2007

2007年第一個工作天, 如常無心工作...

有朋友仔好神心咁喺記事簿寫低2007 wish list, 我就冇咁好興致, 新年又好舊年又好, 我都係有日過日, 渾渾噩噩, 煮到黎就食.

不過我都唔係全冇要求, 今日返工掉左個舊月曆, 先重新發現舊年貼喺牆上既四個揮春仔: "靚足一世", "老公聽話", "食極唔肥", 同"不勞而獲". 當堂個腦"叮"一聲, 係喎, 四樣都係我最想要既.

原來我係有咁崇高既理想, 等我今日就許下宏願為實現理想努力奮鬥.

從今開始我每星期都會買六合彩, 為"不勞而獲"而戰!

其他果d諗到點做先再算. 第一步, 去check下生肖運程先...