眾人皆瞓我獨醒

又係咁啦, 日光日白時烏吓烏吓喊露一個接一個, 到左呢個人人會周公既鐘數, 我又變得精神奕奕.

係咪應該搵份返夜晚既工呢? 例如...hmmmm.....諗唔到.

有咩工係可以返夜晚又唔洗點用腦架?

今日其實身心疲累. 零晨差不多五點先有睡意既我, 十點又起身, 遠征大圍.

可能有人會話, "車, 都唔係好遠啫!"

你試吓瞓五粒鐘, 趕唔切食早餐就巴士轉火車, 再行一段冇瓦遮頭曬到死既路, 然後先發現係白行一趟而一d都唔覺攰/洩氣/失落既話, 我親手寫個服字俾你.

好彩仲有兩個傻人陪住一齊戆居.

下週再度遠征, 希望順順利利.

如果再出亂子(touch wood), 相信我都係同高人無緣, 我會放棄呢個任務.

諗到長期失眠既我夜晚可以打咩工.

有d損友肯定諗緊衰嘢.

我諗到做看更咋.