手軟腳軟

上個禮拜唔得閒冇上瑜珈, 禽晚上一堂辛苦到死. 一般d拗柴摺埋動作之前都已經可以應付自如, 但禽晚明顯地不在狀態, 差d真係拗柴. 有個動作要單手單腳支撐全身, 做到震晒標晒汗. 望下前後左右同學仔, 唔覺有邊個好似我咁滴晒汗喎!

辛辛苦苦捱左一個鐘, 可以瞓低攤屍時簡直有拍手掌大叫既衝動.

上少一星期啫, 冇理由unfit成咁呀嘛??

蜘蛛

唔知幾時開始有兩隻黑色蜘蛛仔各霸左我廁所窗一角做竇. 我好少見佢地個網上面有獵物, 但可能事實上生意唔錯, 其中一隻明顯地大隻左.

佢地初搬黎果陣, 我入去沖涼時會急急腳爬去窗罅匿埋, 到我走左先出番黎. 而家可能慣左我地出出入入, 又見我地冇郁佢既意圖, 除非俾我d水花濺中, 唔係佢兩隻喺我洗白白時依然會留守崗位, 行過d都費事.

以 前喺澳洲住過一間有fire place既apartment. 其實果邊都唔係凍到要生火取暖, 好多時我地都只係貪過癮去買包木番去燒下. 可能個煙囱又暖又黑, 吸引左好多蜘蛛爬入去. 好多時會聽到fire place傳黎輕微掙扎聲, 跟住就會見隻肥大蜘蛛跌落黎. 果邊d蜘蛛肥大肉厚好多, 見親既都毛神神, 差唔多有我手掌咁大.

家人見到蜘蛛既反應各異. 最肥果位男士通常會嚇到面青口唇白, 慘叫速逃. 瘦d果個比較變態, 拎把剪草既大較剪將隻可憐既小動物一開二. 後生d果位抱住眼不見為乾淨既心態, 只要隻蜘蛛唔爬上佢張床, 話知佢遊勻全廳.

雖 然我對蜘蛛呢種動物冇咩特別好感, 但亦唔覺得厭惡. 佢地雖然對腳多毛d, 個樣衰d, 但事實上蠢蠢鈍鈍行動遲緩(經驗所得, 澳洲d蜘蛛動作確係比較慢). 剪開兩忽太不人道, 走左入我間屋罪不至死啫! 於是乎有次我就唔俾人用較剪行刑. 我去攞左個冇用既玻璃樽, 用枝棍仔一撥, 隻蠢鈍獸就俾我撥左入樽, 佢好隨遇而安, 乖乖坐喺樽底完全冇逃走既意圖. 然後我擺個樽喺花園, 等隻野自行爬走.

呢個方法萬試萬靈, 捉到蜘蛛入樽既成功率係100%. 蜘蛛既蠢鈍程度實在好令人難以置信, 我試過48小時後仲見隻野喺個樽入面唔郁, 以為佢死左但撩下佢又有反應架喎﹗

有 一次唔知點解咁熱鬧. 去完街返去見到兩大一小蜘蛛喺個fire place度爬爬下. 我照樣攞個蜘蛛樽捉左佢地入去. 唔知果隻細蛛係咩品種? 兩隻大蛛圍住個樽不停遊走, 唔敢埋細蛛身. 我拎個樽落樓一打開個蓋, 大果兩隻急不及待衝左出去, 反而細果隻氣定神閒再坐一會先慢條斯理離開.

我練左一身捉蜘蛛好本領, 後來住house時就更加大派用場!

排清毒素身體好?

有d虛脫既感覺, 我禽日下晝食左半份三文治, 夜晚食左半碗魚蛋米. 食完始終都係有“排戚”現像. 而家肚腩都細埋.

禽日掛住研究腳指唔記得話俾大國手知我有d皮膚敏感. 面既班班已經退左, 但心口背脊仲係一撻撻紅色, 好核突.

為左將來仲可以著低胸裝同露背裝, 我諗我以後都唔會再食海鮮.

今日其實好唔想返工, 但我知唔返兩日既後果可以好嚴重, 所以手軟腳軟都死返黎. 一開電腦, 死得, 一百五十八個emails, delete左三十幾個垃圾仲有百幾個要覆, 仲要個個都話urgent! 當堂又有想死既感覺.

果個唔知做乜既阿叔晨早問我攞個數既breakdown. 瞓醒未呀阿叔! 個數佢自己俾我架, 咪就係得大數一個囉, break佢個頭咩! 我咁答: 你都冇俾breakdown我, 我冇架喎. 會唔會好吋?

