後會無期

受金融海嘯衝擊, 本blog經營困難, 生意淡薄, 決裁掉冇鬼用主筆一名, 即日生效.

喂, 就黎Halloween啦喎!

約一個月前.

某君: 喂, 就黎Halloween啦喎!
我(發呆中): Halloween關我X事?
某君: ......

幾星期前.

某君: 喂, 就黎Halloween啦喎!
我(發呆中): 咁又點呀?
某君: ......

幾日前.

老媽子: 喂, 就黎Halloween啦喎!
我(驚): 吓你都啱玩?!
老媽子: 玩你個頭, 某君生日呀!

好在老媽子提醒, 如果唔係今日有人會嬲, 哈.

與某銀號對話 (二)

上次同某銀號傾完, 轉眼兩個月, 我都唔記得左呢件事.

今日電話響, 隨手一接, 原來係某銀號又來娛樂我.

某銀號員工: 我地早兩個月寄左張白金卡俾你, 但係你一直都冇確認喎, 點解呢?
我: 吓? 我冇收過喎, 你地寄左去邊呀?
某銀號員工(迷茫): 冇收過...???
我: 係呀.
某銀號員工(迷茫): 咁...你收到再確認返.... (應該知衰臨崖勒馬)
我(妖ing): 會唔會兩個月後突然間收到呀?
某銀號員工(迷茫): 哦...咁....
我(double妖ing): 咁我可以點呢?
某銀號員工(突然迴光返照): 咁為左保障返閣下呢最好你打返去我地hotline取消返張卡, 我地電話係...
我(triple妖ing): 你而家幫我轉過去得唔得?
某銀號員工(如夢初醒): 呀, 得, 請等等.

妖.

與某銀號對話 (一)

兩個幾月前:

某銀號員工(一輪咀): blah blah blah blah...為左答謝閣下....優先批核....白金卡..... 免年費........
我(淨係聽到最後果句): 免年費就寄黎啦.
某銀號員工: 咁我同你對返d個人資料先.

對完一大輪, 到職業部份.

某銀號員工: 你個僱主係唔係呢個...er...er...Man...Man....Manila Pacific呀? (馬尼拉太平洋???)
我: 轉左A銀號啦喎.
某銀號員工(迷茫): er...可唔可以串俾我聽?
我: AXX...
某銀號員工(迷茫): A?
我(妖ing): A for Apple呀.
某銀號員工(迷茫): Apple? 咁Apple跟住係咩呀?
我(double妖ing): 係A呀, A for Apple個A.
某銀號員工(迷茫): er...不如你俾個中文名我?
我(triple妖ing): XX銀號.
某銀號員工(迷茫): 哦哦...咁請問貴公司業務性質係咩呢?
我(quadri妖ing): 咁請問貴銀號業務性質又係咩呢?
某銀號員工(迷茫): 哦...係咪銀號黎呀?

妖.

我果然係隻貓

You Would Be a Pet Cat

Independent and aloof, you don't like to be dependent on anyone. And as for other people, you can take them or leave them. You often don't care. You live your life by your own rules. And you have deep motivations that no one truly understands. Why you would make a great pet: You're not needy or greedy... unlike other four legged friends. Why you would make a bad pet: You're not exactly running down to greet people at the door What you would love about being a cat: Agility and freedom What you would hate about being a cat: Being treated like a dog by clueless humans

What Kind of Pet Would You Be?

洗牙

冇嘢做, 走左去洗牙.

今次心血來潮book左阿媽個friend極力推介果個, 聽聞佢"好好人, 手勢好, 細心, 有耐性, 仲幾靚仔添". 好得咁緊要? 姑且一試啦.

真係聞名不如見面, 得罪講句, 呢件四眼書蟲都叫靚仔? 睇黎阿auntie老花又勁左.

洗牙中, 突然間阿醫生好似發現新大陸一樣.

佢(緊張): 你呢隻大牙...當年都應該蛀得幾緊要喎!
我: 哦, 好耐啦, 補得唔好個filling甩左, 後尾補返.
佢: 幾耐既事呀?
我: 十幾廿年啦喎...有咩事呀佢?
佢: 你呢隻牙應該好痛架喎!
我: 吓? 冇痛過喎...
佢(拎枝唔知咩扑吓隻牙): 痛唔痛呀?
我: 唔痛.
佢(大力d扑): 咁呢?
我: 都唔痛.
佢(仍不死心): 冇理由, 你呢隻牙應該痛架喎! 咁而家唔痛, 會唔會間中痛吓丫?
我: 冇.
佢(居然仲未死心): 唔係啦, 你呢隻牙會好痛架, 都係剝左佢好d呀!
我(開始有火): 隻牙冇事冇幹喎, 剝咩呀?
佢(都仲係唔死心): 唔係呀, 真係剝左佢好d, 而家唔痛, 遲吓都可能會好痛架! 我今日幫你剝埋啦.
我(火): 我痛先搵你啦吓, 你今次幫我洗牙得啦.

