地震

26號, 冇禮物拆又冇得打boxing, 仍病緊既我全日在家發吽豆. 呆坐到夜晚八點幾, 突然全身震動, 初時仲諗係咪自己病到發"tee騰", 但見地上面把風扇都喺度搖下搖下, 歷時三十秒左右, 跟住冇幾耐又震過, 不過呢次冇咁勁.

我一時意識唔到發生乜事, 傻更更喺度"un"張梳化, 研究究竟係我震定間屋震. 忘我地在un時, 某君爆完石出黎, 見到我就話, "玩 joba 呀?" 我突然諗到"地震"兩個字, "我諗頭先地震!" 但係某君話佢乜都feel唔到.

繼續望住電視發呆, 冇幾耐果然證明我係啱既, 台灣地震!! 某君一臉狐疑話點解佢完全冇"感動", 超, 緊係啦, 佢爆緊石, 夠晒地動山搖啦 , 再震勁 d都唔會覺啦.

地 震過後好大鑊, 呢幾日都網絡便秘, 超級唔方便, 上唔到msn, skype又會無神神自己offline, hotmail, yahoo mail, gmail全部唔洗上. 好多web sites都去唔到, 一係就超慢, 反而個八婆網she.com似乎全無受影響....

幾時先正常番?

放假先黎病, 個天明玩我

22/12

公司瘋狂派對過後, 我多左個hifi. 拿邊個想要快d出聲呀下, 千五蚊即放!

23/12

食完晏走左入赤柱避靜. Tea緊時已覺喉嚨隱隱作痛, 頭重重腳步浮浮, 唔理咁多繼續週街逛. 點知越夜越唔妥, 到晚飯時間仲有埋發冷作嘔癥狀. 唔掂!

唔係好想食西藥, 走去相熟醫師處, 哼, 摸門釘! 無奈去西醫診所又排長龍, 攪錯呀... 唯有先返屋企夜d先再算, 經過街口中藥房, 咦? 原來呢度都有個中醫.

反正阿醫師拍烏蠅, 算啦就睇佢. 診症完畢, 執藥個哥仔瀟灑地倒大堆怪蟲落包藥度, 折墮囉要食曱甴?! 執藥哥仔, 醫師同某君同聲糾正EE哦哦吟吟沈沈既我, "蟬殼黎架", 某君仲加多句"低能", 發燒燒到懵下懵下既我已冇還擊能力.

24/12

零晨時份, 發高燒忽冷忽熱喉嚨劇痛週身骨痛頭痛欲裂坐又唔係瞓又唔係, 辛苦到想call白車. 掙扎到天濛光, 近乎虛脫情況下入睡.

狀態極差下被迫取消上街念頭. 黃昏時間稍為冇咁謝, 陪某君去捐血(真係好節目). 跟住匆匆在foodcourt食飯後逃離洶湧人潮返家煲碟.

今年既重頭節目又係煲碟....

平安夜, 果然好平安.

Holiday Mood

今日完全冇mood做嘢啦, 一心諗住返黎等開party. 點知一開mailbox, 又有d死人urgent CEO requests, 頂....

不過仲未開始抽獎, 就已經收到有心人寄黎公司既禮物一大份, 好開心!

希望驚喜陸續有來, 哈哈~

我的聖誕

幼 稚園時, 年年X'mas都有個歌舞劇表演, 題材永遠只有一個: 耶穌出世, 三王來朝. 各就各位上台企好, 跟住大夥兒柴娃娃唱首歌, 收工. 當年肥嘟嘟呆呆鈍鈍既我, 每年被分派既角色都係揸住碌棍黐兩隻護翼, 棟喺最後排唔郁既可愛小天使. 不過, 愛靜靜起革命既我通常都會恃住身高優勢, 再特登舉高d碌神仙棒搶鏡.

小學, 臨放假前實會捉我地去禮堂睇由同學演出既話劇. 同一個主題, 真係悶, 但係上到小學高級少少, 有對白講既. 呢d嘢一定冇我份, 我永遠係喺觀眾席發呆既其中一個.

咁小時候老豆老媽子都會帶下我地去睇燈飾影下相. 不過講真, 我由幾歲開始都唔知聖誕燈飾有咩好睇, 我淨係知好Q多人, 好Q迫, 返屋企算啦大佬!

中 學時代X'mas對我黎講除左放假外都已經冇咩大意義. 去到澳洲, 人人放假慶祝, 我就貪個"double & a half" 24, 25, 26/12全部返朝10晚10, 買一盒薯仔沙律下晝食一半, 夜晚食埋另一半. 人地同我講Merry X'mas, 我會覺得佢喺度潤緊我.

同某君拍拖後, 第一年好似係去左行山, 都有收禮物, 但之後極度浪漫既我地都懶得再買禮物懶得做任何嘢, 又費事同人迫, 多數都係茶餐廳解決跟住返歸煲碟. 有一年去左食齋, 成間齋舖得我地兩條茂利. 幾威, 包場!

結婚後, x'mas假期就在家不停約會周公子. 一係返老媽子度阻住晒兼黐飲黐食.

某君有日發口痕話出年唔好留喺香港咁悶, 不如去歐洲過白色聖誕. 好丫我聽住先!

總括黎講, 由細到大我喺呢個所謂普天同慶既日子裡都過得非常無聊. 幸好入左而家呢間公司年年有個party俾我發下癲, 又有得抽獎. 而家既x'mas終於有d嘢期待下.

期待聽日又抽個電話, hehe~

冬天終於來了

身心疲累, 加上天氣寒冷, 今日捲住張被賴死至差不多下午茶時間.

上完yoga, 居然腳震, 腰好痛, 以前都未試過. 可能我真係老啦.

百無聊賴喺街四處遊蕩. 都話天氣轉變係會刺激購物慾架啦, 貪得意追下潮流買左幾對leggings. 不過都唔知有冇衫襯.

聽日又要北上, 萬般不願意但係人在江湖, 身不由己...

好想攞晒餘下既假期, 日日淨係瞓瞓瞓瞓瞓, 食食食食食.

反清拆天星碼頭?

唔睇新聞都唔知香港人原來咁感性, 拆天星碼頭竟然會攪出咁多風風雨雨. 我咁講可能會俾好多人鬧, 但我真真正正覺得班"保星"人士都幾野蠻, 香港仲有幾多地俾你用? d舊建築要拆都冇辦法. 果班友仔洗唔洗玩到咁激咁鬼肉麻兼肉酸?

講感情深厚既話, 以前d7層公屋相信都令唔少港人留低好多回憶, 唔通又唔好拆? 果d舊區重建拆晒d舊樓都好可惜架, 又唔好拆丫. 又另覓地點重建丫笨!

其 實有幾多人真係咁唔捨得個碼頭呢? 以香港人既一窩蜂荒死蝕底性格, 極有可能有超過一半都係人云亦云. 傳媒喺度加鹽加醋扇風點火, ABC君首先中招話好唔捨得好懷念, DEFG君急忙附和, 有d仲bit多幾滴馬尿出黎以證明自己真係萬般不捨. 話晒呢期天星咁紅, 唔講埋一份容乜易俾人話out? 情況令我諗起當年個個擔凳仔去排天光換麥當當隻硬膠Snoopy, 有幾多人真係咁鍾意隻公仔? 有幾多人其實係見個個都換, 唔換驚蝕底?

忽發奇想, 有一日政府話唔再用而家呢隻紫色圓咕碌垃圾桶, 要改第二隻, 會唔會有班熱血青年上街抗議, 攬住個垃圾桶lur地誓死保衛? 話晒日日見住咁多年喎, 有感情家嘛!

點解?

點解永遠未到月尾份糧就已經所餘無幾? 我都冇買過d咩
點解AIA仲未出票俾我? 追我交保費就咁急.
點解聖誕節一定要送禮? 條街好多人買嘢, 好難行.
點解條大脾好似越黎越粗? 我有做運動架噃.
點解咁快又星期一? 我都未瞓夠.
點解d細路係又嗌唔係又嗌? 今朝搭車嘈到我冇得瞓.
點解呢排成日有人打錯我個電話?
點解屋企個地拖完冇幾耐又污糟?
點解地利蕃薯杯奶茶咁劣?
點解由中環transfer張credit card去北角, 要成五個工作天?
點解過左五個工作天, 佢又話要等多三個工作天?
點解我又唔記得帶電話?

咁就三年

星期四, 老媽打黎, "喂你星期六點慶祝?"

我, "慶咩?"

老媽, "...你...三週年...."

哦, 謎底終於解開啦, 唔怪得知我叫某君weekend自己去玩, 我去facial, shopping, 上yoga, 佢嘟到個嘴咁長...

結果, 喺全無安排之下, 我地去左麻布茶房"慶祝", 食埋甜品連加一$190, 經濟又實惠. 仲有180度無敵海景, 幾浪漫.

一到年尾就閉翳

仲有廿日就到X'Mas, 不過我又唔係教徒, 穌哥生日其實唔係好關我事. 當然, 有假放我實放. 至於節目嘛, 除左公司個 party之外都冇乜特別安排, 相信大部份時間都係同周公子dating.

一到年尾洗費就多, 兩個垃圾會既會費, 保險, 稅, 仲有過年上繳老媽子幾皮嘢. 今年粗略估計開支逼近10萬. 一諗起就心情惡劣, 仲講乜鬼merry x'mas丫....

邦民幾號電話?

一週大事回顧

星期一:

1. 1650居然比佢既正常上班時間早一粒鐘蒲頭, 又比正常下班時間遲半個鐘離開
   
2. 唔舒服, 醫師話我濕熱, 要戒口
   

星期二:

1. 深圳一日遊, 終於有時間見下個女
2. 1650失左蹤

星期三:

1. 惠州兩天遊開始. 於A領隊帶領下向惠州出發, 有團友興奮過度鞋都爛埋
   
2. Interview
3. 六蚊原來有18隻餃子, 食左好多
4. 酒店隔音其差, 床極硬, 瞓得好辛苦
5. 1650繼續失蹤

星期四:

1. 早餐食左兩隻蛋, 唔知有冇蘇丹紅?
2. Interview
3. 開會做旁聽
4. 再開會做旁聽
5. 再再開會做旁聽
6. 返深圳, 食湘菜, 好辣但好正, 將醫師既叮囑完全拋之腦後. 飲飽食醉後, 兩天行程完畢
7. 1650依然失蹤

星期五:

1. 發呆, 行黎行去, 發呆發呆, 行行企企簽下嘢, 發呆發呆發呆, 教人做嘢, 發呆發呆發呆發呆, 等收工
   
2. 1650照舊失蹤

回顧完.

