多事之夏

天有不測風雲, 人有旦夕禍福; 入夏以黎, 工作上風雲驟變, 禍不單行. 先係由上至下, 人事變動變動再變動, 再加上某d人唔生性, 做嘢何止一波三折, 五折六折都有.

已經壓力大, 仲有一位心急女士日日一到下晝就黎奪命追魂call, 疲勞轟炸快則一粒鐘, 慢則分上中下三集分段折磨, 嘮嘮叨叨重重複複問呢樣問果樣吩咐呢樣吩咐果樣, 懶理太陽伯伯早已收工你餓到胃痛煩到頭痛坐到腰骨痛, 兼要個半鐘頭車程先返到屋企.

一早知道呢位阿姐已練成追魂call最高境界 --- 午夜凶鈴. 以為佢只會對自己友施展呢項絕技, 原來佢對內對外一視同仁, 懶理對方身份及自己尷尬處境, 更加懶理對方感受, 充份發揮"全民皆可丙, 眾生皆可煩, 人人要受我差遣"既無畏無懼(無腦)精神.

繼觀摩字母先生既"駝鳥政策", "A字膊"同"太極推手"達四年之久後, 再一次有幸與高人交手, 見識上乘功夫, 太平洋實臥虎藏龍之地也!