條友都忽忽地, 佢一路洗牙仲耐不耐去攪吓我果隻牙, 不停"痛唔痛呀? 痛唔痛呀?"咁問. 我都費事睬佢.

攪掂後, 我迅速走人, 唔洗旨意我會再幫襯佢.

結論一: 呢條友好大機會係傻既.

結論二: 我阿媽個friend, 都好大機會係傻既.

結論三: 過多幾十年我可能會好多病, 而家通定波仔做定化療換定肝腎先啦不如.

半日假

今日照CT scan, 多得呢個咁特別既約會, 我難得地喺一個要返工既日子可以同周公子纏綿到十點.

不過都仲係好眼瞓, 去到我搭錯lift, 一開門, 咦? 軒琴居傢俬?

面懵懵落返一層, 嘩, 鬼死咁多人, 有幾個阿毛大大聲分享驗骨質疏鬆經歷, 熱鬧非常.

好快叫左我入房, 個靚姐姐斟左大壺水叫我攪掂佢, 跟住就唔見左.

一條傻婆戇居居自隊左半壺Bonaqua, 有兩個哥哥仔埋黎講一大輪, 又填form又盛, 跟住換過件鮮艷橙色袍, 終於開得工.

瞓喺度被推出推入一陣, 跟住又等, 等到差d瞓著時, 阿哥哥仔走返入黎, 話要打顯影劑再照, 好唔好喎? 超我都肉鎚針板上, 可以話唔好咩?

我隻可憐既手又被刺穿, 篤左碌針筒放顯影劑, 果種感覺好過癮, feel到有嘢快速注入手臂, 成個人發滾, 暈暈地, 個喉嚨苦苦地, high high地.

前後四十分鐘左右, 玩完.

一路行返往公司方向都仲係暈暈地, 個喉嚨仲係有陣唔知咩味, 頂乜有aftertaste添? 咁勁?

下個禮拜出result, 即係又要去俾大國手哦.

後話: 食左嘢就唔再暈, 原來我只不過係肚餓.

廢柴

有一條廢柴, 有日神經病發, 口口聲聲自稱係一個nice guy.

但觀乎佢既言行舉止, 橫睇掂睇上睇下睇都只係一個......

仆街.

空

有位損友同我講, 只有心靈空虛, 感情空白既人先會寫blog; 某程度上佢啱.

最近相繼收到紅色炸彈同稅局既綠色炸彈, 遲d銀包亦會變得空空如也.

唯獨是工作未見空閒, 未至於四大皆空.

離開太平洋一週年

去年今日, 係我喺太平洋既最後一日, 此時此刻既我正同一班傻人在卡啦OK發癲.

此情難再, 懷念ing......

腎虧之迷

圖中呢條肥妹仔, 攬住既係一盒大白兔糖.

細個冇咩好嘢食, 有芳香奶味既大白兔糖係佢既至愛.

而奶, 一向係人們心目中既健康食品, 所以, 佢阿媽由得佢食, 食幾多都得.

妖, 唔怪得知腎虧啦.

羨慕

俗語有云, 各有前因莫羨人; 但我此等凡夫俗子, 好多時都難免對其他人又羨且忌.

小時侯, 好羨慕其他小朋友:

1. 可以學呢樣學果樣
2. 可以留長頭髮, 而我永遠係核突冬菇頭
3. 屋企有電視, 呢樣奢侈品我到九歲後先有
4. 有十小時充足睡眠, 我小一起隨父母奔波, 每晚都係瞓五個鐘左右
5. 身型纖瘦, 我則肥肥鈍鈍樣衰衰

少年期, 好羨慕其他同學仔:

1. 可以學呢樣學果樣
2. 有自由, 我連著件衫咩色都有人干涉
3. 身型纖瘦, 我則肥肥鈍鈍樣衰衰

青年時期, 好羨慕其他同學:

1. 去外地留學可以專心讀書, 我則似係去打工, 唔做冇生活費, 日日為錢愁
2. 家裏有的是錢, 放假可以去旅行, 而我, 都係得個做字
3. 有自由, 我讀乜都有人干涉
4. 身型纖瘦, 我則肥肥鈍鈍樣衰衰

出黎做嘢, 好羨慕其他人:

1. 仕途順利搵得多
2. 自己搵幾多洗幾多, 唔洗養家
3. 身型纖瘦, 我則肥肥鈍鈍樣衰衰

到而家......

原來人在不斷失敗不斷失望後, 係會變得麻木, 漸臻"化"境, 乜都唔care乜都唔再理.

做人, 都係咪諗咁多得過且過最好.

你賤格嗎?

宇宙無敵超級霹靂賤....??????

自己去test吓啦~
http://component.agilerails.net/generators/3155e9b085/results/new

金融大災難

早幾個月前已經聽聞負債6千幾億美金既Lehman有機會執笠, 言猶在耳, 估唔到咁快應驗, 為我地帶黎一個難忘既中秋.