週末報告

星期六:

(一) 蠢人

蠢人洗幾廿萬買左架二手歐洲名車. 個個話佢正蠢仔, 咁既價錢買架全新日本車好過啦. 蠢人一副你有所不知既口吻答: 呢架仲快過法拉利喎! 哦, 係咩? 但係呢度係香港喎, 好多車好多人好多燈位架喎, 俾你快過火箭又點? 紅燈你唔停? d人過馬路行得慢你車死佢?

蠢人一個月洗喺"快過法拉利"身上既錢, 夠供樓啦. 就算唔買樓, 供個基金都好. 不過學我以前個刻薄 Econ. lecturer話齋: 有錢人諗點樣錢生錢, 窮人永遠淨係識諗點洗錢. 唔怪得蠢人做咁多年嘢又唔洗養家, 至今都仲係身無分文.

(二) 惡頂男女

夜晚口痕去食消夜. 冷鋒講黎講去仲未到, 但就俾d另類冷鋒嚇親. 坐我隔離枱一對痴男怨女, 橫睇掂望都應該戒左奶一段不淺既日子, 偏偏講嘢仍似小朋友牙牙學語, 全程用BB聲講埋晒d "湯湯", "雞雞", "肉肉". 聽到我毛管全數起立向佢地兩個致敬, 草草食左個麵就逃離現場.

事後檢討, 阿媽成日叫我唔好咁憤世嫉俗, 佢有道理, 我確係對好多嘢都睇唔過眼. 以後我遇見呢挺懷疑智障人士時, 會嘗試用更多愛心去包容體諒, 而唔係內心咒罵.

星期日:

瞓--->再瞓--->繼續瞓--->仲瞓--->瞓呀瞓--->瞓瞓瞓瞓--->食--->瞓瞓瞓瞓瞓瞓瞓...

一日食一餐, 省時又夠慳.

風雲色變

今日好小心 check 左回鄉證已經擺左落袋, 一心諗住返公司hea一hea就北上"探女".

出門口時, 由屋企行到巴士站短短5分鐘路程, 睇住個天好似用 dimmer 慢慢較暗一樣, 跟住黃豆咁大粒既雨水就滴落黎.

永遠落雨都冇帶遮既我, 一心諗住返公司借把遮就閃. 點知一返到公司電話就響, 老細 order 我留低改"畢直", 邊樹都唔准去.

一 睇個"畢直", 火都黎埋, 第一, 我用左個錯既表黎做嘢. 原來兩星期前有個 revised & corrected template sent 左出黎俾某人, 個個都以為某人已經分晒出黎俾我地班二打六, 但今朝先慶過火屎地發現, 冇人收過呢份嘢. 第二, instructions 唔清唔楚極易令人誤會, 但寫 instructions果條友當然唔會認, 只會話我地戇居.

做完改, 改完又再做, 攪到我成個朝早連電話都唔得閒聽.

雖然又谷氣又忙亂, 但係我都好慶幸今日留左喺香港, 咁鬼大雨走上走落, 一d都唔過癮.

學人煲日劇

空氣"好"到嚇死人, 索性匿喺屋企.

無聊之下睇左之前令細T喊到眼腫既"一公升的眼淚". 我果然係鐵石心腸, 喊唔出.

呢套戲講出現實係幾咁殘酷, 呢個世界根本就容不下身體有殘障既人, 你係殘廢就係殘廢, 你幾努力幾勇敢去面對都好, 人地表面幾幫忙又好, 事實上你就係阻住地球轉. 唔好意思, 針唔拮到肉真係唔知痛, 你有幾慘幾痛苦人地冇可能知, 同情同幫忙亦都有限度, 去到某一個地步, 人地難免會覺得被你拖累.

劇中班同學仔都已經好唔話得, 但幫你係人情, 唔幫亦係道理. 冇理由為左幫你而影響自己, 咁樣唔係叫做有同情心, 係笨. 女角終於唔想累街坊離開學校時, 同學都似乎依依不捨, 仲追出校門外, 但始終冇人開口叫佢留低.

好似好無情, 不過現實就係咁.

好無聊地又諗下如果自己有日不幸殘廢 (touchwood!), 有幾多個"朋友"會仆心仆命幫自己? 哈, 我諗一個都冇.

我有時發夢都仲會夢見有人同我講呢句說話, "你最好就唔好病, 你病就係累我!"

唔, 收到收到, 第時唔覺意惹左d頑疾上身, 都係盡快自行了斷, 一係自己揾地方柄埋等死, 千其唔好累人.

講開又講, 柴犬戇居居咁都幾得意, 好想養返隻.

再談母校

居然俾我揾到老虔婆張相, 要好好收藏. 出trip擺床頭可以辟邪.

又居然俾我老豆揾到我F.3時張class photo. 17年前啦..果陣幾鬼後生...

母校佔地八畝, 頭幾個月成日揾唔到課室. 最深印像係老虔婆控制中心 Glenrock House. 成日經過都見老虔婆用凌厲眼神由 office 向外啤, 見到就心寒. 另一深印像地標係有爆漿無花果飛墮既巨型 fig tree. 仲有Packer Theatre, 有一張凳上面刻左我個大名 (人地買起成行凳, 我得一張...妖....).

果時冇咩好嘢食既我覺得dining hall既cheese cake, tuck shop既apple pie同grilled cheese sandwich 係天下美味. 第二度食唔返, 離開學校咁多年仲好懷念果種味道.

最鍾意既老師係放學留低教我古詩既 Mrs. Robinson, 雖然佢只係教左我一個term. 考mock exam時係佢監考, 點知過左個weekend, 星期一返學就收到佢既死訊, 第一次感受到人生無常.

正正經經讀書冇我份, 亂寫亂作同畫公仔最叻. 有首詩有幸入選校刊, 仲有d畫作如冇俾人掉左既話, 應該仲留喺學校既. 冇咩其他貢獻, 混混噩噩呃呃騙騙就讀到畢業.

同以前d同學仔失晒聯絡, 以前未興email又未興手提電話, 畢業前好老土地將友好 contacts 寫喺本簿仔度, 後尾搬屋唔見左. 人又懶, 搬離東區就再冇返過去母校, 有機會經過都係過門不入. 估唔到最近一次返去, 都依然係過門不入!

好掛住果時既老死們, 由其是臭味相投既R&S, 唔知佢地而家點?

眨下眼咁多年囉, 連老虔婆都退埋休囉, 我都老囉.....

VI-ET-ANIMO

見Minna小姐講佢間母校咁感觸 , 心血來潮上網search下, 俾我揾到﹕http://www.ascham.nsw.edu.au/

1886 年創校, 母校係有名虐待年青女孩子既 slaughter house. 而家諗諗下佢絕對可以成為幫香港"逼科"訓練死士既南半球支部. 喺個website佢貫徹一向有麝自然香既態度, 樣樣只係講下皮毛, 但當然唔會忘記吹虛下佢地考公開試戰績有幾彪炳. 而事實上喺呢度畢業既舊生佔大多數做左醫生律師. 不幸地我兩樣都唔係, 醫生就真係成日見既...

自古嚴師出高徒, 而家雖然成績依舊驕人, 但據我所知已經唔可以見返當年老虔婆統治下既輝煌成就. 老虔婆唔知點? 七十幾啦喎, 收左火未?

當 年除校歌外我地多會一邊苦笑一邊暗唱"Just another manic Monday"...逢週二就係交功課日, 功課之多足以令心靈弱小之輩發神經, 我既紀錄係一星期交12篇唔少過二千字既文章, 再加為數不少既數理問題. 由於我係"臨急抱佛腳"既忠實支持者, 通常去到星期一就要喊. 幸得母校栽培, 我練就唔讀書都寫幾千字既本領. 上到U呢項技能令我在文科科目永遠可以不費吹灰之力就坐C(redit)望D(istinction), 竅門係"字多睇死人", 其實我五, 六個paragraphs 入面都係兜兜轉轉講黎講去果堆垃圾...

數理方面, 由我打破"中國人一定數學叻"呢個定律, 最低紀錄係30分. 果時條數佬心理變態, mark親功課都萬七咁多條題目, 見到都頭痛! 幸好非常精叻既我識得做頭做尾中間漏一d, 咁就唔洗做到氣咳. 魔高一丈, 我既詭計從來冇被發現.

校 服絕對經典, 泥黃色背心裙白恤衫加啡色Clarks綁帶鞋. 仲記得去買校服時條鬼婆講左句"you're not supposed to look good in it", 貼切地形容著起果套嘢有幾樣衰. Senior years (yr 11 & 12)校服有d唔同, 泥黃色直身裙, 領同袖口有紅藍兩條邊, school colours也! 上到yr11, 冬季校服條呔唔同款, 但我抵死地依然打返junior high條校呔搏晒老懵, 又出奇地喺校規森嚴既統治下, 從來冇俾人話過. 相信我扮好學生實在扮得太神似啦!

我諗我係創校百幾年以 來, 第一個夠膽死連畢業禮都懶得出席既學生. 果時心諗, 公開試都考埋, 都唔係佢既人啦 , 我係唔鍾意返去佢奈得我何? 又俾我料事如神地估中, 確係冇人打去屋企刮我. 而家諗返起, 連一張畢業相都冇實在係有少少遺憾... 好彩我臨撤退前順手牽羊撻左本school song book留念...