得返半條人命

疴到想死, 今日終於要睇醫生.

醫務所勁多人, 等左個幾鐘先到我. 入到去循例聽下肚, 教訓左我幾句唔好食呢樣唔好食果樣之後, 諗住阿大國手會即時打發我走, 點知佢留意到我隻腳指公腫左.

我乖乖地除拖鞋俾佢研究研究, 聽下佢有咩專業意見.
大國手: 喂, 你剪腳甲剪得太深, 新生果d腳甲篤左入肉發炎呀
我: 係呀, 成日都係咁, 好鬼死痛...
大國手(拎住原子筆瀟灑地喺我腳上比劃, 一論嘴講): 有方法根治既! 嗱, 呢度篤一針, 呢度又篤一針, 麻醉左之後劏開你隻腳指, 割晒成忽腳甲出黎, 咁再生既腳甲就唔會再篤入肉架啦!
我 (吞口水): um....
大國手(繼續落井下石): 唔痛架喎...做緊手術果陣, 係打果兩針痛d之嘛! 要桔落呢度呢度(又攞枝死人筆喺我隻腳度撩撩下)
我: er......
大國手: 你公司有醫療保險丫嘛, 寫紙俾你搵私家做都得呀, 你諗諗佢啦. 唔係你就下次痛到頂唔順黎搵我幫你剪, 唔好自己亂剪.
我: 哦....唔該你喎....
大國手: 俾枝藥膏你搽下啦, 洗唔洗寫多幾日假你抖下呀, 跛下跛下咁...
我: ...得架啦, 一日夠啦...
大國手: 你返工要著高踭鞋喎!
我(一路逃走一路講): 得架啦得架啦...

下次想修腳一於去搵大國手, 拎埋枝指甲油去, 加埋閃粉~

我好cheap

琴晚同班老死去RIVA食龍蝦, 景靚食既野更靚, 非常多謝Miss Choi款待. 不過好衰既我去修甲傾到唔捨得走, 遲大到, 嘻嘻...真係要同幾個靚女say sorry~

唔知係咪而家少食好野, 唔受得. 返到屋企肚痛, 跟住成晚忙住出入廁所. 今日皮膚敏感, 成身好似出疹一樣. 有位冇份食, 擺到明極度唔抵得既男士由尋晚開始幸災樂禍, 講左無數句風涼話, 話我d腸胃太cheap, 叫我以後食龍蝦丸算啦喎.

死啦唔通我真係cheap?

Home Sweet Home

細 個時住唐樓, 其實仲多蛇蟲鼠蟻. 小強最常見, 老鼠都差唔多日日見. 果時屋企有兩隻狗, 仲有六, 七隻自來貓喺度做食客. 時不時會見d衰貓捉老鼠玩, 玩到甩頭甩腳就掉埋一邊, 細個唔識驚仲覺得好過癮. 果時幾開心, 有兩隻狗狗陪我玩, 又有天台俾我無聊時上去攪攪震. 天台仲無厘頭地養左隻雞, 為免佢俾d貓捉左去所以用籠困住養. 手痕時我會攞野篤下佢.

後尾搬左上 山做山區居民. 間屋大到可以喺廳踩單車, 又有私家公園. 但喺山邊關係非常潮濕, 濕既地方就特別多蟲蟲. 又係蟲! 個花園原來好多老鼠. 有次玩"捉依因", 誤闖水池後面禁地, 搗破左個老鼠竇. 五, 六隻大老鼠慌不擇路居然一隻二隻跳落水池. 果時先知老鼠識游水.

再搬就搬左去小學附近, 即而家住緊呢區. 果間屋就勁啦, 每日都受怪聲騷擾. 怪聲集中喺我間房, 有時係幾個人"吱吱噚", 有時係女人歎氣聲, 有時係阿婆講野聲. 肯定唔係第二度傳黎, 因為d聲好近, 就好似企正喺我旁邊講咁, 同埋廿四小時都聽到.

除左人聲之外, 我房有個露台. 通往露台個門間中會發出敲門聲, 好似有人被困外面想入黎. 我初時以為係風吹, 但係後尾發現一滴風都冇既日子都一樣會有呢d聲, 而且d敲門聲係好有節奏, 絕對似係人為, 同d人聲一樣廿四小時都會出現.

果 時耐唔耐就會唔見野. 曾經倒瀉波子棋. 執番d波子後發覺少左一粒, 推開梳化同櫃都唔見, 搵晒成個廳都冇, 唯有放棄. 幾個月後, 有日無所事事坐喺度發呆, 突然聽到一d輕微滾動聲, 望下個地, 見粒波子慢慢喺個梳化椅底向外滾動, 滾到我腳邊停低...如果佢識講野我真係好想問佢之前去左邊.