緊隨其後, 同樣蝕到仆街既AIG, 冇人救既話, 相信都難逃一劫.

咁攪法, 朝早開市唔跌我切個頭出黎俾大家當波踢都得.

呢幾個月真係要節衣縮食.

R銀號冇份排隊執笠, 放心放心.

我諗住儲定多d銀彈, 低位掃貨啫!

一隻龍貓的故事

親戚個朋友X女士養有一隻龍貓多年, 據聞呢隻小動物極度乖巧有靈性, 全家當佢係寶鍚到佢燶.

幾個月前, 已達花甲年齡既龍貓開始食慾不振, 終日昏睡, 獸醫診斷後話佢年紀大, 機能衰退, 果頭近矣.

終於有一日, X女士發現龍貓伏在籠內郁都唔郁, 似係唔得了, 但佢久久唔肯合上眼, 望住主人既眼神竟似有萬般不捨. 結果龍貓一直捱至X女士丈夫同女兒都返家, 見過晒咁多個主人後, 先肯離去.

龍貓死後幾日, X女士發左一個極怪誕既夢, 夢中佢身在不知名地方, 有一個男人跪在自己身前. 男人同佢講, 佢就係佢地養果隻龍貓, 佢前世都係人黎既, 好感激佢地一家呢一世一直對佢咁好; 之後男人叩左三個頭俾X女士, X女士就醒左.

好玄既一個古仔, 信不信由你.

我其實係隻羊

Your True Sign Is Aries

Daring Friendly Energetic Risk Taking Dynamic Daredevil Always on an Adventure Without a Care in the World Quick-Witted and Quick-Tempered

What Sign Woman Are You, Really?

又病

成個禮拜起身都有輕微發燒加頭痛, 尋日仲喉痛鼻塞, 啪兩粒Panadol死頂返工去.

好奇怪, 一返到公司就乜事都冇, 可能係太多嘢做太勞氣, 唔得閒病. 我有三晚做到11點幾, 不知幾咁幹勁非凡.

今日喉嚨痛到失左聲, 吞口水時耳仔都痛埋, 週身唔舒服攪到我想瞓多兩個鐘都唔得. 結果星期六, 罕有地我10點未夠就起身.

不如返工做吓嘢, 可能會自己好返喎.

得個做字

廢柴當道下, 每日平均做12個鐘, 生活過得相當充實.

近年身體每況愈下, 再加年紀心境都相繼老邁, 以前好有魄力地日捱夜捱既我, 如今生理上加心理上都在叫救命.

早幾日去化妝品counter呃sample, 個姐姐竟然介紹隻"減緩肌膚老化初期跡象"既product俾我, 死未, 警號已經響起.

不過反正都就快捱夠一年, 捱埋佢, 攞埋個雙糧先再諗. 睇在我honey份上, 冇計啦.

寄望下次份工做吓花瓶就算.

一而再...

呢排實在太唔掂, 想睇醫生但之前俾大國手鬧完又俾彪叔叔臭罵, 有陰影, 正在不知如何是好之際, 朋友仔知我怕食西藥, 介紹我去佢睇開果間中醫診所.

禮拜六去左...

醫師(搖頭嘆息): 你氣虛血弱, 脾虛腎弱, 肝肺都弱喎! (有冇咁誇呀?!)
我: ......
醫師(搖頭嘆息): 睇你高高大大, 身體差成咁! (你估我想?)
我: ......
醫師: 戒口呀吓! 生冷嘢凍嘢全部唔食得唔飲得, 食完藥記住覆診, 有排醫呀你, 唉!
我(衰多口): 而家咁熱點飲熱嘢呀!
醫師: 嗱你地d後生就係唔聽人講...... (下刪N咁多個字)

又一次送上門俾人媽叉, 不過呢個未熟冇媽叉得咁勁.

其實我都算係咁啦, 心肝脾肺腎五樣, 仲有個心好地地.

繞樑三日

好歌共賞, 鼓掌鼓掌.

去年今日

望吓月曆, 今日係8月31號.

去年今日, 原本係我喺太平洋既最後一日, 但於心急人女士疲勞轟炸苦苦哀求之下, 咪應承佢做得幾耐得幾耐. 仲記得舊年呢日同同事上廣州做嘢, 夜晚食Pizza Hut, 行商場買水晶, 最後仲差d蕩失路返唔到落深圳, 都唔知幾好玩.

感覺猶如昨天, 原來眨吓眼已經一年. 一年以來, 事業上既變化都幾大, 又幾峰迴路轉, 最初一心諗住效忠法國佬, 結果卻走左去埋荷蘭佬堆, 然後而家歸納於蘇格蘭佬旗下.

明年今日, 唔知我又會點?

稀客

MSN收到稀客留言. 呢位稀客, 曾幾何時係我死黨中既死黨, 兩條友仔可以隔日講幾粒鐘電話, 坐喺coffee shop傾到人地收檔.

