人生交叉點

心地唔係幾好既我次次辭工走人都係掩住半邊咀笑住走, 心入面仲要加句, "嘿嘿, 我脫苦海啦, 你地慢慢捱啦!"

發夢都估唔到, 有一日會對一間公司有難捨難離既情況出現.

過年前無心插柳插左個offer返黎, 仲要係大公司, 冇理由唔去馬係咪? 諗住A君頂多都係招牌動作 --- 縮膊頭攤大手板無奈苦笑加句OK, 跟住就放我走. 個scenario經已喺腦中replay又replay, 我連返新工第一日著咩衫都諗埋......點知, 佢既反應令我失晒預算.

講真, 對一向率性而行既我黎講, 呢度既神化作風又確係幾適合我, 同d同事又玩得埋. 都預左新公司未必好似呢度咁free, 但係...大公司喎....前景又好似明朗好多........

點好呢? 價錢同福利兩邊半斤八兩. 人情上好難推而家呢度, 但心入面其實好想出去闖下, 見識下.

一輪交戰之後, 都係揀左留低, 希望唔會後悔.

我做左八婆

近年對命理頗有興趣, 成日心思思想報個風水命理班讀下, 但係一來銀兩唔夠, 二來時間唔啱, 三來又唔可以claim CPD.... 其實歸根究底都係懶....

買左本楊天命運程書, 貪佢夠厚值回票價, 又講得我幾好咁啦 (講得唔好我就唔買). 遲d又去揾阿世外高人傾下計算下流年吉凶六合彩有冇得常中. 迷信令我生活多姿彩.

最近又發掘到個算命網, 都幾多嘢睇 http://sina.sm.aqioo.com/, 算下自己八下其他人, 無聊得黎又好過癮.

可能喺不久既將來, 我會榮升神婆二號.

開工大吉

咁就過左個年, 今年如常過得好無聊.

初一:

如常去阿嫲度呆坐等開飯, 今年醒目先去食個麵打底. 果然一如以往, 我已經點半先蒲頭, 都係要等差唔多一粒鐘.

全日講左無數句恭喜發財, 同屋企人講, 同樓下看更講, 同的士大佬講, 巴士司機又講, "些粉"收銀講, 買杯架啡又講, 茶餐廳阿姐都講, 攪到我神經緊張, 差d對住隻喺街邊無故對住我請請既狗仔都恭喜一番.

初二:

如常去阿嫲度呆坐等食開年飯. 全日過得非常無聊, 不值一提.

初三:

冇交嗌, 繼續頹廢. 無聊到買本豬年運程返去細細研究. 幾經辛苦先捱到夜晚, 悶到頭頂就快吽出菰菰.

丁亥年收/發利是戰果: 打個和咁啦!

情人節

情人節由來有二, 一, 係公元三世紀羅馬帝國時代一個神父 Sanctus Valentinus既死忌, 二, 古羅馬牧神節. 不嬲都唔知呢個鬼佬既死忌同一個N年前既節慶關我乜事, 淨係知呢日係奸商"撳水魚" 既良辰吉日.

第一次收情人節card時讀緊F.4, 不過到今時今日我都唔知張card係邊個送既, 一路都冇人認頭, 變左歷史縣案. 之後咁多年都冇慶祝過.

同極度"浪漫"人士阿某君拍拖, 第一年, 我地兩個懵盛盛行勻成條街都揾唔到位食飯, 結果去左食魚旦粉, 仲白白癡癡話點解今日又唔係假期會咁多人. 第二, 三年都唔記得點過, 有冇約出黎都成問題. 有一年同個同事加完班去食粥, 成間粥鋪得我地兩個客, 走時仲聽到後面個店小二聲大大講左句, "呢兩件豬扒緊係冇人約!"