睇返個校徽, 學校motto係"Vi et Animo", "with heart & soul". 我居然喺離開母校14年後同樣地用拉丁語系既文字命名個blog, 意思為"no soul". 潛意識我仍然在同母校攪對抗???

腳痛

尋日一覺瞓醒腳痛, 腳背隱約有腫脹跡像, 唔理, 我要去街!

悠悠閒閒歎左個lunch, 跟住去修甲, 幾闊太feel, 哈哈. 但係隻死人腳越黎越痛. 唔理, 我要行街!

行下hea下, 夠鐘上yoga, 腳痛依舊. 都係唔理, 照上!

換衫時除左條長裙先望到個腳背腫左粒大豆咁上下size既波波出黎, "禁"落去會痛. 呢個情況以前要著suit+高踭鞋扮斯文既日子試過, 係水腫. 點解無神神會水腫??? 唔理, 一場去到上左堂先算.

上堂時偏偏要我地跪地扮入定. 隻腳痛到標眼淚! 幾經辛苦捱完個幾鐘, 一望, 腳上粒嘢已經由大豆進化成龍眼. 唔掂, 都係返歸穩陣.

跛下跛下返到屋企, 醒起拎左枝愛心涼茶返去未飲. 拿拿林隊晒成枝諗住可以幫助排水. 點知...飲完碌涼茶剛剛半粒鐘, 個肚好似打龍捲風一樣, 急忙衝去排毒...

一個鐘頭之後, 發軟蹄撻落床失去知覺...一覺扎醒時已經11點幾, 腳上龍眼又一次變回大豆. Good, 唔洗做跛妹.

夜晚為保險我"晾"高隻腳瞓, 今朝雖然隻腳仍然隱隱作痛, 但已經唔腫. 由於瞓左幾粒鐘, 我到四點幾先有睡意. 今朝搭車時眼瞓之餘又肚餓到死, 醒起自己原來尋晚唔記得食飯.

唔通真係著返兩日高踭鞋就出事??? 唔係好高咋喎!

睇menu 學英文

今日收到既, 獲益良多.

大家要努力學習英文, 提高競爭力.

當中我最欣賞 Fuck to fry the cow river 呢句, 最近呢樹狂牛肆虐, 夠晒應景.

烏冬 = Black winter, 有創意兼詩情畫意, 果然有五千年文化係非同凡響d.

我地呢d凡夫俗子一定要好好學習, 提高自己既水平, 如果唔係永世都同唔到d高等生物溝通.

WARNING

我讀幼稚園同小學時係乖到無倫既好學生, 守規矩勤力讀書又對師長有禮, 年年考十名內.

上到中學, 潛藏既壞因子發作出黎, 開始變質, 亦開始冇心機讀書.

F.2 果年, 收到人生第一個warning, 話我上堂發夢, 又掛住傾計.

十幾歲開始出黎社會打滾, 自問未算係好好既員工但份內事一定做妥. 但都曾經因為"辦公時間去廁所次數太多", 而俾變態老細警告.

估唔到"廁所"居然又再一次令到我被警告.

為左記念呢個咁特別既日子同呢件咁出位既事, 特立此blog為記.

如果卅年後仲未死得去, 無聊可以揾返出黎笑下.

我諗, 我以後見到某人都會想笑.

CASE CLOSED

再頌乳牛

太平洋乳牛近來頻頻發功, 全力以赴, 做到最好, 將 production capacity 推到頂點, 生產量已可達一日三至四次. 在晨早流流未有 input 之情況下, 都可以從容排出為量不少之 output, 實在可喜可賀, 恭喜恭喜!

由於近日乳牛產量大增, 一間生產室已經唔夠用, 乳牛唯有征用埋另一間. 一班烏合之眾有需要進入生產聖地時, 敬仰之心猶然而生, 不其然屏息靜氣, 紮穩馬步, 不敢鬆懈, 以防污穢之鞋底會沾污地上殘留神聖產物. 更會速速完事速速逃, 以免吸入過量聖物氣味"唔受得", 暈倒當場失禮街坊. 日子有功, 托乳牛之鴻福, 眾人有望成龜息氣功高手, 兼有驚人平衡力及極速"辦事"能力, 對經常行走江湖訪遍大江南北核突廁所之輩, 如小人我, 來講, 委實大派用場, 獲益良多.

觀乎生產室殘留痕跡, 及幸運目擊者所見所聞, 可想像生產情況時而如潺潺流水輕瀉而下, 又如細雨紛飛, 滴之地上鏗鏘有聲, 清脆玲瓏; 大詩人白居易一句"大珠小珠落玉盤", 正好形容情景之優美動人. 產量多時, 氣勢滂薄如飛瀑傾瀉, 又如神龍擺尾, 白浪激濺牆上地上, 過後情境有如南亞海嘯蹂躪後之布吉, 震撼之強, 令人久久不能忘懷.

一班烏合之眾對乳牛又敬又畏, 既羨且妒, 每日茶餘飯後都要就乳牛之壯舉高談闊論一番, 仿如著了魔, 中了降. 乳牛之人氣急升至全太平洋農場之冠, 連一向得罪人多既一隻羊同一舊糞都要靠邊站, 實在要送乳牛一個"服"字.

再次嚴重警告乳牛fan屎, 此文章純為宣泄對乳牛之景仰愛戴, 都係呢度講呢度散, 如有資料外洩, 本人定必抵賴到底.

報導完畢.

終於搬完

執屋執左四晚通宵, 人都癲.

都話d嘢收收埋埋唔覺, 一執出黎就好多架啦, d人又唔信! 攪到兩日內由斜路頂跑到斜路底, 斜路底又跑返去斜路頂幾十次. 半夜三更仲拖住十幾大袋嘢喺路上掙扎. 好彩咁近, 遠d既話咁搬法我已經痴左線.

搬遲d唔知點算, 我既前度惡鄰由前日開始將行動升級, 喺佢屋內傳出既除左係酸縮味同尿味之外, 仲加左濃烈既...屎味.....我搬嘢落樓一路鎖門一路作嘔. 戥我前業主慘, 佢間屋都幾難租得出, 除非租俾個嚴重鼻塞人士.

尋晚辛苦到撻左喺梳化唔識郁. 諗住身心皆疲, 實瞓得著, 點知都係碌到差唔多天光先瞓. 我個難得既好夢發左一半, 就醒左.

呢度原來唔洗較鬧鐘, 7點正下面公園就響起嘈死人音樂, 一班公公婆婆跟住音樂做早操...

忙裡偷閒

喺度執屋, d嘢收收埋埋好似唔係好多, 執出黎先知原來我地儲埋鬼咁多垃圾.

我做嘢實在係非常心散, 執執下望到後面山有隻狗, 即時停手對住個窗好似癲婆咁"殊"左佢好耐. 阿狗原本已經捲埋一舊諗住瞓覺, 點知俾我嘈住, 佢好無耐咁啤左我一陣, 跟住走左lu.

再執一陣再次冇心機, 走左去新屋度下窗廉位, 食完飯返黎又執一陣, 見到部腦又忍唔住上網...

今日既心理測驗係: 妳有什麼特別可吸引男孩子呢？

1. 妳 的 眉 毛 粗 或 細 ？
細 － 去 2 粗 － 去 3

2. 妳 喜 歡 既 圓 又 大 的 月 亮 抑 或 彎 彎 的 月 亮 ？
圓 又 大 的 月 亮 － 去 3 彎 彎 的 月 亮 － 去 4

3. 不 笑 的 時 候 ， 妳 的 嘴 巴 大 不 大 ？
大 － 去 5 小 － 去 6

4. 妳 喜 歡 哪 種 顏 色 的 Ｔ 恤 ？
紅 色 － 去 5 藍 色 － 去 6

5. 曾 經 有 男 人 回 頭 望 妳 的 經 驗 嗎 ？
有 － 去 6 沒 有 － 去 7

6. 妳 會 因 為 一 本 書 在 市 場 上 很 暢 銷 而 買 回 家 看 嗎 ？
會 － 去 9 不 會 － 去 10

7. 在 回 家 路 上 ， 突 然 有 人 下 車 說 要 送 妳 一 程 ， 妳 會 ？
上 車 － 去 9 拒 絕 － 去 10

8. 你 喜 歡 跟 下 列 哪 一 種 男 性 戀 愛 ？
年 紀 大 五 年 以 上 的 男 性 － 去 7 年 紀 相 若 的 男 性 － 去 11

9. 妳 的 朋 友 多 嗎 ？
朋 友 很多 － 去 10 朋 友 很 少 － A 型

10. 妳 喜 歡 怎 樣 過 生 日 ？
一 大 班 朋 友 慶 祝 － B 型 與 男 朋 友 兩 人 慶 祝 － C 型

11. 妳 覺 得 自 己 是 個 愛 嬉 戲 的 人 嗎 ？
是 － C 型 否 － 去 12

12. 心 情 普 通 的 時 候 ， 在 上 班 途 中 遇 見 同 事 ， 妳 會 主 動 跟 他 打 招 呼 嗎 ？
會 － D 型 不 會 － E 型


A 型 : 勝 在 溫 柔 、 弱 質 纖 纖
妳 弱 質 纖 纖 ， 有 氣 概 ， 男 孩 見 著 妳 ， 便 會 萌 生 一 股 憐 香 惜 玉 之 心 ， 正 所 謂 「 我 見 猶 憐 」 。 但 妳 不 善 表 達 ， 其 實 不 妨 輕 聲 地 說 幾 句 話 ， 通 常 是 會 得 到 不 錯 的 回 應 。

B 型 : 隨 心 而 行 、 飄 忽 灑 脫
男 人 常 說 女 人 善 變 ， 漸 漸 地 ， 這 缺 點 卻 成 了 特 徵 。 女 人 不 善 變 ， 似 乎 不 能 成 為 一 個 百 分 百 的 女 性 ， 妳 有 許 多 東 西 都 能 放 得 下 ， 灑 脫 且 帶 點 善 變 的 處 事 ， 是 最 為 吸 引 人 的 地 方 。

C 型 : 冷 酷 的 時 代 女 性
男 孩 總 覺 得 妳 的 面 孔 遮 著 一 層 面 紗 ， 因 此 只 有 思 想 型 的 男 孩 才 會 有 耐 心 接 觸 妳 。 老 實 說 ， 妳 並 非 萬 人 迷 ， 但 固 執 倔 強 的 個 性 ， 卻 使 某 些 男 性 為 妳 傾 倒 ， 因 為 他 們 覺 得 妳 是 世 上 的 「 稀 有 動 物 」 ， 有 型 且 有 性 格 。 請 繼 續 保 恃 吧 。

D 型 : 善 解 人 意 、 開 朗 活 潑
妳 開 朗 又 善 解 人 意 ， 身 邊 不 乏 男 孩 追 求 。 妳 社 交 能 力 高 ， 懂 得 如 何 與 人 溝 通 ， 亦 完 全 懂 得 運 用 妳 的 本 錢 及 魅 力 。 妳 的 魅 力 已 經 發 揮 得 相 當 好 ， 誇 張 一 點 來 說 ， 妳 應 暫 時 收 歛 鋒 芒 ， 否 則 ， 妳 將 分 身 乏 術 ， 難 於 應 付 「 裙 下 之 臣 」 。

我係C型, 哈哈哈哈~

心理測驗

朋友仔最近迷上左玩心理測驗, send左好多俾我. 一見下面呢個就好笑, 因為我真係遇過咁既情況...