後來, 佢加入左"有異性冇人性"一族後, 彼此逐漸疏遠, 偶有聯絡, 都係怱怱忙忙, 人家要趕住返歸會情郎.

到佢要嫁人了, 搵我多左, 話想攞參考資料喎, 不過似係想潤我多d, 例如:

(1)
佢: 喂你結婚時個化妝師收幾錢呀?
我: $1280早晚包伴娘同我媽.
佢: 嘩咁平唔怪得知個妝咁核突啦!

跟住佢就大讚佢搵果個幾咁pro收得有幾貴. 哦原來想晒命而已.

(2)
佢: 喂你果時租衫幾錢呀?
我: 好似六千幾, 一件婚紗三禮服.
佢: 嘩咁平唔怪得d衫咁核突啦!

之後又晒命.

如是者俾佢入到位晒左好幾次命, 連我媽衣著都批評埋. 佢請飲我有去, 話晒曾經好姊妹一埸, 不過之後我都冇搵過佢, 佢都冇再搵我, 大家頂多生日時sms對方.

幾年後, 而家無啦啦msn約我出黎, 想點? 又想晒咩?

腎虧呀我

水又唔係飲得多, 但一個下晝竟然去成7,8次厠所, 好攰呀大佬.

食咩啱補腎?

事先張揚颱風假期

星期三開始已收到消息話有隻好勁既鸚鵡襲港, 掛硬8號波, 有可能10號添喎. 一眾懶人如我, 均坐定粒六今日放假.

尋晚天文台卻話: 清晨時間掛8號機會不大. 妖. (妖呢句我講既, 天文台冇妖)

今早起身開窗望望, 咦下面泳池冇開, 有機8號波也, 開電視一睇果然冇令我失望, 瞓過.

一覺醒來已係中午, 外出醫肚去, 超又話好勁, 連遮都唔洗開喎.

冇嘢好做, 租左套爛片返歸睇, 下晝風力似有增強, 雨都大左.

晚飯都係出去食, 成條街居然得一間唔太好食既越南舖有開, 唔知死既我地決定行過炮台山搵食. 嘩頂! 一步一驚心! 有個花盆喺我頭頂掠過, 前面成碌地拖飛左落街碌棍斷開兩截慘死當場, 仲有招牌被狂風吹爆碎片隨風飛舞, 無數垃圾在半空盤旋...

食完行返屋企一樣埸面壯觀, 幾鬼擔心會俾唔知咩扑中聽日上頭條, 兩條友好似玩閃避球咁行, 一路行一路互相埋怨做乜要行咁遠食飯. 其實可以搭地鐵, 但我地又孤X寒, 真係俾花盆dub瓜都係抵X死.

經歷幾許風雨先返到屋企, 件衫濕到揸得出水, 兩條友水鬼咁現身大廈大堂, 看更阿伯明顯地嚇左一嚇.

而家好攰, 受左驚嚇又餓過, 些粉送唔送外賣? 我想要兩個杯麵...

洗唔洗咁頻密呀?

無端端發燒喉嚨痛.

頸同腳啱啱痛完, 個肚都未攪掂, 又黎一鑊.

妖唔通我俾人落左降頭?!

又俾人鬧

抱住"冇死得咁易既"的心態, 食左蝦扇貝鮑魚&蚌.

兩日來d腸都處於興奮狀態, 頸背長滿紅點.

唔想再去俾大國手教訓, 去左搵中醫彪叔叔.

阿彪神醫第一句就係: d濕毒黎喎, 你食左海鮮呀?

跟住又俾人教訓.

一個月內第五次被醫藥界人士教訓, 真經典.

相愛很難?

身邊總有人覺得我同某君可以一齊咁耐, 係一件好匪夷所思既事, 何解呢? 乜我似係好難相處既人? 承認自己相比好多人係比較另類, 但其實我唔花心要求亦唔算好高, 不妨同姊妹們分享我對另一半既要求:

1. 唔洗好靚仔, 自問非天姿國色, 費事俾人話我不自量力. 不過, 最好個男人高過我, 有頭髮(至少識我時有), 同唔好肚腩大過胸.

2. 我最憎人食煙, 飲酒則冇問題, 因為我都飲, 但當然適可而止, 酒鬼係一種失禮死人既生物.

3. 對方唔洗好有錢, 錢我自己都識搵, 我亦唔會洗佢d錢, 不過唔代表佢可以係一個無業遊民.

4. 唔洗好高學歷, 但唔可以冇見識. 本小姐不愛談情說愛卻愛談談政治文化科學歷史宗教藝術音樂, 你答唔到嗲唔該過主.

5. 唔好expect我會日日同你電話談心, 去邊度搵咁多嘢講? 你想講廢話肉肉麻麻卿卿我我, 唔好意思我唔興. 我既時間唔係用黎等男人電話既, 唔得閒時固然唔會做, 得閒都唔做, 我睇住個市上落, 或者瞓吓覺好過.