最經典一次係全家排排坐睇電視, 阿媽無意中向後望一眼, 嚇到大叫. 原來牆上面居然有十幾隻巨強喺度爬爬下, 隻隻都起碼兩吋長. 佢地究竟幾時同喺邊度爬入黎? 我地三個人六隻眼都見唔到.

去 到澳洲, 住過一度晚晚個衣櫃入面都會發出敲擊聲, 廁所會自己沖, 門會自己開, 燈膽經常爆炸(仲要次次都係我經過時爆, 跌到我成頭玻璃). 又成日有大蜘蛛喺煙囱跌落fire place...住house仲攪笑, backyard竇螞蟻當左我地個浴缸係停屍間, 晚晚抬死螞蟻入黎浴缸棄屍, 沖之不盡!

似乎我同d鬼怪&蛇蟲鼠蟻都好有緣~

Love Thy Neighbour???

越黎越頂唔順住隔離個阿叔.

其實我好易話為. 佢每朝掉十幾個屈記蒸漏水樽出黎, 間中喺後樓梯對住d樽大聲發表偉論, 我冇問題. 佢幾個禮拜唔沖涼唔洗頭, 全身惡臭d衫又霉又"宿"佢都唔理既話, 我都冇問題. 佢十世唔沖廁所全屋一陣尿味而佢唔介意既話, 我亦冇問題.

但係當d味已經唔只係留喺佢屋企範圍內的話, 就好大問題!

呢位阿叔每次喺出面走廊或lift內逗留過, 佢d酸宿味要幾個鐘先散. 我住正佢隔離, 次次開門鎖門都要閉氣, 果d尿臭味彌漫成個area, 我越來越覺得自己住喺個臭公廁旁邊.

全層樓6伙人都投訴過呢個阿叔. 幾個看更亦同佢講過好多次, 阿叔永遠係神情木然咁話會改善, 跟住好左三日又臭過. 由於佢有同膠樽溝通既異能, 我地呢班可憐既鄰居都唔敢刺激佢, 唯有默默忍受, 暗暗咀咒.

呢排屋企耐唔耐有小強出沒, 我覺得除左係由於天氣又熱又濕之外, 佢地極有可能係光顧完阿叔間臭屋, 再順便過黎我呢邊參觀參觀. 琴晚有隻唔知死居然夠薑爬上我隻腳, 雖然佢知衰即時逃離現場, 但都俾我窮追不捨用拖鞋處決左.

我洗腳洗左十分鐘.

好想快d搬!!!!

邊個爆石爆爛左個廁所???

屋企個廁所又有問題, 一係漏水一係沖唔到. 研究左好耐都唔知乜事, 唔理啦! 仲有廁所隻窗唔知點解無啦啦裂左. 麻鬼煩. 死人cheap樓, 唔係爛呢度就爛果度. 好彩間屋唔係我既!

搭車坐正條傻佬對面, 全程自言自語, 逢女經過都由頭到腳打量人流晒口水口up up,"正呀, 嘩, 正!" d女由十幾到五十幾都有, 佢都一視同仁頻呼"正!" 隔岸觀"傻"既我正諗緊"呢位人兄都好濫!"既時候, 見佢喺背囊拎個包出黎食, 一路食一路作陶醉狀,不停講, "唔...正呀! 正!"

哦, 原來佢淨係識講呢句~

話咁快又星期一

好似冇咩點抖過, 又要返工了. 晨早起身喉嚨痛頭又痛, 心情惡劣.

今日唔知點解8:45就到. 仲有時間四圍去"及"下買咩早餐, 最後都係食番KFC腸仔蛋. 好飽好飽, 食完野心情稍為緩和.

又有新同事報到有d野八下, 做人又有番少少目標. 唔知有冇飯食呢? 點解佢好似好拘謹咁既? 我地一人一份早餐擺喺檯面嚇親佢?

老細病左, 陰功囉, 又病! 佢放完假番黎都病得幾頻密下. 都話佢財多身子弱架啦, 我就冇錢瞓唔著!

萍水相逢既朋友仔去每一個地方旅行都記得寄一d小小手信番黎俾我. 實在令人非常非常感動. 相比之下我就真係冇心, 出親去都唔識買番d野返黎俾人.....要好好檢討下, 唔係以後冇人買手信俾我點算......