你是哪一種優秀人才?
深夜，由車站步行20分鐘回家，家人已沉睡，門和窗都上了鎖，敲門敲窗均無回應，要爬窗進去也不太可能，偏偏手機又沒電了，要想打電話，就必須原路返回公車車站去打公用電話。猶豫之間，站在樓下觀望了一陣，見二樓的窗口似乎有一絲亮光。如果是你遇到了這樣的事，你會怎麼做？仔細考慮哦，你的做法可能也反應著你的領導才能哦。

題目：考慮之後，在下面五種決定裡，你會選擇哪種？

A、想辦法弄壞門或窗的鎖，或用鐵絲之類的想辦法把門打開
B、脫下鞋子扔向二樓
C、返回車站打電話
D、乾脆到酒吧去喝一杯，看那裡能不能打電話，不行就喝到天亮
E、拼命地敲門和窗


解說:

選擇A：想辦法弄壞門或窗的鎖，或用鐵絲之類的想辦法把門打開　　
屬於具有一技之長型。你有專業知識，可提升素質，在工作中容易出人頭地。爭取早日變成出類拔萃的專家吧。

選擇B：脫下鞋子扔向二樓　　
屬於勇於挑戰型，你具有創造性的精神，可以考慮去自己創業，老給別人打工你真的受得了嘛？

選擇C：返回車站打電話　　
屬於企業人才型，你重視人際關系和團隊工作，認為應該與企業共存共榮。你也許就是一個優秀的管理人員吧？

選擇D：干脆到酒吧去喝一杯，看那裡能不能打電話，不行就喝到天亮　　
屬於運動型人才，你重視新點子，偶爾會去冒險。可以考慮去做做攝影記者、戶外運動等刺激的工作哦。

選擇E：拼命地敲門和窗　　
你缺乏領導才干，總是以一種方法重復同幾件事情。不過，簡單的事情也要有人做才行。在企業裡，你也會成為一個優秀的員工的。

我當時做既就正正係除鞋向住二樓隻窗死命掟上去.

原來我適宜創業???

好多鬼呀~鬼呀~~

咪攪錯呀, 10月31號係萬聖節...前夕咋. 聽日先係 All Hallow's Day!

幾時開始香港人都興扮下鬼趁下熱鬧? 喺銅鑼灣食完飯行左個圈, 成街哇鬼. 細路仔就話攪下屎棍去 trick-or-treat 啫, 大人大姐扮到鬼五馬六週街行, 有咩好玩? 可能後生仔會覺得好過癮, 我呢d心境老邁既阿婆真係冇咁好閒情逸致去攪攪震. 我只對有假放既節日有興趣.

又黎想當年. N年前仲係青春少艾(但心境早已老邁)既我, 唔洗返學既日子就被困"死火 Video"看舖. 某年Halloween, 我一條友喺間舖仔打完一個又一個喊露等收工. 卒之等到夠鐘, 剛想落閘就有隻彊屍仔唔知由邊樹彈出, 呱呱嘈問我要糖.

我邊有糖? 又唔係好想攞舖頭d朱古力俾佢 (幾蚊條架大佬, 入我數架), 彊屍仔又滿臉期待唔肯走, 我幾經辛苦喺個袋入面左"巢"右"巢", 先揾到條責到扁晒既綠箭出黎, 問佢要唔要. 彊屍仔接過後, 一臉狐疑地拎住條香口膠一邊打量一邊行遠, 口中念念有詞...

呢隻"鬼"算唔算遇"人"不淑呢?

今個weekend好忙碌

我記得細個時到重陽都已經涼涼地, 但禮拜六果日去拜山, 著住件冇袖衫都熱到痴肺. 行到目的地, 頭頂晒到出煙, 成個背脊濕晒. 究竟幾時先可以涼d?

卒之揾到地方搬. 都係豆潤咁細一間屋, 叫做大而家呢度少少. 佢全屋整過晒, 好企理新淨但係亦好貴. 我諗, 我有排都脫離唔到著三幾十蚊件tee既日子.

尋晚去食buffet, 當幫某君慶祝生日. 其實不嬲對自助餐興趣不大, 硬係覺得粗製濫造, 只重quantity不重quality, 我原本想去Landmark Mandarin間 Amber, 但某君同老媽子一鼻孔出氣話好耐冇食buffet, 好想食. 好啦, 為左滿足佢兩個"超煩"人士既願望, 食buffet囉 (仲好, 平d).

阿媽都仲會講句"d嘢幾新鮮", 某君居然話覺得"都係普普通通啫". 嘩, 佢d taste原來咁high, 我xyz佢丫! 我決定左, 下年佢牛一, 一於去----------------麥當勞開生日會!

今日終於有時間去剪下頭上既亂草, 坐喺度望住塊鏡, 差d嚇親自己. 死囉, 點解個樣咁殘?! 冇奶油架, 我瞓左成11個鐘啦喎! 早知咁樣衰去海洋公園揾份part-time扮下鬼啦!

請好員工難過揾老公

忙到廁所都唔得閒去, 連續兩日都攪到夜一夜, 尋日仲被困沙井成11點先返到屋企.

In 人 In 到口水乾, 日日問同樣問題 N 咁多次, 悶到抽筋. 當中都有幾個唔錯既candidates, 但係大家都俾外資企業呢個朵誤導左, 以為我地真係財鴻勢大, 居然同我獅子開大口要求多多. 以下為其中一個candidate要求既"基本"待遇:
1. 過萬月薪
2. Meal + housing + traveling allowances
3. 14個月糧加bonus
4. 每年起碼一次公司旅行
5. 員工保險(保障埋員工家人)
6. 10日有薪農曆年假 (要回鄉探親)
7. 有需要時公司可容許請多一兩個assistant幫手

嚇到我擘大個口差d唔識合返埋. 我諗住俾四千幾蚊咋喎. 你一嘢同我乘大三倍? Allowances? 公司旅行? 10日年假? 仲要學人收"靚"添? 咪玩啦大佬!

要求低d既, 有d連英文會計都未做過, 雖然車到天花龍鳳講到好似好勁, 但係你話我邊放心請得落?

而家叫做有一線曙光, 未知是禍是福, 又未知請返黎果個是龍是蛇, HR話不如幫我再揾一批人黎再In過, 下?! 唔好啦卦? 我搏一鋪算啦!

繼續霉

尋日出門時發現個門斜得好緊要, 已經完全鎖唔上, 唯有淨係鎖鐵閘. 某君曾經拆個門落黎, 嘗試裝返正個位, 但原來佢個門框根本就唔啱位兼上闊下窄. 試到滿頭大汗, 都係要放棄.

出得門口都已經一點. 計劃行程係去醫肚先, 跟住去睇樓. 搭地鐵時, 我唔知點樣隻手喺入閘機一掃, 即時一陣劇痛. 一望, 右手無名指指甲中間爆開左一條線. 好彩我做左gel甲, 面頭gel部份食左大部份既力, 自己指甲只係輕微斷裂. 我都唔明點解輕輕一撞會攪成咁. 今次真係唔去修補唔得, 而偏偏幫我修開甲個女仔又入左廠!

食完飯喺人山人海既銅鑼灣, 行到腳跛兼問到口水乾之後, 終於俾我揾到一間修甲舖可以walk in 補 gel nail. 咁冇理由做一隻手指, 緊係做晒十隻. 結果我搭地鐵fing一fing隻手, 就fing走左六舊水.

懷住勞鬼氣既心情, 走入號稱區內最大最多盤既地產公司, 問左幾個心水選擇, 唔係"暫時冇人放租"就係"啱啱早兩日租左". 心情再度跌落谷底. 之後佢介紹兩個單位, 算啦, 照睇.

第一間, 一入大廈大堂, 一個寒背阿婆拖住隻西施狗從更亭行出黎.
阿婆 (想斬人咁款): 你揾邊個架?
西施狗: 汪汪汪汪汪汪汪~~~
地產經紀: 睇樓呀阿婆, 打左電話俾你架.
阿婆 (都係想斬人咁款): 你唔係話朝早黎架咩? 等到依家先到 (E哦E哦E哦E哦...)
西施狗: 汪汪汪汪汪汪汪~~~
地產經紀: 我今朝冇揾過你喎, 可能第個呀?
阿婆: #$$%^&*@ (繼續E哦, 聽唔明)
西施狗: 汪汪汪汪汪汪汪~~~

呢度直程得啦, 保安夠晒嚴密, 隻狗見親人都吠到癲左咁, 阿婆惡死之餘仲識講外星語, 足以嚇窒一般毛賊. 阿婆E哦一輪, 慢條斯理拎左條匙同我地上樓. 上到去, 單位可以話四四正正既, 但最唔鍾意係日光日白都黑媽媽, 牆身又破破落落. 唔值佢講果個價囉.