結婚前一個情人節, 如常加班, 哈, 條友居然捧住一大紮花等我放工. 嚇到我一望再望唔係認錯人先敢行埋去相認, 滿腹疑團, 唔通佢跌親個腦? 點知我未開聲, 佢已經興奮地講, "嘩呢紮抵呀! 我特登等到花鋪臨收檔先去買, 百三蚊咁大紮!" 吹漲... 紮花幾壯觀架, 鬱金香百合玫瑰桔梗乜都有 (好在冇白菊花), 唔知咩名堂? 百三蚊樣樣齊?

尋晚如常草都冇條, 如常去茶餐廳祭五臟廟, 佢地都有情人節餐食, 主菜係唔知乜乜龍脷柳, 某君不停吟吟尋尋, "煎油魚扒呀, 心型油魚扒呀..." 幾驚佢會俾人打.

食完嘢原來條友連銀包都冇帶, 要我俾錢, 確係好鬼死浪漫既情人節.

懷疑撞鬼事件 (九)

當年揾屋搬, 都有一單懷疑個案.

經紀極力推介一個樓盤, 其實去到大廈大堂已經好唔鐘意, 個設計勁騎尼, 要經過一個黑沉沉既up dup商場先入到去.

一上上到頂樓, 一梯六伙, 出lift時已發現右邊一單位門口有個男人對住個門企喺度郁都唔郁, 背對住我地. 經紀開門時我一路望住個男人, 心諗你對住個門稟神呀?

開左門後, 我跟大隊入屋, 冇再留意個怪人. 入屋第一個感覺係, 點解樓底咁矮既? 一直個感覺都係, 天花板離我頭頂好近, 好似一伸手就掂到咁, 但岳高頭望, 又唔係低喎, 應該有10呎喎! 但係我一dup低頭, 果種天花壓頂既感覺又返黎. 個經紀見我一路企喺度頭岳岳, 行埋黎岳埋一份, 問, "上面有咩唔妥呀?" 我傻笑行開, 去窗邊欣賞佢極力推介果個180度無敵海景, 一路行過去個頭一路陰陰痛, 一路有天花壓落黎既感覺.

望住條東區走廊d車fifi聲咁過, 覺得好煩燥, 我話"諗下先"跟住走人. 出去等lift時, 頭先個怪人居然仲企喺同一地點, 跟住聽到後樓梯有聲, 一望, 見個看更阿伯由通往天台既樓梯行落黎, 就係咁樣轉移視線前後唔夠10秒, 再擰返過個怪人果邊, 佢已經唔見左. 我詐詐諦諦行黎行去視察環境, 想揾下有冇個怪人既蹤影, 確實係聽到後樓梯有腳步聲, 不過唔知係咪果個人, 唔通佢"面門"之後行樓梯走左? 有lift唔搭要行樓梯? 廿幾樓喎!

呢次睇樓就喺滿腦問號既情況下結束. 過後問某某, 有冇見到有人企喺度"面門"? 答案係, "冇留意喎!" 超...

懷疑撞鬼事件 (八)

結婚前太懶隋, 遲遲唔去揾屋, 到離真正註冊兩星期先臨急臨忙去搜索. 後來時間實在太緊迫, 求其租左個豆腐潤單位住住先.

我相信個單位都空置左好耐, 入屋一陣味, 光線又唔夠, 但都叫做企理, 衰衰地都有兩間四四正正既房仔, 仲叫做有dd海景. Budget同時間都有限, 唔到我揀咁多.

唔知係咪光線不足既關係, 留喺屋時個人都唔係太舒服, 一個人在家時更係有種講唔出既不安感, 坐又唔係企又唔係, 開左燈感覺好d, 不過日光日白開燈又好似好嘥電.

有一晚, 同某君唔知為咩事吵左一鑊, 我鬥氣唔瞓走左過隔離房上網. 果時已經係零晨時份, 我懶有feel咁一盞燈都唔開, 襯返我既沉鬱心情.

摸黑攪左一陣機, 個心一直有d唔安樂既感覺, 硬係好似有人望住自己咁. 抬起頭東張西望, 房入面冇異樣, 再望出廳, 電視冇自己開到, 梳化食飯枱都冇人坐, 冇嘢喎...

