東歐行 (一)

原本想去紐西蘭過冷河, 但阿媽堅持我應承左今年陪佢去東歐, 是但啦, 東歐就東歐.

阿媽個老死舊年去捷克話行到腳跛返黎要睇醫生, 結果佢ban左去捷克, join左較冷門既羅馬尼亞/匈牙利/克羅地亞/斯洛文尼亞團, 聽聞每年只出三團, 仲要貴一般東歐四國團差不多成萬銀一位, 真巴閉.

兩老去完茶會後, 我既惡夢又開始, 呢團主打克羅地亞號稱"拍得住九寨溝"既"十六湖國家公園", 將會入公園行三粒鐘, 嚇得阿媽頻頻嗌救命. 喂聽聞係佢自己話join呢個架喎, 我完全唔知有咩行程架.

咁俾晒錢唔去都唔得, 於是乎廿四號晨咁早我地就乖乖地仆出機場(7am集合, 死未, 返工都冇咁辛苦), 開始我地東歐之旅.

首日行程就係搭飛機, 10個鐘頭多後先到Helsinki, 再轉機去羅馬尼亞首都Bucharest, 落機時已係當地傍晚7點幾, 成班得返半條人命既鴨仔, 先被送到酒店叉電.

個city冇咩特別, 喺車上胡亂影左張街景.



半個鐘就到酒店, 我一沖完涼即撻落床大昏迷.

是日行程完畢.