又有心理測驗玩

網上遊來遊去時搵到既, 一次測工作財運愛情.

想像在腦海中有一幅圖畫，有一個英挺、身穿戰甲的戰士正騎著馬，在一望無際的原野中急速向前奔騰。請問如果要你在這幅畫加個東西，你會最想加上什麽物品呢？

1)一支銳利的長矛

2)一個保護頭部的頭盔

3)一套完備的弓箭

4)遠方有一片部落

5)前方有一個太陽

答案聽日post.

MSN塔羅

見sasa玩塔羅牌玩得咁過癮, 我又黎八一八.

我玩既係: 情人眼中你是醜女人還是懶女人

結果: 錢幣三 懂得生活與享受人生的知性型女人

你選擇這張牌，暗示你的個性中有種自然、休閒與喜歡接近大自然的舒服體驗，因此平常在生活中，你可能會在完成一天忙碌的工作之餘，騎著腳踏車或是帶著心愛的寵物一起到公園、河堤邊散步，來犒賞自己在工作中所獲得的成就與收穫。這種直接讓身體回歸到葉綠素與芬多精的體驗，不但可以幫助你調節呼吸，還可以讓你的身體變得健康又有活力，所以你在情人眼中是個「懂得生活與享受人生的知性型女人」。

"懂得生活與享受人生的知性型女人", 即係懶女人啦可?

都幾準喎.

夢

太平洋四大經典人物 --- 薯王, 叮噹, 羊大人, 十樓既牛牛聚首一堂, 打台灣牌; 而tata則在旁指導.

昔日太平洋既同僚想唔想像得到上述畫面?

以上係我昨晚既夢境.

唔知個夢有咩含意?

天真不再

慘被傳媒荼毒思想, 呢排睇"藝術相"睇到好膩好滯, 滿腦子人體器官大特寫, 連發夢都夢見 (不過我夢見既係被肢解既人體及內臟, 香豔欠奉, 可惜可惜).

有咩辦法可以回復返當年果個又天真又傻既我?

唔知好嬲定好笑

星期日下午, Starbucks內, 飲住一杯講左好多次走cream但仍然好鬼多cream既mocha, 腦部在無人駕駛狀態中.

突然電話響.

我(呆): 喂?
女子: 唔該房小姐?
我(呆): 房小姐?
女子: er...咁...馮太丫?
我(呆): ...馮太?
女子: er...我係XXX既, 你訂左張枱聽晚食飯...
我(呆): 我訂左枱?

對方可能以為打左去腦閉塞協會, 收線.

望住電話呆左幾秒鐘, 突然靈光一閃, 係喎, 我撻我媽朵幫人book左張枱架喎, 不過我媽又幾時做左馮太?

隔一陣電話又響.

我: 喂?
女子: er....馮太?
我: 我係洪小姐, 張枱係用我朋友個名book架喎, 我之前留左佢電話俾你地啦.
女子: 我知, 但係阿房小姐(又房小姐)應該冇開電話喎, 我要搵佢confirm booking喎.
我: 咁我代佢confirm得唔得?
女子: er...最好佢本人confirm啦. (真有原則, 頂佢唔順)
我: 咁你打俾我做咩?
女子: 哦, 想阿馮太(佢死都要話我係馮太)你幫手搵阿房小姐, 叫佢call返我地. (嘩你吩咐我做嘢呀?)
我: 但係你話佢冇開電話, 咁我都搵佢唔到架.
女子: er...
我: 一係你晏d再打俾佢啦.
女子: 哦...咁好啦... (依依不捨地收線)

之後果位盡忠職守做事又有原則既女子, 再打多左三次俾我. 而每一次, 我既身份都係馮太, 訂枱果個, 始終都係房小姐.

年, 又過年, 悶到呵欠連連...

年年過年都係悶到嘔, 今年亦唔例外.

初一照常去阿嫲度等開飯, 照常一點蒲頭, 兩點幾先有飯食.

初二去阿媽度, 老豆瞓晏覺, 阿媽煲碟, 我坐埋一邊狂打咸露.

今日初三, 喺屋企吽到三點幾都未諗到有咩好做.

聽日仲要吽多日...

嘩精彩

百多年前, 愛迪生發明左偉大既美國專利第223898號--- 電燈膽也, 造福世人.

百多年後, 另一個愛迪生有毅力地影左大量精彩照片, 仲大方地讓照片流出, 為終日營營役役, 生活枯燥無味既港人提供不少驚喜及娛樂, 亦係功德無量.

當然功不可沒既仲有果位"奇拿", 無私分享之餘, 其上載手法更係峰迴路轉, 引人入勝, 呢頭話拉到人, 果頭又有嘢睇, 令警方如墜五里迷霧, 哭笑不得, 吹佢唔漲; 更被廣大網民市民笑到面黃, 媽到反轉.

估唔到鼠年依始, 就有咁精彩絕倫既嘢睇.

雖然好同情幾位女子既遭遇... 但係, 我係有好奇心既普通人一個, 所以我會繼續追落去, 學高登班朋友仔話齍, 食住花生等睇戲.

八下趁下熱鬧, 唔會拉架可?

天生一對

今日見識到咩叫真正既天生一對.

話說我朝早有事過海, 下晝搭隧巴返過黎, 坐兩個兩個面對面既位, 對面係一對約三十既情侶.

原本冇咩特別.

由入紅隧起開始大塞車, 塞左差唔多一粒鐘先到銅鑼灣, 去到銅鑼灣仲塞.

車上乘客鼓譟不已, 同時又好無聊.

對面位女子, 首先無聊地採礦起黎, 採得唔少"礦石"後, 佢喺手袋摷左張紙巾出黎求其揩兩下, 跟住隨手掉張紙巾落地, 手指則仍然依依不捨地在鼻孔挖呀挖...

而佢位honey, 亦都伸左隻手指入耳內撩下撩下, 狀甚陶醉. 撩完伸手出走廊, 瀟洒地彈走耳垢.

兩位各自採礦完畢後, 仲要湊過頭來, 咀啖先, 男方用剛才採耳礦既手輕撫女方既面, 幾溫馨.

順帶一提, 我一點喺鑽石山上車, 去到炮台山時時間為三點半......

死, 腳痛!

唔知咩事, 左腳腳趾無啦啦抽左兩晚筋, 痛到瞓唔著.

今日腳板底中間開始好似針拮咁痛, 一步一痛.

而家越黎越痛.

聽日唔知會唔會唔行得.

但係要山長水遠去食團年飯...

點算?