6. 亦唔好expect我成日要對住你, 我都有我自己朋友家人同事, 有我自己既social life, 唔該你專重我私人空間; 同樣地我都唔會要求你隨傳隨到朝夕相對, 你要同你d豬朋狗友出去食飯吹水, 我唔會死跟, 無謂悶親.

7. 唔洗得閒無事送我衫褲鞋襪小飾物, 我用既九成係平價貨, 咁都要人送我不如死左去, 況且你送既都未必啱我胃口.

8. 夏天熱死辣辣唔該縮開你隻手, 唔洗你拖住我都識行的, 最好唔好黐咁埋, 我怕熱, 更怕一身汗既麻甩佬.

9. 我表演慾不強, 不愛人前表演親熱, 如果閣下愛大街大巷即興來個熱情擁吻, 要有心理準備會聽到冷言冷語如: 你隻狗公發情定發神經?

10. 千祈唔好懶細心幫我拎手袋, 拎住女人手袋既男人我覺得好乸型.

11. 不求你記住d乜乜紀念日同我生日, 反正我自己都未必記得, 慶唔慶祝冇咩大不了(所以你亦唔好奢求我懶有心思同你慶呢樣慶果樣...sorry). 不過如我要抽時間同爸媽慶祝父母親節同佢地既生日, 麻煩你俾面亮相. 有幾多爭吵有幾多意見分歧都好, 我父母始終生我養大我, 而閣下卻似乎對我冇咩大恩大德, 冇左你唔會冇我. 更重要既, 父母只能有一個, 男人嘛, 唔鍾意可以換過個, 恕我直言.

12. 承point #11, 你對我有同樣要求, 我唔會托手踭. 相見好同住難, 我天生燥底, 要我同老爺奶奶住恐怕好大機會家嘈屋閉, 間中見吓則冇所謂. (幸運地某君一家絕少聚會, 我大可慳返)

13. 深明"合則來, 不合則去", 你有新歡要走, 同我講聲就得, 唔洗花心思呃我瞞我, 我唔會求你留低. 冇錢我會死, 有冇男人我都係咁過.

我應該唔算難服侍啩?

禍不單行

條頸叫做好左d, 又傻吓傻吓刮損左兩隻腳, 大塊皮撕左出黎, 好Q痛.

仲衰唔夠, 對鞋著左成年好地地, 唔知點解無啦啦會刮腳(唔通我對腳過左一個weekend後大左???), 喺面積頗大既傷口旁, 再刮多塊皮出黎, 傷上加傷.

上有梗頸, 下有跛腳, 我今日行得不知幾有型.

醫生與我 - Encore

條頸痛到幾晚瞓唔著, 手舉唔起, 頭拎唔到, 腰伸唔直, 變左一條唔郁得既廢柴. 尋日想睇醫生又橫風橫雨, 被迫捱多日痛, 今朝一早去搵大國手求救, 軟骨發炎喎, 勞損喎, 佢話.

大國手: 最好你就唔好用咁多電腦啦!

我: 咁不如你寫紙俾我放三個月假?

大國手: 我夠叫你今日放假啦, 咁你會唔會放先?

我: ......

大國手: 仲有你d鐵丸呀, 食成點呀?

我: 唔好迫我啦...食左痾到我死呀......

大國手: 個個食左話痾唔出你又會肚痾咁特別既!

我: 咁我都唔想.

大國手: 換隻藥俾你啦!

我: 吓...

大國手: 食半年呀吓!

我: 吓...

妖, 食藥食到個口苦晒呀呢排, 實減肥成功都得啦我.

越驗越傷心

越check越多嘢唔妥, 妖, 想點呀?

不如殺左我罷啦.

有沒有想過你正在虐待動物

轉載自Alicat Blog, 請睇睇以下link及短片:

http://hk.myblog.yahoo.com/alice92299/article?mid=1743&suc=1

睇到我對住部腦係咁喊, 某君以為我痴左線.

可唔可以唔好咁殘忍? 一直覺得最冇"人性"既, 就係人類本身, 地球仲有呢種低等生物存在一日, 只會有無止境既破壞戰亂同苦難, 我愧為人類...

如果真係有世界末日, 大家某程度上都係抵死.

內在血型

Your Inner Blood Type is Type B

You follow your own rules in life, even if you change the rules every day. Sure, you tend to be off the wall and unpredictable, but that's what makes you lovable. And even though you're a wild child, you have the tools to be a great success. You are able to concentrate intently - and make the impossible possible. You are most compatible with: B and AB Famous Type B's: Leonardo Di Caprio and

What's Your Inner Blood Type?

賤肉橫生

鼓起勇氣上磅, 我輕左....三磅咁大把.....

妖, 戒左薯片雪糕朱古力, 絕少紅肉(我係咪呢世都要繼續食冇味雞胸同淡茂茂白烚魚?), 游埋水, 點解? 點解?? 點解???

推脂有冇效呀?

攞黎賤

放工同損友食飯吹水去, 一時高興又唔記得左自己食緊強勁感冒藥中, 成晚狂隊紅酒.

