一早出門落大雨, 拎住把遮喺窄窄既行人路上行, 已經好辛苦, 前面仲要有三個賓賓一字排開慢慢行! 成條路都係人又抽唔到佢頭, 我同其他不幸途人被迫跟住佢地雨中"慢"步, 火都黎埋. 終於馬路d車稍為少d, 我地成棚人衝出馬路扒頭, 場面壯觀, 當然仲夾雜住唔少粗言穢語. 三個賓賓依然好少理, 繼續慢駛阻街.
上到巴士, 前面阿婆篤住枴杖論論盡盡上車, 有個坐近門口既女仔彈起身俾阿婆坐. 阿婆企喺通道正中, “俾我坐架? 乜咁好呀阿姐姐? 嘻嘻, 不如都係你坐啦!”, 女仔叫阿婆坐, 阿婆死都唔坐, 企喺度望下望下, 我同後來上車既乘客就被迫棟晒喺阿婆後面罰企. 阿婆伸長條頸望完又望, 跟住同讓坐女仔講, "後面大把位丫, 洗鬼坐你呢度" 跟住仲fing一fing手細細聲講句 "痴線!", 行去後面坐低. 難為好心讓坐俾佢果位, 面都紅晒.
到火車站, 入閘, 前面位阿姐條MP3線居然會纏住入閘機碌棍, 無奈我又手快快Doo左, 唯有企喺度等佢解困, 佢解解下仲要跌埋個袋d嘢倒到一地都係... 幫佢執佢jip jip聲一手搶過唔該都冇句, 大姐, 而家係你阻住我呀!
一早就咁多阻滯, 今日係咪不宜返工?
No comments:
Post a Comment