落樓避過惡死既一婆一狗, 去對面馬路睇地產話"好乾淨企理"既第二間. 佢冇吹水既, 確係好乾淨, 但係個size同間酒店房差唔多, 實用率得六成, 死未? 好老實, 租呢度既話我不如租間套房算喇.

經紀佬見我地冇咩意思, 膚衍地話再聯絡就鬆人. 我地再四圍行, 問左一間又一間地產, 都係失望而回. 到將近日落西山, 入去最後一間, 個阿姐又話帶我地去睇一間佢"覺得幾好"既. 雖然已經不存厚望, 但都睇下啦. 咦? 終於俾我地睇到間似人住既屋啦喎, 唔係話非常好但係都已經有七八十分, 開埋水喉check, 唔係黃泥水.

心諗一天都光晒, 回個價俾地產. 阿姐即call業主問, 只見佢面色一沉, 然後一句"哦...咁好啦我同返個客講", 跟住收線. 原來業主見呢排同區樓價幾好, 諗住賣, 唔租啦喎. 佢問我地有冇興趣買, 唉, 真係苦笑, 有首期買樓我買左好耐啦!

行足一日又係得個桔. 個天究竟想玩我玩到幾時?!

忙亂, 無奈, 氣頂

星期四帶新同事過沙井開工, 一心諗住早d出門口去食個早餐先上去. 先一晚瞓得唔好, 懵下懵下出門口, 半睡半醒去到紅墈, 臨上火車一刻, 突然醒起自己冇帶回鄉證﹗急急忙忙走返轉頭見車就上, 唔算太塞車, 廿分鐘後返到, 死命向斜路頂衝, 攞左回鄉證又死命向山下衝, 高踭鞋刮到對腳流晒血都唔理得咁多. 死, 今次塞車! 成40分鐘後先返到紅墈, 早餐無望了, 仲遲到添. 好彩我仲跑得下, 唔算遲好多.

原定四點幾離開沙井, 但係某d人太長氣關係, 攪到五點先走得. 放工時間塞車, 兩個幾鐘頭後先到黃崗. 果個時間勁多人返香港, 過關排長龍, 買飛排長龍, 上車排長龍. 終於上到車後又偏偏揀著個位爛既, 坐到屁股痛, 但係我都全程瞓到死左咁, 差d唔識落車. 到左灣仔仲有15分就夠鐘上堂, 飛巴士去仲趕得切, 但死左好多細胞既我一上車就睡魔急call, 一覺紮醒發覺竟然身在總站.... 唉...........

星期五, 諗住留喺office可以平穩過渡等weekend. 點知電話響不停之餘老細仲不停召見. 老細可能見我呢排個"龍躉"有越黎越偉大跡像, 怕影響公司型像特登要我行多d. 結果全日張凳都未坐暖過, 兼緊張到頭痛胃痛. 放工仲要去上yoga, 踎喺張yoga mat度都差d瞓著.

今日, 下晝約左去做facial跟住修甲. 個facial本身冇問題, 但真係年紀大, 攤直瞓喺度, 越瞓條腰越痛, 最後幾經辛苦先坐到起身, 面子攸關仲要咬實牙根扮冇嘢. 跟住去食晏, 途中有兩件麻甩打量, 講左句"幾索喎", 嘩, d腰痛頭痛腳痛都即刻唔記得晒, 哈哈哈~ (兩條友d近視都深得幾緊要)

唔開心得幾耐, 食完嘢去修甲, 上到去摸門釘! 我幾經辛苦先約到今日, 居然咁玩我?!?!?! 打電話一問, 下?! 我個修甲師炒車入左院!!! 嚡.......咁佢都唔想, 我可以點? 唯有祝佢快d冇事.

仲有surprise, 返到屋企, 個大門開左後移晒位, 關唔埋!!

而家個門只係求其扣住, 好大條門罅... 鄰居屋企傳出既陣陣惡臭不斷飄入黎. 我開大個冷氣, 間屋凍到雪房一樣, 都仲係聞到.

如果再唔快d搬既話, 我好快會殺人.

乳牛的故事

從前, 在太平洋農場有一頭乳牛.

乳牛每天努力地食同瞓, 行多步都費事, 務求養精蓄銳, 令自己既產量多之餘, 出品質素亦要高.

此乳牛勁多產, 每日可產奶至少兩次, 所產之奶水色澤深, 質地濃稠, 射之牆上﹑地氈上, 久久不能褪色, 味道更係繞樑三日, 歷久不散.

可 惜, 乳牛身處之農莊乃三教九流之地, 一班污合之眾經常製造噪音打擾乳牛靜養, 高尚的乳牛一向不屑同呢班污合之眾打交道, 苦心既佢為保出品量多高質,不惜長途跋涉, 每週抽一日往農場之北方支部避靜. 乳牛所到之處, 所遇眾生都震懾於其高質產品之下, 議論紛紛, 暗歎”此奶只應天上有, 人間那得幾回嘗?”

有 目擊者透露, 曾有幸用鞋底測試過奶之濃度, 發覺奶質竟可黏如膠水; 目擊者心情激動, 久久未能平復. 而乳牛身旁一班污合之眾雖然極為”唔順超”, 但心內其實交關之佩服, 所以已將乳牛常用之生產室列為聖地, 非必要不會擅闖. 一但誤闖, 都必深感懊惱, 為自己沾污聖地而悔恨不已.

有關乳牛之其他偉大事跡, 將會不定期在此blog發佈. 警告眾乳牛fan屎: 呢度講呢度散, 如有洩漏, 實屬亂up, 本作者恕不負責.

飛蛾?! 嘩好鬼死恐怖呀~~~~~

朝早去搭車, 離遠見到個OL打扮女仔喺路中心彈左彈右. 攪邊科? 神經病發乎?

行近少少, 哦~~ 原來有隻啡色大飛蛾正在離地一呎位置盤旋, 仲抵死地靚女彈去左, 佢飛向左, 彈去右, 佢飛向右, 靚女又唔敢跨過飛蛾向前行, 唯有原地彈來彈去, 仲不時發出尖叫, 不知情者聽到可能會以為有人俾人非禮ing...

多事兼無聊既我特登放慢腳步睇戲, 只見途人見狀大都陰陰咀笑, 一係就面無表情望一眼然後直行直過, 果然"香港人情紙咁薄"! 正想埋去幫靚女解圍, 有一後生仔經過, 大腳向飛蛾一伸, 俾"腳風"打中既飛蛾即時冇癮飛走. 呵, 英雄救美!

原來呢類小小昆蟲喺某d人眼中係好恐怖既. 唔怪得知獨居女友話我知一個人住最驚唔係有鬼或有賊, 而係有蛇蟲鼠蟻爬入屋.

如果佢地黎我住過既地方住下, 可能已經嚇到癡左.

星期一, 又病

星期六, 無所事事去睇左"鬼上頭". 呢套係藝術片黎, 主旨講生命既無奈, 鬼怪只係配角. 套戲唔係差既, 但一心想睇套商業化既鬼片就會好失望.

星期日, 做孝順女陪老豆老媽食晏, 諗住食完行下街tea下. 點知, 老豆食完餐飯嘔吐大作, 老媽又不停咳咳咳話好辛苦. 結果下晝既節目就係陪人睇醫生. 醫務所生意極好, 足足等左兩個鐘先有得睇!

今日到我病, d感冒點都唔清. 起身時d痰多到咳唔到出黎, 頭痛鼻塞又想嘔, 八點幾去等醫生開門. 都係果句啦, “你氣管敏感都幾嚴重喎, 呢d天氣最好出少d街啦!”. 我都想, 香港幾時立法空氣差唔洗返工?

蠢人又做蠢事, 居然唔貴果架車都唔借俾人, 仲要借俾一個仲蠢過佢既人. 結果, 撞左, 借車果位仲瞓喺醫院. 整返架凹晒既Benz要幾錢呢? 哈哈~

黑色星期五??

好囉好囉, 終於星期五囉!!! 我理得佢黑色又好白色又好, 總之星期五就係好日子!

病

中秋都過埋啦, 仲係咁熱!

多得咁好既天氣同埋空氣質素, 再加埋某d人士毫不吝嗇在office放菌, 終於賴嘢, 感冒了. 係屋企扮左一日死之後, 今日返黎魂魄未齊就要睇百幾個email, 問題中年又多白痴問題, 係咪想我死快d???

點解咁快星期一?

個地產惡婆唔知係咪賽後檢討過, 都覺得自己太過份? 佢突然轉態度扮晒死狗, 叫我地如果想再搵樓記住要搵佢喎. 哦, 好呀, 你等下囉.

Yahoo新聞頭條係"撇下太太與友人狂飲 新郎洞房夜猝死". 個新郎得25歲, 咁就冇左. 高興飲幾杯好正常, 但係都唔洗飲到爛醉卦? 近年見d人結婚都興玩到好盡, 有時d帶侮辱性既所謂玩新人遊戲實在令人慘不忍睹, 但慘得過大部份人又甘願被玩, 咩心態呢下?

請人果度結果都係得個桔, 我最壞既預感實現左, 個女仔真係話唔做, 又要再請過.

頭重鼻慶喉嚨痛, 真係感冒? 定係星期一既關係呢?

兇我?! 去死啦~

層樓諗住話左唔租就算啦, 點知仲有下文. 地產打黎話業主肯裝濾水器, 叫我地再諗下. 我就冇乜信心, 隔得到沙石, 隔唔隔得到泥味先? 我落左搭, 之後唔得咪又係搵著我黎攪, 唔通搬完又搬?

好聲好氣話唔考慮後, 個阿姐居然發爛渣, 話我地緊係搵到第二度唔租呢度, 跟住又話我地唔知點解嫌三嫌四, 同區七成樓d水都係咁既質素喎! 嘩, 阿姐你講嘢呀? 我讀K1開始住呢頭, 親戚朋友又多數住同區, 大大少少屋苑甚至唐樓都去過, 都未試過要用黃泥水喎!

