懷疑撞鬼事件 (四)

仍然係同一地點...

我間房有個窄窄長長既露台, 老媽子種左幾盆花喺度. 平時除左淋花之外, 我好少行出去, 一來樓望樓冇景睇, 二來我住廿幾樓, 個欄杆單單薄薄, 成日好似會跌落街咁.

因為獨自留喺房時經常聽到怪聲, 所以我一般唔會拉埋窗帘, 等間房光線充足d, 夜晚瞓覺都唔會拉, 有d街燈透入黎壯下膽. 我張床就面對住露台, 距離六七步左右.

一晚瞓瞓下, 俾d碰碰聲嘈醒左, 初時以為係其它單位傳黎, 但聽聽下, d聲好近. 再聽下, 聲音係來自露台, 我最初仲諗會唔會係大風吹到d門呢? 坐起身望出去, 見到d花花草草搖都唔搖下, 風平浪靜喎. 但出面確係碰聲不絕, 就好似有人被困露台, 搏命大力敲門想我放佢入黎咁, 仲抵死地敲得鬼咁有節奏感, 五下, 隔一陣, 又五下, 再隔一陣, 又再五下...

我婆婆又唔喺度, 咁我唯有跳落床衝去爸媽房求救. 我老豆半夜三更俾我嘈醒當然面色難睇, 但都走入我間房睇下, 佢入到去又冇晒聲啦喎, 於是乎佢既結論就係 "咁啱有風吹架啫", 跟住叫我快d瞓第日要返學.

仲喺度瞓? 好難啦, 我即時"立"晒枕頭同被去佢果邊打地鋪, 懶理我媽EE哦哦, 有覺好瞓緊要!