個胃好X痛.

手

一向懶搽嘢, 一對手曬到起晒斑, 不再白淨. 咁唔得架喎, 白d好睇d望落有福氣d喎, 我要好似燕燕咁!

有舊同事而家在美容儀器公司工作, 佢話可以做機去斑美白, 咦幾吸引, 好想試.

不過, 某君話: 超, 隻手要咁白黎做咩呀? 貓就話四蹄踏雪先靚丫, 你又唔係貓!

妖.

The Little Black Dress Test

What Your Little Black Dress Says About You

You are chic, worldly, and charming. You naturally fascinating and popular. You never feel like pretending to be someone you're not. Your style is simple, flattering, and always appropriate. You fill your closet with well quality, timeless items. If you were a shoe, you would be: Open toed heels

The Little Black Dress Test

醫生與我

大國手: 你話你點算丫, 條氣管咁樣!
我: ......
大國手: 記得全部藥都要食晒呀!
我: 哦......
大國手: d敏感藥唔得要噴鼻呀!
我: 哦......
大國手: 仲有你個驗血報告呀, 你唔好開心住呀, bare pass咋!
我: ......
大國手: 叫你食補血丸又食食吓唔食!
我: ......
大國手: 11月都仲要驗血呀!
我: 哦......

好有多左個老豆既感覺, 原來醫者父母心呢句說話係咁黎既.

人回鄉賤

放完假返黎都預左要好似還債咁還, 還左兩個禮拜, 息都未填到囉.

d一朝得志語無倫次自以為醒到冇得頂但其實係一條懵丙既小人, 繼續格衰冇品日日癲狗一樣亂吠.

另一條懵丙則戇狗狗, 裡裡外外都係一條不折不扣既懵丙, 雖然冇扮醒冇懶勁, 更冇亂吠, 但懵吓懵吓一樣難頂.

我等卑微既薯輩, 只能見招拆招, 攪盡腦汁諗對策, 唔係咁, 可以點?

東歐行 (完)

食完早餐, 先由Ljubljana轉機去Helsinki, 等約一個鐘頭就登上直飛香港班機.

我班機好滿, 好多細路, 坐低時見前排女士帶住個不停哭鬧既B女, 更心感不妙.

跟住落黎果差不多10個鐘, 實在係此行最最最辛苦既時間. 我個機艙不幸地有個內地團, 大堆呱呱叫內地同胞個個聲若洪鐘, 一人拎杯紅酒四圍行, 撩自己友傾計, 多次扣安全帶燈號亮起, 空姐都要三催四請佢地先肯返埋位, 但空姐一行開, 班阿叔又跌跌撞撞行返出通道吹水, 非常討厭.

而我前面個B女, 全程應該只有約一個多鐘頭冇大喊.

好不容易班嘈死人既阿叔瞓著晒, B女稍事休息, 又到我前兩行幾位攪攪震(又係中國人, 真失禮), 先係一個肥仔不斷企起身開架左摷右摷, 開呢個袋開果個袋, 前後五六次, 嘈嘈閉, 完全懶理後排既我地正努力地想瞓一陣.

終於呢條X街摷完嘢, 諗住可以恰一陣, 點知俾一下又一下強烈閃光閃醒, 原來條X街摷個相機出黎偷影同行親友既睡相, 閃光燈閃不停. 佢班友笑得開懷玩得過癮, 難為我地想瞓一陣都唔得. 跟住個極度扭計既B女都醒埋, 慘喇, 佢又喊唔停.

呢程機實在係折磨. 差不多捱到香港, 又遇上強勁氣流, 多人嘔吐大作, 果陣酸臭味瞬間充斥整個機艙, 聞到我都想嘔埋一份, 結果早餐都食唔到, 蝕左.

懷住想斬人既心情落機, 一出connection bridge就見到R銀號個巨型廣告, 我塊面更黑, 襯晒個黑眼圈.

仲未夠, 攞行李時等極都等唔到第二個喼, 之後突然發現輸送帶上有張notice叫人聯絡地勤人員, 上有幾個人名, 不幸地我榜上有名, 頂! 六合彩又唔見我中!

一問之下我個喼仍在Helsinki, 上行李時出錯喎, 當堂想爆粗, 我相信我面色一定極為難睇, 果位地勤哥哥全程戰戰兢兢, 正眼都冇望過我. 好彩我個喼入面得d污糟衫, 冇咩緊要嘢, 加上佢承諾第二日就會有專人送到我門口, 心情稍微緩和.

臨行時, 我再問多句: 咁你地聽日幾點先送到呀?
哥哥仔: ...下晝...三, 四點啩...
我: 咁晏?
哥哥仔: ....er...咁...12點左右啦...
我: 係咪架? 咁12點啦喎!
哥哥仔: 係..係...12點...

事後阿媽話我d語氣好似想殺人一樣, 其實我都唔想難為佢, 但心情實在不佳, 佢唔好彩啦, 我EQ好低架咋.