今年興去日本咩下? 我識既人都去左, 去緊 or 將會去日本. 死啦我冇去, 好out! 同卑鄙話出年要去日本, 又俾人冷言冷語, "你度度都話想去, 你究竟去得邊?" 超, 講下都唔俾呀?

http://www.cbsnews.com/stories/2006/06/12/tech/main1701359.shtml
喂喂, 去試下啦~ 呢個高頻聲多數25歲以下既人先聽到. 但係我聽到喎! 都話我年年18架啦, 有排都未退化呀, 哈哈哈~

死亡筆記

無所事事走左去睇死亡筆記, 都過得去啦, 預左冇漫畫咁好睇, 但起碼我冇瞓著. 古仔未完又係要等下回分解.

呢套野選角都幾成功, 個死神越睇越似Batman入面個Joker!

繼續睇伊藤潤二.

六合彩又唔中...

真係冇乜橫財運. 買左兩張電腦自己填兩張, 居然全部都係中兩個字, 加埋就頭獎囉, 特別號碼都中埋添, 激死~~

夜晚入房又有小強. 係咪喺冷氣機爬入去架? 入去我間房把鬼咩, 都冇野食! 處決左佢之後我換晒所有床單被袋枕頭袋, 恐防佢六隻污穢既腳掂過. 卑鄙男唔幫手之餘仲冷言冷語話我神經過敏, 小題大做!

我下次活捉幾隻小強黐喺佢d衫度!

買左六合彩未?

六合彩6,800萬喎, 你今日買左未?

今朝有位平時當所有人透明既小姐居然主動同我講早晨, 攪到我差d唔識反應. 其實佢都幾慘, 當人透明之餘人地都當佢透明, 真係學某師奶話齋, 暈左喺公司都冇人知.

佢啱啱又入左廁所好耐啦...都唔知會唔會又攪到黐立立???

估唔到我輕描淡寫講左一個小小問題出黎, 某d人聽完會加鹽加醋四圍講, 講到好似大禍臨頭一樣. 我知佢地見過鬼怕黑, 但今次實在係神經質到過左火. 嚇到我老細佢老人家鼻哥窿冇肉啦~ 老人家唔嚇得家嘛....

中左幾千萬做乜好? 發下夢先~

Mailbox仲break緊

頭先個mailbox迴光返照左一陣, 收完一"炸"垃圾之後, 而家再次冇反應

返工唔知做乜最緊張出糧果位阿叔, 啱啱又卸左d嘢落黎, 哼! 我"counter-卸"番d嘢俾佢. 同我玩嘢丫嗱? 我奉陪架!

大粒佬駕到. 老細忙住護駕應該唔得閒理我啦卦? 最好佢當我透明.

下個禮拜要落井啦我...嚡.......

琴晚又發左個怪夢. 夢見自己喺一大堆衫度"抄"嘢, "抄"左好耐終於搵到了, 原來夢中既我喺度搵底褲....我仲記得條褲係鮮橙鮮綠橫間既. 呢個夢有咩含意???

又收/發唔到email

唔知要搶救到幾時? 有人催緊我俾野佢架...琴晚已經話urgent啦......

死得

忙住扮忙

扮 review files, 請勿打擾, 有事msn. 唔該唔該.

又星期一

條傻婆落選了, 唔好話我黑心, 又唔好話我馬後砲, 的的確確係意料中事. 不過唔緊要, 唔選港姐, 仲有亞姐...又或者可以入TVB做個二打六, 可能繼粥粉麵飯後會多四個柴米油鹽呢? 都不失為一個機會架~

睇左Pirates of the Caribbean, 神化得黎有劇情, 比第一集好, 期待第三集. 有d野幾過癮, 我估應該係特登. 食人族果度, 扮土人既除左黑人同棕色人種之外, 仲有d好明顯係亞裔人(Chinese?)搽黑個身扮既. 另外近尾聲時個海螺頭人甩左個頭時, 講既係廣東話. Flying Dutchman原來都有請外勞.

終於等到度度都大減價啦. 不過琴日行左陣都係乜都買唔到. 點解街上既人十個有起碼八個都拎住一袋二袋? 係d人係又買唔係又買, 定我太揀擇?

唔知係咪睇得太多變態漫畫, 成晚發埋d奇奇怪怪既夢, 瞓醒好似冇瞓過. 等我搵日整理下我發過既怪夢, 加d鹽加d醋, 寫番本奇情小說. 我覺得會比Stephen King更詭異, 比伊藤潤二更變態, 比倪匡更怪誕, 比赤川次郎更縣疑...

