下一站, 天后

喺而家呢度唔覺唔覺住左年幾, 又心思思想換吓環境.

上星期放工貪得意去睇左間, 麻麻地, 不過反正有的是時間, 慢慢搵.

尋日見冇嘢做, 去睇樓. 求其經過地產就入去問問, 喺同區又睇左兩間, 一間黑到可以拍恐怖片, 另一間, 幾好但對正大馬路, 好嘈.

行吓行吓行左去天后果邊, 原本想下午茶, 無意中瞄到間蚊型地產有個盤係我阿叔以前住果棟大廈, 果度都ok架喎, 又貪得意入去問問.

個姐姐話果間租左, 想走人時佢話另有幾個盤都符合我地"畢直", 見咁得閒咪睇囉.

結果我地睇左八個單位.

#1: 有驚喜喎

#2-5: 普普通通, 唔差亦唔可以話好

#6: 窗臺大到可以做食飯枱

#7: 通往大廈lobby條路又黑又濕又陰森, 單位頗殘

#8: 一梯兩伙原本唔錯, 對面位鄰居卻貼左一d奇奇怪怪既小朋友畫作喺大門同旁邊既防煙門上, 越望越感覺詭異. 入到屋入面, 間格唔錯夠光猛, 好闊落景觀亦開揚, 但喺屋入面硬係有種滄涼感, 唔多舒服, 故望左一陣就走. 等lift時八卦睇吓d小朋友畫, 俾我裝到對面門上有度符, 寫住咩咩"急急如律令,敕"果隻.... 呢度你租埋我果份.

睇多次第一間, 真係唔錯喎, 新裝修, 園景加海景, 冇壞感應.

於是乎我地就租左呢度.

記得上次搵樓行到跛都係得個桔, 估唔到今次一日就攪掂.

睇黎我搵樓同搵工一樣, 都係要求求其其亂咁黎.