父親節是但食

兩星期前, 打俾兩位超煩人士.

我: 父親節早一晚食飯好唔好?
老豆: 是但啦!
我: 咁你想食咩?
老豆: 是但啦!
我: 諗吓啦要book枱架.
老豆: 是但啦!

頂, 好似同個錄音機講嘢咁

我: 唔是但得唔得呀?
老豆: 問吓你老母啦, 至麻煩係佢! (其實佢兩位麻煩程度相仿, 各有千秋)

聽到老豆大叫: 喂人地老母! 你個女搵你!
又隱約聽到老媽EE哦哦: 又咩呀, 咁煩架佢...

吹漲.

我老母(權威地): 你是但book啦! 我地咩都食! (你講嘢呀?)
我(吹得更漲): 是但即係點呀大佬! 俾少少tip屎丫!
我老母(權威地): 嗱, 你book定幾間, 到時我地睇心情再諗去邊!

嘩, 真巴閉, 不愧係我老母.

於是乎聽話又細心既我book左日泰意法德菜各一間, 務求佢兩位多d選擇, 否則又會怪我辦事不力.

最後泰菜跑出.

飲飽食醉, 臨歸家時老媽話: 不如聽日正日都一齊食餐飯啦, 你老公唔得閒咪飛起佢囉.
我: 都得, 咁食咩?
老豆老母: 是但啦!

妖.