越黎越頂唔順住隔離個阿叔.
其實我好易話為. 佢每朝掉十幾個屈記蒸漏水樽出黎, 間中喺後樓梯對住d樽大聲發表偉論, 我冇問題. 佢幾個禮拜唔沖涼唔洗頭, 全身惡臭d衫又霉又"宿"佢都唔理既話, 我都冇問題. 佢十世唔沖廁所全屋一陣尿味而佢唔介意既話, 我亦冇問題.
但係當d味已經唔只係留喺佢屋企範圍內的話, 就好大問題!
呢位阿叔每次喺出面走廊或lift內逗留過, 佢d酸宿味要幾個鐘先散. 我住正佢隔離, 次次開門鎖門都要閉氣, 果d尿臭味彌漫成個area, 我越來越覺得自己住喺個臭公廁旁邊.
全層樓6伙人都投訴過呢個阿叔. 幾個看更亦同佢講過好多次, 阿叔永遠係神情木然咁話會改善, 跟住好左三日又臭過. 由於佢有同膠樽溝通既異能, 我地呢班可憐既鄰居都唔敢刺激佢, 唯有默默忍受, 暗暗咀咒.
呢排屋企耐唔耐有小強出沒, 我覺得除左係由於天氣又熱又濕之外, 佢地極有可能係光顧完阿叔間臭屋, 再順便過黎我呢邊參觀參觀. 琴晚有隻唔知死居然夠薑爬上我隻腳, 雖然佢知衰即時逃離現場, 但都俾我窮追不捨用拖鞋處決左.
我洗腳洗左十分鐘.
好想快d搬!!!!
7 comments:
你真係可憐. 有惡鄰, 又有蟲蟲探訪. 咁既屋真係唔好住. 你幾時先可以甩難呀?
等涼d先搬, 熱辣辣搬屋會死人
@@好恐怖呀~~
都係等你搬左先約出黎呀~~
約出黎同我搬唔搬有咩關係﹖唔明
我驚你帶埋d朋友仔出黎麻
乜你會當小強係朋友仔咁cute架? 我唔會架~
小強佢係唔係頂唔順呀叔果間古龍水味先過去你度呀? 我諗小強佢諗起男兒臭, 女兒香喎. hahaha...
Post a Comment