伊藤潤二

"柄"埋自己喺屋企刨左好多伊藤潤二漫畫. 夠變態, 啱我~

立立亂

Al-Qaeda 又有新攪作! 睇新聞 Heathrow 倒瀉蘿蟹, "鄧"d旅客無奈.

中東果邊仲未玩完, 轉個頭呢邊又恐怖襲擊喇.

人禍之外仲有好多天災, 颶風地震海嘯乜都齊, 應該地球氣數已盡. 可能俾瑪雅族撞中左, 2012年世界沒日了~

多得溫室效應, 水位年年上升, 遲早浸晒成個地球. 啱啦, 所有生物都係由水中開始, 滅亡時咪死返落水度囉.

不過咁, 世界沒日前我地都仲要食飯, 仲要搵錢....睇個勢美元有排弱, 我d澳幣可能六蚊有望. (得好少好少, 早知買多d!)

又落雨

再一次打唔成風.

今日又落雨.

老細唔返.

我在office發呆中.

(係咪有古龍feel?)

食左個"deli蕃薯"五蚊 blueberry muffin做早餐. 一路食一路咬到蛋殼. 五蚊就食到一個鈣質豐富既早餐, 抵到爛, 值得高度表揚.

親愛既Allison好有心, 喺日本買左"金運"護身符俾我, 真係好多謝佢. 神婆即係神婆, 連我發錢寒都知. 我已經掛左喺當眼處, 睇下幾時中幾千萬.

下爬生左粒瘡, 耳仔又生左粒瘡; 牙肉有d痛, 喉嚨又有d痛. T小姐....你估點解呢下?

琴晚失眠

而家眼瞓到有幻覺.......

星期二檔案

巴閉啦d中年阿叔, 幾廿歲人, 生日要攞兩日假, 仲講到明唔睇email. 我唔會幫佢做野架, 佢又冇交帶落, 我咩都唔知架.

有個女人一早就發神經. 呢個冇common sense既阿婆三日唔埋兩日就腦閉塞, 等我返黎早餐都未食就要吋人. 煩! 好心佢得閒就燉d豬腦補補.

阿婆發完神經又到個未老先禿發雞盲. "TW"同"PRC"邊忽似? 咁都可以撈亂?! 仲要同我死撐! 未死過!

幾慘丫, 一早返黎就要應酬兩件高能人士!

七月十四

今日鬼節, 呢排夜晚都成日見人燒街衣. 其實呢d野係邊個發明?

唔知我死左之後有冇有心人拜下我燒下野俾我呢? N年前印度神婆最勁, 望下我隻手就講得出我係短命種. 果時都係得啖笑, 但後來幾個神棍加紫微斗數仲有個聽聞好靈既算命師傅都係咁講, 應該都有九成準. 如果屬實的話, 快則三年, 慢則廿幾年. 點都係過左一半有多架啦.

回顧過去, 喺喝倒采聲, 侮辱, 驚恐同失望中成長, 呢世人都幾失敗, 實在冇咩值得留戀. 唯一擔心既, 個天一向慣性同我過唔去, 都未必會俾我去得安安樂樂, 分分鐘玩我幾年唔俾我"速戰速決". 係既話, 我希望至少個醫生靚仔少少得唔得? 唔得既話, 迷迷糊糊咁去又得唔得? 我怕痛...

諗諗下, 都唔係完全冇牽掛. 我戶口果雞碎咁少記緊要"夠鐘"前洗乾洗淨先好去, 唔係死唔眼閉.

投降

煩死人啦, 我得一對手架咋, 老細們放過我啦...................

橫風橫雨

頭先靜左一陣, 而家個天好似黑左又大風左.

今朝先勁, 大風到差d極速由斜路頂碌落電車路. 琴晚就成晚嘈到冇得瞓.

不過8號無望架啦, 個市上緊呀大佬, 係掛都過左4點先啦. 但係過左4點又掛黎把鬼?

有野做. 閃.

一號波

個風吹海南島, 睇死最多都係掛三號. 打風不成三日雨, 今個禮拜都唔洗旨意有得見太陽, 天氣同我心情一樣惡劣.

Prapiroon點解會譯做"派比安"? 怪怪地.

做野做到綁手綁腳. 幫銀行執藥, 多得位好合作既同事幫忙, 執黎執去都執唔齊. 睇黎有人好耐冇俾我鬧過個身好痕, 我成全佢, 幫佢止痕. 埋數又等了又等都係"就得". 唔知就到幾時. 仲有件年紀一大把淨係識出糧野就唔願做既老油條, 耐唔耐整d蘇州屎我執下.

究竟想點???

頭痛

東主頭痛, 詐死中, 勿念.