後話, 件行李真係下一日12點正送到我家, 抵讚!

東歐行 (十)

眨眼間此行已到尾聲, 今日先去參觀鐘乳洞(Postojna Cave).



洞內恆溫8度, 件褸袋足咁多日, 終於有機會著. 我媽居然誇到帶左件雪褸, 大佬, 係8度唔係零下8度喎...

先坐小火車入內, 車速頗快, 好似貼住d石頭過一樣, 陣陣寒風撲面, 好刺激. 坐完車跟個guide行行復行行, 行到熱晒, 終於連好怕涷既老媽子都要除褸.

洞內唔準影相, 不過好多人趁個guide擰轉背即偷雞影個不停, 我都唔例外.



行完鐘乳洞, 就係最後節目, 首都Ljubljana市內自由行. 市中心好細, 好快就行左一圈, 太陽非常猛烈, 都係搵個有瓦遮頭既地方飲吓嘢好過, 吹吓水飲吓嘢食吓雪糕, 又過左一個下晝.





開心既時間過得實在太快, 食埋最後一餐豬肉薯仔, 第二日就要走人. 超唔想返香港, 呢晚食唔落, 瞓唔著, 成晚輾轉反側, 忐忑不安...

東歐行 (九)

再度過境, 去此行最後一個國家 --- 斯洛文尼亞. 對呢個地方認識唔深, 只知佢係前南斯拉夫一個加盟共和國, 91年先獨立.

第一印象斯洛文尼亞係個幾翠綠既國家, 喺車上隨便影左張小鎮風光.



食完飯去碧湖 (Lake Bled), 湖邊有古堡, 湖中有一個小島, 島上有間教堂仔, 幾童話世界feel架.





喺度hea左半日, 坐吓船仔, 餵吓鴨仔, 飲杯嘢...





如果一直都可以過呢d日子就好, 究竟幾時先退得休?

東歐行 (八)

重頭戲來了, 今日去十六湖國家公園 (Plitvice Lakes National Park). 呢個公園由前南斯拉夫共黨政府於1949年建成, 79年起被聯合國教科文組織UNESCO定為世界文化遺產.

約兩個鐘車程去到公園下湖區, 先去醫肚.

沿途有不少民居依小瀑布而建, 環境就唔錯喇, 但唔知會唔會好嘈?





先去醫肚, 今餐食烤乳豬, 見下圖, 圖中燒緊既係一隻羊, 我地隻豬喺下格. 上碟後, 賣相普通, 唔知點解好勁騷味, 唔好食. 豬肉之外, 配菜又毫無驚喜地係薯仔.





食飽去飽厠所正式開始行程, 遊人都唔少但未至於迫, 沿途所見盡係碧綠色, 清可見底既湖水, 好靚呀.







我地真好命, 果日氣溫27度, 唔算太晒, 偶然仲有陣陣微風! 話就話行三個鐘但係一d都唔難行, 中間有休息站, 又有一段路有船仔坐, 唔覺唔覺三個鐘就過左, 有d唔夠喉添, 但原來16個湖入面我地已經行左12個, 都幾犀利, 連之前complain complain complain既阿媽都冇呱呱嘈.



我未去過九寨溝, 唔知邊度正d?

東歐行 (七)

一早再過境去Croatia首都Zagreb.

第一印象, 對比Budapest, 呢度市容明顯地較為遜色, 灰暗破落, 差不多眼見每一幅牆都滿佈塗鴉.

先去市中心佢個所謂最旺位置Ban Jelačić Square行個圈, 冇嘢好睇.



再沿路行去upper town位置, 先入Zagreb Cathedral, 又遇著其中一個塔維修, 頂.





再去St. Mark's Church, 又維修?! 妖.



最後影左張唔靚既Zagreb ciry全貌, 行完.

夜晚又懶係去食特色嘢, 間餐廳有自己釀製既啤酒, 我等酒鬼又一人整一大杯. 主菜係碎牛肉, 芝士, 蛋叠埋一舊既物體.



呢碟嘢上枱後, 話說我地成團十幾人都覺得呢碟係牛肉, 但有幾個團友都唔食牛(包括老媽同某君)既關係, 向個waiter求証, 佢話係豬, 好懷疑, 問第二個, 佢話係"mixture of beef & pork", 吓? 再問第三個, 今次呢個話唔知!

安全起見叫佢地換過第二樣嘢俾幾個唔食牛人士, 佢地都算爽快.

其實呢餐算好食, 難為唔要牛果幾位, 又係柴皮豬扒加薯仔.

第二日就係阿媽哦左好耐既十六湖國家公園(Plitvice Lakes National Park)三個鐘之旅...

東歐行 (六)

一早去漁夫堡(Fisherman's Bastion), 居高臨下睇晒成個city. 漁夫堡係軍事碉堡, 建於19世紀, 上有7個尖塔, 象徵9世紀時入侵匈牙利既7個Magyars民族.







