜training既蜜月期後, 每晚返到屋企仲睇得到晚間新聞已經算幾早. 更多時係返到去已經差唔多天光, 沖個涼換件衫又要返工, 只可以喺車上小睡.

好慶幸我喺仲捱得下既日子入去捱, 今時今日叫我返去是但一間"逼科", 我可能會變成第二個趙承熙.

4.25, 對我黎講係一個幾值得記念既日子.

我決定今日唔做嘢好好懷緬一番.

Kill Time

上網見到既, 辦公室最佳kill time活動如下:

炒股 / MSN / Email / 食早餐 / 睇報紙 / Freelance /做功課 /傾電話 /sms /同同事吹水 / 痾屎 / 發白日夢 / 釣魚 / 修甲&搽指甲油 /沖奶茶 or 咖啡 / 寫日記/blog / 聽收音機/mp3

除左 freelance, 做功課同搽指甲油未做過外, 我都可以話係壞事做盡...