再望過d, 望到廚房果邊.....廚房門口, 雪櫃旁有個人影踎左喺度! 四週圍咁黑, 為免自己嚇自己我碌過d張凳又碌大d對眼望真d, 今次清楚見到係個戴住類似漁夫帽既男人, 踎左喺雪櫃旁. 嚇到我即碌返入房內. 應該唔會有賊戴住咁大頂帽入屋打劫卦?? 就算係打劫, 劫完好走啦, 踎喺度等運到咩??? 咁即係話, 我見到既係....

又再碌過dd再裝出去, 發覺果位人兄已經喺唔知咩時候向前移左大概兩步距離. 嘩, 想點呀??!! 我d符fit喺房喎, 佢真係入黎我點算? 唸主禱文好定唸心經好? 阿媽教果個咩咩光明咒點講架呢?? 胡思亂想之際, 聽到d聲, 微微移去門邊裝下, 原來出面枱面一堆亂掉亂放既雜誌跌晒落地下. 係我地擺得衰所以跌, 定俾"人"整跌?

唔想認低威向某君求救, 又唔敢成日碌出去裝"人"(一陣佢以為我對佢好有興趣點算?), 更唔敢茂茂然行出去, 抱住佢踎多陣就會走既諗法, 故作鎮定繼續上網. 過左一陣, 突然燈光火著, 某君兇神惡煞既聲喺頭頂傳來, "你究竟返唔返去瞓呀?"

嘩, 得救了!! 正常情況下佢咁既語氣同我講嘢我實會頂撞幾句, 但今次見佢及時護駕有功, 放佢一馬, 滾水淥腳捉住佢走返入房.

Touch wood果次係喺果度住唯一一次, 不過都唔會有機會見第二次. 冇幾耐雨季, 間屋牆身滲水嚴重, 我地好快就搬.

後話, 我問過阿媽, 係"六字大明咒"先啱, 唵嘛呢唄咪吽 (庵媽呢啤咩空), 老媽話不幸撞見d唔應該見既嘢可以唸, 有降魔免劫等功效喎.

懷疑撞鬼事件 (七)

一不離二, 去完韓國去廣州, 又俾我喺酒店遇到滋擾.

酒店房又係好一般間隔, 一入門口左邊浴室右邊入牆櫃, 再入一張大床對住梳妝枱, 電視加mini bar. 唯一唔同, 係床邊靠牆位置仲有一個衣櫃, 八卦打開睇過, 冇嘢既.

當晚一樣係食完飯返歸, 洗完白白見時間尚早, 咪一路睇電視一路上網. 到10點左右, 床邊個櫃首先傳出敲門聲. 最初我唔理, 但係佢越敲越響越敲越密, 於是乎我拎轉頭對住個櫃怒啤一眼. 對方稍為收斂, 點知, 佢跟住去左門口位個入牆櫃度敲過. 我口up up左句, "住一晚啫, 洗唔洗咁呀?" 點知跟住對方更兇, 兩個櫃加窗都出現敲擊聲, 玩合奏喎!

頂, 火都黎埋! 你兇時我都唔係稔善, 我唔會去打開櫃門同佢硬碰硬 (其實係唔敢), 不過我銀包入面有阿媽俾我隨身攜帶既一堆唔知咩經咩咒, 我倒晒出黎同佢晒冷, 窗邊擺兩個, 每邊床頭櫃又擺幾個, 身上再帶一個, 門口果邊冇得擺, 不過都應該差唔多. 好喇, 擺完陣, 果然窗同床邊個櫃都冇晒聲, 唯獨是門邊大櫃仍然死唔斷氣敲個不停.

多得敲門果位, 果晚瞓覺成晚醒下瞓下, 仲隱約聽到廁所果邊傳黎踱步既聲. 但係我半夜瞓到人有三急去廁所, 又見唔到嘢. 呢位冇韓國果位咁激, 或者佢不屑出黎見我?

第二朝如常洗面刷牙, 起身後一直聽唔到聲, 仲以為佢朝早唔蒲頭. 點知, 我收返晒d符fit拖個喼離開, 臨關上門之際, 入面傳黎三下急速又大聲既碰碰聲, 唔知係向我示威定同我講bye bye呢?