跟住去Matthias Church, 呢度以前係匈牙利國王加冕既地方, 不過個塔維修中影出黎變左咁, 激死.



再徒步行去附近既皇宮, 烈日當空晒到頭頂出煙, 幸好環境風景實在唔錯, 唔係晨早已經走返上車涼冷氣.

下晝去間唔似中菜館既中菜館食左餐唔似中餐既中餐後, 去埋Heroes' Square, 左影影右影影, 唔得, 好熱, 又走左去食雪糕. 賣雪糕個哥哥問我地邊度人, 一答香港, 佢鬼咁興奮, 原來佢細個時喺香港住過六年. 仲以為佢他鄉遇故知會請我地食雪條, 點知握完手拍完膊頭吹完一輪水之後, 都係要俾錢.



又返上車, 去Heviz溫泉區, 之前領隊嚇我地果邊d酒店懶係崇尚自然, 好多都冇冷氣, 我地住果間都應該冇,成班嬌生慣養既港燦即時起哄, "唔係呀嘛?!", "三十幾度喎!! 收買人命咩?!" 等等怨言此起彼落. 好彩原來條友只係靠嚇, 酒店冷氣非常強勁, 門外仲有令一眾男團友心曠神怡既雕像.



坐環繞小鎮既小火車去鎮中心tea一tea, 原本諗住淨係飲嘢, 四條為食友又忍唔住食左大大個pizza.



食完嘢返去浸溫泉, 浸完熱水再跳落涷水池過冷河, 好舒服好過癮.

夜晚冇嘢好做, 晚餐又係毫無驚喜既豬扒薯仔, 見到都唔想食, 好在有pizza打底, 草草食左半塊柴皮豬扒返歸瞓覺.

東歐行 (五)

一早過關去匈牙利, 第一架車關係, 非常順利, 比預期快到.

先去睇匈牙利原居民Magyars既馬術表演, 入場前每人派一杯仔烈酒加舊麵包仔, 杯酒勁度十足, 飲火酒一樣, 成團人係咁易啜兩啖仔就放低, 係得阿某傻佬一隊而盡, 跟住high左亂影相.

表演都ok啦, d馬幾壯, 有一兩個哥哥仔都算靚仔, 不過陣馬屎除都幾勁.





跟住食飯, 又係冇咩特別既一餐, 先黎雜菜雞湯, 隻雞冇去皮, 好油, 主菜煎豬扒加薯仔(又薯仔), 甜品係甜死人蛋糕, 食唔到.

食完飯入Budapest市內, 步行街冇嘢好買, 去左路邊shop仔飲杯咖啡, 食個雪糕, 坐左個幾鐘, 好hea, 好舒服.

最後節目係去左好靚既Saint Stephen's Basilica.





夜晚食左傳統食品Goulash(牛肉洋蔥燈籠椒湯, 但因有團友唔食牛關係, 今次用左豬肉)同烤鴨, 仲有民族歌舞. 表演者幾識攪氣氛, 見有香港人在場竟用唔咸唔淡國語唱左首"梅花", 好歌喉之餘仲好好笑.







臨走時居然有意想不到既事發生!

有個波蘭團當晚都在同一間餐廳食飯, 食完齊齊散水各自在門前等車時, 有一個幾高大靚仔既波蘭男仔(約24,5歲左右)走過黎我地一行四人面前, 禮貌地要求同我地其中一人影張合照.

果個人係某君...

佢大讚某君好靚仔喎...

冇嘢講囉...

條友受寵若驚只識不停傻笑, 不過難得有人咁識貨, 最後都冷靜地完成任務, 交足戲笑得不知幾燦爛.

我同老豆老媽原本好想影低呢個歷史性既一刻, 可惜掛住笑唔記得左.

唔知俾同性當住咁多人大讚, 心情會係點? 過後我關懷地問某君, "點呀? 佢有冇摸你呀?", 佢唔睬我, 我諗冇啩, 哈哈.

東歐行 (四)

又係睇古堡.

今次睇既係位於西邊城市Hunedoara既Hunyad Castle(又稱Corvin's Castle). 城堡建於14世紀, 曾係中世紀軍事要塞, 集哥德式, 文藝復興式以及巴洛克式建築風格於一身.





據聞呢間古堡好猛鬼, 07年英國靈異節目"Most Haunted Live!"曾經就呢度出現既頻繁靈異現象而進行過一連三晚既調查, 不過我咩都見唔到, 可能精神狀態唔錯啩?

晏晝果餐食過乜唔多記得, 反正日日都係唔知咩肉加薯仔. 但對個重量級甜品就記憶猶新, 個名問過當地導遊, 不過已忘記, 佢口感似donut, 上面一舊圓咕碌donut, 下面大圈圈donut中間有strawberry jam, 外面再有大量cream同朱古力醬. 睇個樣似係好甜好肥漏, 但卻出奇地唔太甜, 幾正.



不過太飽食唔晒...



食完上車再向西行, 去邊境城市Arad, 第二日就要過匈牙利了.