睇完樓唔租都有罪? 佢都癡癡地, 買衫買鞋幾百蚊都要試啱先俾錢啦, 何況我個個月出六七千銀幫人供樓?!

今日空氣極差, 仲唔知死去銅鑼灣蒲左個下晝, 而家喉嚨又乾又痛又不停打乞痴, 好唔舒服, 都係時候去執返劑樹枝茶飲下.

中秋

今日中秋, 可以放半日, 可惜, 今日亦係交數"死線".

雖然中秋明月份外明, 但係唔交功課會俾人丙, 所以午飯過後我仍然會留守公司拼搏.

月餅都唔好食既. 燈籠又唔知有乜好玩. 其實中秋點解要慶祝? 個月亮有咩好睇? 細細個已經有咁既疑問但係又驚問人會俾人$%^&...

去邊做節? 我諗住去福記茶餐廳食廿八蚊大碗麵加油菜, 仲包飲品添. 當然, 凍飲要加兩蚊.

循例同睇晒呢篇無聊文章既無聊人講聲, 中秋節快樂.

搬唔成...頭痛

諗住睇多次間屋跟住簽租約, 上去當然要開d水喉check下, 唔開尤自可, 一開.....黃--泥--水???!!! 兩個地產經紀慌忙陪笑話係個水喉耐冇開先會咁既啫, 開多陣冇事. 好, 我大把時間, 我陪你開多陣. 點知陣完又陣之後, d水仲係帶黃, 仲有唔少細粒沙石沉澱, 帶陣陣泥味. 嗱, 你唔好話我知果d沙泥係發展商特登加落去俾住客做身體磨砂用呀下?!

地產死口拗話大廈舊年做維修時換晒所有喉管, 冇事既冇事既. 大廈維修整過d乜嘢, 問下樓下看更實知. 一問之下, 原來維修只係翻新外牆同大堂, 冇換過喉喎. 個多事既阿伯仲爆俾我地知, 呢棟大廈因為d水質既問題, 成日都有人投訴, 大部份住客唔敢飲黃泥水, 唯有飲蒸漏水. 飲蒸漏水冇問題, 但冇理由要我用泥水沖涼卦?

咁既condition我地就唔會租架啦. 個地產死咬唔放話叫業主搵個師傅上去望下, 可能有得整呢? 好, 你咪搵人上去睇囉. 不過我覺得如果係求其叫個師傅整整就攪得掂既, d住客又點會唔做, 而寧願飲貴水?

好鬼慶! 以為搵到地方可以快快搬離個臭人, 而家又要再搵過!

搵屋搬

趁住放假, 終於的起心肝去睇樓. 唔想搬得遠, 都係搵返同區. 求其走入屋企附近一間地產, 兩條八婆掛住睇報紙唔願做, 我地未講完就"冇呀冇呀, 冇你想搵果d". 超, 好叻咩死八婆! 鬼唔望你日日返工睇報紙, 年頭睇到年尾都唔發市!

跟住入去間舖仔兩個阿姐好幫手, 合晒劉天王所講既正確服務態度. 阿姐熱情招待, 揀左七, 八個單位帶我地去睇, 行到腳跛之旅開始.

個 市係咪真係咁好? 定我果區特貴? 豆腐潤咁細一間屋仔, up dup冇裝修一陣酸縮味加無敵樓景, 有d仲有明顯既外牆滲水跡, 閒閒地叫七千幾一個月. 稍平既就騎尼到飛起, 個單位匿埋喺防煙門後面既見過未丫? 有間個客廳只有三步路程, 黑沉沉鬼屋一樣, 但係個地產話間房夠大補番數喎, 吹脹, 呢個廳我都唔知要黎做乜, 不如去租間套房算喇. 仲有一間, 間隔"四正"喎, 係呀, 間房四方型既, 標準六乘四床褥都擺唔落囉.

行到身水身汗腳仔軟, 心諗個天唔係咁玩我呀嘛? 唔通我以後都要與臭尿味同小強為鄰? 不存任何希望下去睇地產極力推介, 已經有幾個客排緊隊想租果間. 入去之前地產阿姐話呢間好靚, 我心諗有幾靚? 冇咁臭呀? 入屋後都有d安慰, 終於有間似樣少少既屋, 都係豆潤咁細一眼見晒, 但都叫做有裝修有執過, 起碼似係人住既地方多過鬼屋.

好不耐煩既某君話不如租啦. 唉, 咁既質素我諗都叫做飲得杯落, 再睇都只係更多騎尼屋, 無謂嘥時間.

第一次搬係因為間屋漏水, 第二次係避開個惡鄰, 希望今次順順利利唔好漏水唔好有蟲唔好有臭味, 阿們.

正式開井

今日開井大日子, 晨早北上趁熱鬧. 魂魄未齊就要趕火車趕過關, 準時去到集合地點, 但係有人唔生性累我地等左20分鐘!

個開幕儀式都算係咁, 有靚靚禮儀小姐有專業MC有炮仗有舞獅. 鬼佬未見過, 睇得好過癮. 之後到會d嘢又幾啱口味, 唯一complain係今日好熱好晒, 我塊面晒左一朝, 到依家仲係又紅又慶.

黎緊仲有兩壇嘢攪開幕, 鬼佬話咁好玩下次都要咁攪....真係Oh賣桔啦.......

幾許瘋語

尋晚架巴士超多人, 都唔明d人點解唔行入d, 一個二個棟晒喺車頭位置死迫爛迫, 個司機好靚仔咩? 好恨企佢側邊?

入 去較空曠位置企, 剛企好, 就發現我面前二人座位度, 坐路邊個男人個樣好唔自在. 而佢旁邊阿伯就不停講嘢講到手舞足蹈, 口沫橫飛. 初時仲以為兩父子咁好傾, 但係聽聽下, 再加埋男士個頂唔順表情, 先知個阿伯其實係自言自語 (亦有可能係同個得佢見到既人講嘢, hehe).

阿伯沿途未停過口係咁講, 八卦既我當免費娛樂. 不過架車好嘈, 阿伯又比較"um沉", 我聽d唔聽d, 節錄如下:
" 一個月搵幾十蚊, 大牌檔食碗飯幾毫子, 睇齣戲又係幾毫子...最好就係消防佬, 返一日, 放兩日....著喇叭褲, 聽披頭四....六七年暴動呀, d歌都係改披頭四 (高聲唱左幾句歌)...聽就曉聽呀, 果時唔知係披頭四....好巴閉, 唱到黎香港...我話你聽丫 (坐直個身, 神情嚴肅), 2006年10月1號2號...2006年10月1號2號...打風! 我唔講大話架, 我我我...我呃你做咩....2006年10月1號2號...掛風球! 你睇下啦....唔洗返工唔洗返學....一定掛風球....冇得去迪士尼冇得去海洋公園....以前去荔園睇大笨象....."

聽到呢度我要落車.

唔...癲文台真係預測左1號2號落雨, 仲有隻"象神"會橫過菲律賓添....阿伯short唔晒!

星期三, 仲有得痛

終於捱到星期三. 今日牙較居然唔痛, 頭都冇痛, 但係輪到骨痛. 死囉, 冇上瑜伽一個禮拜, 禽晚上番一堂今日就攪成咁. 實在 UNfit得交關, 要好好反省.

後日又要上大陸, 仲要好早, 唉, 仲以為可以側側膊唔浦頭. 點解現實咁殘酷? 點解個天係都要同我作對? 我唔鍾意去既地方, 偏偏要成日去?

下個禮拜又deadline. 乜咁快一個月架! 今年感覺過得好快, 我成日覺得仲係年中, 但轉個頭又中秋. 果日收到稅局個"綠色炸彈", 當堂呆一呆, 又交稅? 好似呢頭交完果頭又要交咁既. 見到就心情惡劣...

不過又好彩收到稅單, 令我記起我枱面有張攤到凍晒既塵封稅表未填, 原來仲有兩個禮拜就deadline, 呵呵, 好彩好彩~~

痛

一 早起身, 牙較繼續痛, 頭同喉嚨都痛埋一份. 幾經辛苦先滾落地, 草草梳洗更衣就懵下懵下出門口. 一路行落巴士站, 沿途都有人望下我. 咦? 唔通魂魄未齊既我別有一番美態? 即使未瞓醒我都知呢個機會好微, 趁車未到拎塊鏡仔出黎照下. 睬~~ 原來個下爬有好大pat牙膏.........^&*@#$%!

唔知係咪年紀大唔激得? 受左呢個小小刺激後上車開始胃痛, 仲要迅速由隱隱作痛去到好痛. 好快去到火車站, 禽日上樓梯差d PK, 今日就寒住個背死下死下咁上, 相同之處就係兩日都有幾個好事途人用古怪眼神打量我.

上左車睡魔急call, 胃痛都唔理得咁多, 我要瞓覺! 一覺瞓醒, 胃痛已經消失, 但係....咀邊有口水漬......

又再一次, 一路行一路俾人眼啤啤. 都唔知有冇俾人影左相添!

PK星期一

前 日想搵留港shopping既外地同事出黎食餐飯, 打1083搵到酒店電話, 但係同事出左去, 冇計. 提起1083, 近期服務好似有d改善, 想當年我試過打去問一間冇中文名既鋪頭電話, 串左幾次俾個男仔聽, 佢都係一舊雲, 我講極 "P for Peter"佢都係猶猶疑疑地回返我一句"....T for Thomas呀?" 我用埋Paul, Pauline, paper, 佢都係果句"er....T呀?" 真係好想問佢天生係咁蠢定係特登想激死我?

今朝喺紅磡上樓梯時突然間眼前一黑暈一暈, 差d碌落樓梯, 我諗又係時候去驗下血睇下死得未. 香港人確係有守望相助既精神, 我跌一跌果下原本逼在我左近上緊去既路人甲乙丙丁, 即時快速向四週彈開, 有個哥哥仔企定定用驚恐眼神不停打量我, 驚我有傳染病?

