天生一對

今日見識到咩叫真正既天生一對.

話說我朝早有事過海, 下晝搭隧巴返過黎, 坐兩個兩個面對面既位, 對面係一對約三十既情侶.

原本冇咩特別.

由入紅隧起開始大塞車, 塞左差唔多一粒鐘先到銅鑼灣, 去到銅鑼灣仲塞.

車上乘客鼓譟不已, 同時又好無聊.

對面位女子, 首先無聊地採礦起黎, 採得唔少"礦石"後, 佢喺手袋摷左張紙巾出黎求其揩兩下, 跟住隨手掉張紙巾落地, 手指則仍然依依不捨地在鼻孔挖呀挖...

而佢位honey, 亦都伸左隻手指入耳內撩下撩下, 狀甚陶醉. 撩完伸手出走廊, 瀟洒地彈走耳垢.

兩位各自採礦完畢後, 仲要湊過頭來, 咀啖先, 男方用剛才採耳礦既手輕撫女方既面, 幾溫馨.

順帶一提, 我一點喺鑽石山上車, 去到炮台山時時間為三點半......