仲有一個小學時成日發既夢, 係夢見自己在不停落樓梯. 地點所在係以前同爺爺嫲嫲住果棟大廈, 同埋係少有地在夢中我係第一身既角色 (通常我d夢都係好似睇戲咁, 我係第三身).
夢中我不停咁落落落, 但唔係一級一級咁行, 有時"檻"兩級, 有時"檻"三級, 落到一仆一碌, 前面約四五級位置有一個男人都喺度落緊樓梯, 但係無論我落得幾急幾快, 快到差d碌落去都好, 佢個背影永遠離我有四五級樓梯距離, 我點都追唔到佢. 夢入面既我有時係一個人, 有時係我老豆拖住我. 通常落到氣來氣喘, 心跳加速, 跟住就會突然驚醒.
另外由細到大都會經常夢見去d從未去過既地方. 由初中開始, 我久唔久就夢見自己揸住開蓬車, 好鬼瀟灑地喺一條大直路飛馳 (最初呢個夢出現時我都未夠年齡考車牌), 同行仲有兩鬼佬一鬼妹, 夢中既我正一路開車一路同佢地用唔知咩語言傾計, 然後面前突然出現一個roundabout, 有車正在轉過黎, 開得太快既我眼見就快撞埋去, 同行幾個人嚇到V哇鬼叫, 跟住我就醒左.
唔知點解我會知, 但我清楚知道, 喺夢入面我身處既地方係盧森堡. 點解會發夢去左呢個完全唔熟悉既地方, 仲要唔止一次? 真係唔知. 後來好偶然地發現, 我既生日就係盧森堡國慶日, 都算係一個幾過癮既巧合.
No comments:
Post a Comment