頭文字F

我諗F字頭既人同物都唔係好利我.

首先, F牌子既notebook用到我心情煩燥, 精神幾近崩澮. 大國手都終於屈服於F既反覆病情之下 (當然仲有我日哦夜哦), 換左部C字頭既俾我. F已被洗腦, 打入冷宮等待另行發落. 聽大國手講, F基本上已腦幹死亡, 或會考慮保留某d器官作將來移植之用, 如果佢仲有嘢係用得著的話.

講完物件, 講一件極品人物, 又係F字頭.

我原本對呢位F小姐期望極高, 講學歷講資歷佢分分鐘好過我, 我仲以為從此可以脫苦海. 點知, 希望越大果然係失望越大..... 首先, 全球屏息靜氣不敢鬆懈既12月deadline殺到, 我手下最頑劣難馴之輩都唔敢作反, 乖乖地自動自覺加班做好d嘢. 外貌忠忠直直聽教聽話既F小姐, 居然喺deadline日早上失蹤! 好在佢仲識開著個手提, 我揾到佢之後個答案係: "今日廠慶嘛, 我跟大隊去爬山!" 咩話?!! 咁你埋數點呀??? F理直氣壯: "過兩日俾你啦, 國內一般都有兩日走盞既." 跟住收線!

去到爆粗邊緣既我再打去order佢立即飛的返公司同我開工. 唔發惡佢都唔知死, 發惡鬧到佢狗血淋頭佢先死死地氣返公司, 但仲要申辯一句: "咁全公司都去晒啦我一個坐喺度做呀?" 我話係呀, 咁你而家係咪唔做丫? 佢先收聲.

好喇, 阿大小姐足足用左兩個鐘頭返公司, 仲要食埋飯先施施然返去. 又再兩個鐘頭後, 咦? 有嘢交啦喎, 個email唔開猶自可, 一開把幾火. 前後十六行, 每行一粒數, 係咁多. 你當我神仙呀? 真係睇下粒數就知發生乜事?! 我再聲嘶力竭叫佢大小姐俾多少少details黎, 佢大小姐話: "本賬簿咁多頁紙, 咁多嘢, 我點整俾你呀?" 就快殺人既我: "咁你係咪唔做丫? 我做埋你果份好冇?!" 點知真係俾佢吹到啤一聲, 佢話: "好丫, 咁我係咪可以收工啦?"

結果我又係要鬧鬧鬧鬧鬧, 差d高呼F字頭粗口, 佢先應承俾個"detailed report"我. 好, 我等你. 等到七點幾, 唔對路, 點解冇晒聲氣既? 打去一問, 大小姐話: "我去食飯呀, 食完飯返屋企架啦." 返~屋~企??!!! 我: "你乜都未做完喎!!!!" 佢 (氣定神閒): "夜d冇巴士啦, 我走先啦." 最後淨低我一條傻婆戇居居幫佢大小姐收拾殘局.

呢件人間極品我真係哽唔落, 恕我高攀唔起, 唯有請佢大小姐另謀高就, 好行夾唔送!