星期一朝早就差d PK, 唔係好兆頭, 相信今個星期都會幾難捱!

終於開完會

終於開完會, 禽日比第一日好, 起碼個個可以發下言, 唔洗戇居居坐喺度齋聽人講. 今日 last day 連老細都唔願多講, 好快放人走.

上 黎幾日, 第一晚俾人捉左去陪唱K, 第二晚去食火窩, 跟住禽晚 group dinner. 晚晚大魚大肉後, 返酒店後再同同事吹水兼狂"隊"零食到深夜. 雖然開會係悶, 但夜晚節目都幾豐富, 補返數. 後遺症係生飛滋, 牙肉痛, 標暗瘡....

下 晝流喺深圳, 有兩個女仔黎interview. 佢地對比都幾強, 一個怕怕醜醜唔多出聲, 一個較多嘢講, 感覺幾醒目. 怕醜果個學歷高少少, 年紀又大d, 似係個聽話既人, 但係有d驚佢會係踢一踢郁一郁, 有問題又冇膽問果隻. 我就比較鍾意開朗型果個.

睇返application form, 我prefer果個未婚, 大陸人好興一結婚就即生, 佢既年紀結婚既話算係"晚婚", 嘩~ 婚假 + 產假分分鐘放大半年, 我咪好大鑊?! 反而另外果個就結左婚生埋, 冇左呢重憂慮. 仲有呢個乖乖女住得頗近我地山卡拉位置, 個吱喳妹就住得好遠, 佢話可以考慮搬屋喎, 係至好講, 都唔知會唔會做做下到時又話太遠唔做!

搵工煩, 其實請人都好煩!

開會開會再開會

開會真係好悶.......仲有兩日要捱......................

怪夢

呢排又晚晚發怪夢, 腦細胞異常活躍. 有冇高人可以指點下呢d夢有咩意思?

Dream #1: 夢中既我半夜牙痛, 走落街居然俾我搵到個夜診牙醫(有架咩?). 個牙醫仲好靚仔添, 哈哈. 睇完牙佢對我依依不捨, 叫我等佢收工一齊去食嘢, 跟住我真係等到差唔多天濛光同靚仔去拖手仔食糖水, 幾鬼浪漫. 天光後佢送我歸家(一幢不知名大廈), 喺大廈門口撞到我爸媽唔知去完邊返黎(去到天光?!). 我地即鬆手扮唔識, 然後佢望住我上樓, 跟住就鬧鐘響帶我返黎現實. 我仲清楚記得夢入面個靚仔醫生叫乜名, 不過上牙醫學會check過香港冇註冊牙醫叫呢個名, 果然係夢.....

Dream #2: 同某君唔知去左邊, 喺一條好闊好靜好荒蕪既公路飛馳. 天光渣到天黑兼落住狗屎先去到一個荒郊小鎮. 人影都唔多隻. 落車淋到落湯雞咁又竟然俾我地發現一間木搭既小屋, 入面有個女人喺度賣手袋 (奇!). 再向前行, 見到幾間關門大吉既食肆, 遠處有個Coles Supermarket, open 24 hours 既招牌. 我講左呢個夢入面唯一對白: 咪好囉, 有地方行下. 呢個時候發現一間外型up dup, 裝修古老兼黑媽媽既唐餐館, 我地入去醫肚. 坐低打開個menu後我就醒左.

Dream#3: 唔知點解我間睡房變左課室. 原本有個衣櫃既位置擺左個黑板, 有兩件鬼婆鬼公喺度唔知教乜, 我同另一瘦弱四眼仔坐喺床上上堂. 教教下兩隻鬼唔知鬼上身定神經病發, 捉住條四眼仔狂丙, 血花四濺. 身手了得既我上前幫拖, 將鬼婆打出廳外然後迅速關門上鎖, 然後再將擒住四眼仔唔放既鬼公打暈. 但係四眼仔都傷重不醒人事. 唔知點好既我四圍望, 望見窗外原本係樹叢既地方變左平地, 我細佬正在地上做柔軟體操(哈哈!). 跟住我又醒左.

Dream #4: 極度凌亂既一個夢. 記得既情節係唔知讀咩新生入學, 同幾個同學仔出去學校外行下, 仲好記得其中一個靚女同學生得好高, 夢中既我問佢幾高, 佢話我知178cm. 我仲記得佢個名, 好娘既一個名, 哈. 成班友仔行行下見到間好靚既白色大屋, 門開住, 八卦既我地入屋睇下. 入到去, 冇人冇家具, 想走人時其中一個同學仔發現一間房入面有個阿婆喺度打小人. 阿婆話可以唔收錢幫我地打, 成班八公八婆話好, 踎低睇阿婆打打打. 終於玩完時想走, 但係發覺行來行去都行唔出間屋, 而原本冇人既房入面唔知幾時坐滿晒人, 男女老少都有, 個個面無表情, 氣氛詭異. 我地知此地不宜久留, 分頭搵路但又搵唔到, 後來見到剛才打小人阿婆唔知喺邊度突然出現, 教我地點出去, 原來喺花園入面某張檯底有地圖, 上面仲寫住我地卯時前要走唔係就好似果班人咁以後都被困白屋(拍戲一樣, 個劇本仲好爛). 我同另外三人及時逃出(卯時其實即係幾點?), 剩低兩個男仔走唔到...

之後既夢境好零碎, 有上網查考試成績; 有條肥佬吊頸但俾我及時放番落黎; 有俾人追殺; 仲有拎住一袋肢離破碎有血漬Barbie公仔行黎行去...超怪誕......

點? 有冇高人可以話我知, 呢d夢點解???

星期一, 慌失失

雖然仲係好熱, 但都隱隱約約 feel 到有少少秋意. 次次轉天氣又係流感肆虐既時候, 老媽子真係返得來唔合時, 返黎咁耐病足咁耐, 睇極醫生都唔好. 見佢咳到氣喘就鄧佢辛苦.

我牙較痛好有可能係一隻叫"顳顎關節症"既病. 大檸樂, 都唔知有冇得醫?

教宗食錯藥? 居然亂up廿四得罪回教佬, 報紙話"恐怖分子正瞄準梵蒂岡", 有排煩. d回教佬近年已經俾美國佬撩到好慶, 佢仲要加把嘴得罪人地老大哥, 身痕想打仗?

唉, 聽日開始一連幾日北上. 諗起都情緒低落, 今晚要去掃返d零食先得. 又唔講咩dress code, 帶咩衫好? 著牛記都唔知會唔會俾人xyz? 真係煩!

Yeah~~星期五~~~

禽日收到份CV, 個candidate既大名實在夠晒氣勢, 叫"海嘯", 勁唔勁? 俾海嘯嚇一嚇之後, 7點幾香港就地震. 海嘯同地震真係一齊黎既. 天文異象喎, 瘋瘋呀Ling Ling呀果班友仔唔知會唔會又出黎廢up妖言惑眾?

報紙話不排除更強餘震, 唔好嚇人喎...

夜晚去跳舞忍唔住買左條新跳舞裙仔同hip scarf. 條裙仔湖水藍色好靚架, 同學仔話我五行欠水呢隻色啱喎(成班八婆). 幾錢? 唔好提囉....總之今個月又嘔凸!

火 車上確係多怪人. 今朝有個西裝骨骨既阿伯上車一路忘我地開礦, 開採完畢居然企起身做早操, 又拗腰又擰又跳. 跟住見到門邊企左個嬌俏學生妹, 又走去撩人傾計. 個學生妹唔騷佢, 佢轉台講英文! 問學生妹: Do 于 speeek Enguleesh? 學生妹依舊睬佢都傻, 阿伯冇癮唯有行開繼續晨操. 我落車時佢仲捉住兩個環喺度做引體上升.

我幾年來搭巴士火車見既怪人怪事, 絕對可以輯錄成書. 有得諗~

開口中

結婚果陣同阿伴娘講過, 做過我伴娘之後好快到佢嫁. 果然, 佢呢兩年幾內火速由冇拖拍到搵到另一半, 而家仲有半年就結婚了.

開 口中我都唔係第一次, 不過以前都係中埋d衰嘢多, 好似當年捱到死既時候話過寧願量地都唔想做得咁辛苦, 果然, 不出半年就失業. *$%#*#&^$@! 卒之搵到嘢做後, 發覺原來係由一個火坑跳去另一個火坑, 發晦氣話最好大病一場可以抖下, 結果真係病到差d入廠. *$%#*#&^$@! 又同某君講我地去親澳門實係是但一個會病. 半年後貪得意去兩日一夜, 唔知食錯d乜嘔到我脫水. *$%#*#&^$@!

好囉, 而家睇黎我講d好嘢都開始中囉. 我講過既升職加薪唔加辛, 中千萬六合彩, 某君聽教聽話俾晒d錢我, 唔洗節食都36-24-36 etc etc etc....., 應該都會輪流中啦卦?

睇牙

抵 死啦, 食 得朱古力多攪到牙肉發炎, 隻智慧牙又隱隱作痛. 禽晚去洗牙順便問下好唔好剝左佢. 個牙醫好抵死地講, 呢隻牙因為好夠位生(即係話我面大啦), 我又唔理佢(點理?), 於是乎佢就霸左兩隻牙既位置打橫瞓喺度生(瞓? 物似主人型, 好懶). 結論就係, 呢隻牙除左阻定之外, 一d實際用途都冇, 最好就係剝.

多年前喺"麥記"行刑咁剝左兩隻智慧牙, 見過鬼怕黑, 我唔會再俾呢d經驗尚淺既醫生仔同我剝牙. 都係去搵番五分鐘極速剝牙既"玄機"保險d, 雖然佢好貴.

心血來潮諗到牙較痛會唔會係關d牙事呢? 同個牙醫講左, 佢check過又照左x-ray睇, 我果個位置幾隻牙都冇事, 唯一問題就係有少少牙肉發炎. 佢居然提議我不如剝左最埋邊隻大牙, 咁就可能唔再痛啦喎. 我心諗你唔係呀嘛, 隻牙冇事冇幹剝咩呀?

