俾人"jip"

朝早, 如常唔夠瞓, 如常懵下懵下, 頭腦一片空白地行去巴士站.

一位OL打扮女子, 睇黎應該係遲大到, 匆匆忙忙兼慌失失地向前衝, 越過死下死下龜速前行既我時, 仲好唔客氣地"jip"左我一聲.

望住向前急行既OL, 覺得佢件衫好怪, 點解背脊有舊嘢拱起既?

謎底好快解開, 只見舊不知名物件隨住該女子既急速步伐一直向下滑, 然後, "啪"一聲, 一個衣架應聲落地. 哦, 佢眼瞓程度應該同我有得揮, 成個衣架攝住個背脊都唔覺!

衣架既主人一下疾步, 轉身見到個衣架都呆一呆, 佢作出最明智既決定, 詐睇唔到, 走!

繼續疾走前, 佢見到目睹事發經過並陰陰咀笑既我, 又"jip"左我一聲.