攪左一大輪, 錢又洗左, 都係唔知點解會牙較痛, 仲越黎越痛....究竟我乜事?????

Dedicated to 性感師奶, 打尖阿姐 & 斯文OL

禽晚見到3個女人, 各有所"強". 呢篇垃圾文章係獻俾佢地既.

火車上:
有個中年師奶上車後不停踎低整理佢幾大袋嘢, 每次一踎除左個起碼40吋既"豪華臀"近距離得住我大脾之外, 佢條低腰牛仔褲更令佢露出1/4條股罅同一大截白滑豐盈後腰, 誘惑非常.

雖然我對女人冇興趣, 都忍唔住一"及"再"及"...

巴士站:
搭108去銅鑼灣食飯. 車到時有個等緊112/116果條隊既阿姐用9秒9速度跑過黎, 意圖攝喺我前面上車, 俾我用手袋格開左. 奸計不得逞後又再恰我後面阿婆, 想排在阿婆前面上車. 司機大佬見狀大鬧: 阿姐, 你洗唔洗咁呀? 得果幾個人等緊啫, 排隊啦!

正常人應該感到面懵, 呢位阿姐可能係世外高人, 唔怕樣衰係都要攝位上, 仲要擺出一副藐咀藐舌晚娘面口. 懶理司機大佬臭罵同後面乘客怨聲連連, 服!

食店內:
勁 多人要搭檯. 我地被安排坐喺一位樣貌娟好, 化清雅淡妝, 衣著斯文既OL對面. 斯文OL碗麵先到, 跟住落黎我地面前就上映一幕"豬食潲"奇景. 斯文OL食相極之豪邁, 狼吞虎嚥湯水四濺不特止, 仲要發出響亮"集集"聲. 極速食完後, 斯文OL豪邁地依起棚牙撩牙, 跟住 喉嚨滿足地發出長長既"URGHHH"一聲 , 埋單走人.

睇到我地兩個傻瓜目定口呆. 果然, 人不可以貌相!

911

無所事事過左個weekend, 乜都冇做過淨係食同瞓.

911 眨下眼就5年. 仲記得當年我喺灣仔捱騾仔, 夜晚收工時睇即時新聞知有飛機撞左埋去世貿大樓. 果時眼瞓到死既我根本唔係好care發生乜事, 淨係想快d返屋企快d瞓, 個腦只諗到係個plane accident. 返屋企睇新聞先知咁大鑊. 果次係繼六四後唯一一次睇新聞睇到半夜三更.

N年前跟鴨仔團去美國, New York一站少不免會上WTC參觀, 估唔到第一次亦係最後一次. 幾年後WTC就成為歷史.

人生無常, 都係有日過日算, 諗咁多做乜? 你點知邊日會無啦啦有架飛機撞埋你office?

雖然, 上水好似機會渺亡d......

KFC

去KFC買早餐所見所聞:

1. 排緊隊時聽到隔離條line個鬼佬話: No.15, takeaway
靚女職員(醒目地): Sorry, we don't have it.
鬼佬 (迷惘): You don't have what???
靚女職員: Er....what do you want sir?
鬼佬(不耐煩): No.15, takeaway
靚女職員: ...... (無助地兩頭望, 但同僚們都好忙冇人幫拖)
鬼佬一臉不耐煩.
靚女職員(尷尷尬尬): Em...we don't have takeaway......
鬼佬: WHAT??!!
呢個時候餐廳經理突然出現打救. 經理即係經理, 知道咩係takeaway. 抵佢高grade d.

2. 前面師奶: 一個4號, 一個6號, 兩個9號, 一橙汁三奶茶, 喺度食既.
幾分鐘後, 未瞓醒樣女職員推兩個盤俾師奶, 上有3個餐, 3杯奶茶.
師奶: 我要4個餐喎, 點解得3個既?
未瞓醒樣女職員: 你要一個4號, 一個6號, 一個18號, 飲奶茶丫嘛!
師奶 (勞氣): 我要兩個9號喎, 兩個9變左18呀???
未瞓醒樣女職員(戇居居唔識反應): ......
經理再次現身打救, 迅速將18分解回做兩個9, 平息左師奶既怒火.

親眼目睹呢兩個個案, 結論係: 好既上司好重要!

食錯藥

印像中近年都幾多開錯藥事件, 我睇開個大國手一向好穩陣, 姑娘執左藥後會拎入去俾佢親自檢視, 仲要撩番隻龜, 先俾病人帶走. 但係佢呢個方法原來都有漏洞, 即使冇執錯藥, 但藥入面加左料又點呢?

好似東涌西醫"咸鯪魚"咁就賴嘢喇, 開左火酒藥水俾人飲. 好彩個細路冇事, 有事唔知點算? 餵佢食藥果個都好有問題, 報紙話一打開樽蓋就聞到濃烈火酒味, 佢完全冇覺得唔妥? 鼻塞聞唔到呀?

我諗要提議醫生們唔好齋check, 由其是藥水, 單憑顏色好難睇得出有冇問題. 最好打開個蓋聞下有冇俾錯洗潔精人飲, 更安全既做法就係自己飲一啖試下味先, 咁就萬無一失喇.

Reflection on 2 Deaths

禽晚先得閒睇報紙, 原來有個英皇留班生跳樓死左. 我都明佢好慘, 好難面對, 原本係同班同學, 放完個暑假變左自己既師兄. 但係呢個世界係咁架啦, 出到黎做嘢, 同你同grade既都有可能突然間變左你上司. 你係唔夠料升既, 咪原地踏下步先囉.

不 過講開又講, 我覺得香港大部份學校, 由其是d所謂名校, 都只係"nerd factory". 好多老師永遠淨係識叫班學生背晒教科書入面既野, 咁就叫做教書喇. 其實讀書以外, 更重要係EQ培訓, 教個細路點去solve problems. 而家d細路郁d就去死, 就係缺乏解決問題既能力, 淨係識將自己個問題無限量放大. 於是乎, 默書唔合格呀? 跳樓啦! 考試食蛋呀? 跳樓啦! 俾阿媽鬧? 跳樓啦! 俾仔/女撇呀? 跳樓啦!....諗死最容易, 即係乜都唔洗諗, 最不負責任既解決方法丫嘛.

鱷魚先生死左. 居然唔係死喺鱷魚口, 係俾隻stingray一嘢篤瓜左. 奇! 我以前都試過游游下水突然有塊嘢飄近, 就係呢d怪魚. 冇嘢架喎, 摸佢都唔反抗, 好溫純完全唔魔鬼架喎. 新聞話條魚可能"felt threatened"所以襲擊人, 究竟佢當時做左d咩動作令條魚誤會呢?

呢d嘢 整定既, 全球得17宗stingray殺人事件. 咁難中都俾佢中, 仲有咩好講? NEWS.com講得好: Irwin's death is as confusing as his celebrity. It seems unbelievable that he could be killed. But, on reflection, what could be more natural than a wild animal killing something that decided to wrestle it?

死線前兩日

食左藥都係牙較痛, 食嘢先痛得緊要. 冇所謂, 食少d當減肥.

講起減肥, 有豬朋話我知雙手喺胸前合十然後上下移動可以減麒麟臂. 試下冇壞. 但一做呢個動作就有條友問我"你拜神呀?"

就快死期到, 做呀做呀做呀做做做做做......

禍不單行

上個禮拜頭徹底排毒後, 個天仍未放過我. 星期三開始每次打喊露同食嘢耳仔入面都勁痛. 星期五痛到頭同喉嚨都一齊痛, 卒之又要睇醫生.

Check過耳仔冇發炎, 係牙較舊軟骨發左炎喎. 都唔知係咪? 點解d咁騎尼既位置會發炎?

去完沙井, 死左好多細胞

呢排嚴重失眠, 禽晚瞓得兩個幾三個鐘, 今朝6點起身上沙井. 正式倒塔咁早.

今日喉嚨勁痛耳仔又勁痛, 都唔知乜事! 加埋唔夠瞓同悶熱天氣, 開會時烏下烏下. 幸好個會唔算好長.

4點幾返到羅湖. 鬼咁多人. 過關時俾個阿伯打尖. 叫佢排隊, 佢扮聾. 我咪全程口up up講, d咁既人都有, 攝去我前面, 快一個快得幾多? 佢都依然係唔理我. 你好嘢!!

落到月台, 不停有announcement話月臺非常擠逼, 請乘客行去較前方位置. d人一於你有你講, 我有我照逼, 係唔鍾意行去前面呀你吹咩! 我幾經辛苦先越過由多名肥師奶濃重汗臭味阿叔同尖叫細路組成既人牆, 逼去前面少少上車.

車 到. 後面件西裝友身水身汗貼到埋一埋. 上唔切咩阿哥!! 我好唔好老脾咁啤佢一眼, 佢縮後兩步. 車門打開, 又貼埋黎! 我xyz佢丫! 哦, 原來個哥哥仔急住上車爭位坐! 我冇打算坐, 環顧四周見急急上車既男士們都忘我地撲位, 有d仲不惜同肥壯師奶鬥撞.

我留意到坐既多數係男士, 女既反而多數企, 仲有個大肚婆冇人讓坐. d男人係咪企下都唔得? 財多身子弱, 定上去滾得多腳軟?

一個站話咁快就到. 只見頭先心急上車霸位既西裝友同我一齊落車. 嘩, 一個站都要爭位坐, 佢幾分鐘都企唔到呀?

手軟腳軟

上個禮拜唔得閒冇上瑜珈, 禽晚上一堂辛苦到死. 一般d拗柴摺埋動作之前都已經可以應付自如, 但禽晚明顯地不在狀態, 差d真係拗柴. 有個動作要單手單腳支撐全身, 做到震晒標晒汗. 望下前後左右同學仔, 唔覺有邊個好似我咁滴晒汗喎!

辛辛苦苦捱左一個鐘, 可以瞓低攤屍時簡直有拍手掌大叫既衝動.

上少一星期啫, 冇理由unfit成咁呀嘛??