懷疑撞鬼事件 (六)

又再講近d, 已經入左而家呢間公司做嘢.

有次老細叫我去韓國, 同事話book開間相熟酒店得返韓式房, 即係瞓地既. 住兩晚啫, 是但啦.

酒店房都係一般間隔啦, 一入門口右邊係浴室, 再入就係房, 唯一唔同係應該擺床既位置擺左張梳化椅, 想瞓就要攞張褥鋪地. 第一晚做到八九點先收工, 返到去諗住沖完涼就瞓, 點知行去浴室途中突然兩隻腳抽晒筋, 痛到我跪喺地行唔到. 出trip無數次, 幾疲累都試過, 但就從來冇一次遇過咁既情況. 唔理咁多死命行去浴室, 諗住用熱水淋下會好d, 但係一路沖涼一路痛到我標眼淚. 奇怪既係, 沖完涼行返出去對腳就冇事, 到我行返入去刷牙, 又抽過.

睡魔急call, 唔理得咁多. 草草按摩下對腳就瞓, 我係頭向窗, 腳向房門咁瞓, 即一坐起身就可以見到門口位置. 瞓低時11點半倒, 我唔係一撻落床就瞓得著既人, 喺度碌來碌去, 碌到差唔多12點時, 開始聽到浴室果邊傳黎d類似大力打落瓷磚, dump地, 同大力拍廁所板落黎既聲, d聲似乎係由我間房發出, 但當時勁眼瞓既我懶得起身去睇, 只係假定d聲係由隔離傳過黎, 冇幾耐就瞓左. 不過半夜曾經俾幾下較大聲響嘈醒過.

第二朝瞓醒, 冇穿冇爛, 只係行去浴室梳洗時又有輕微腳抽筋, 我見仲行得就費事理, 唔通話抽筋唔返工?

一日好快就過, 夜晚飲飽食醉返酒店. 去洗白白時, 妖, 又抽筋, 咩事呀?! 心中不停@#$%^*既我快快手手沖涼洗頭, 其間除左對死人腳不停抽下抽下痛之外, 並無異樣. 頂佢丫, 又係行返出去就唔抽!

呢晚又係11點幾撻落地瞓, 瞓瞓下又聽到浴室方向傳黎噪音, 極度懶惰既我瞓低左唔願起身, 於是佢有佢嘈, 我有我瞓. 瞓左唔知幾耐, 噪音依舊, 突然覺得好熱就踢開張被, 就喺我一腳將張被踢走之際, 房門景像映入眼前, 有個半低頭, 中長頭髮, 著白衫黑裙既女仔喺門口位置, 面對住我斜斜地企. 與其話我大膽, 不如話我遲鈍, 瞓到懵左既我一時間意識唔到自己見到d咩, 仲慢慢伸個懶腰轉個身. 個懶腰伸到一半, 剛才影像終於喺我個腦register, 我彈起身望下個門, 佢已經走左.....跟住我先發覺頭先好嘈既浴室已經唔嘈. 咁...佢連俾我望多一眼都唔願, 我仲可以點? 唯有繼續瞓囉.

果晚半夜我仲去過一次廁所, 呢次行過去對腳唔抽筋, 入去都見唔到有咩不速之客.

我覺得似係佢俾我嚇走多d囉.

懷疑撞鬼事件 (五)

F.1果年, 我地搬左去另一屋苑.

聽老一輩講, 呢個屋苑所在以前日治時期曾經係亂葬崗, 後來經高人指點, 果個位做左電燈公司宿舍, 好借用電燈既"光"去化解陰氣. 再之後, 八十年代頭左右, 宿舍又被改為私人住宅.

我搬入去後一直feel唔到有異樣, 多年後, 我已經由學生妹變成打工仔, 一晚瞓到半夜無端端醒左, 床邊鬧鐘顯示為4:30am. 初醒來時頭腦唔係好清醒, 感覺唔到唔妥, 隔左一陣先發現, 打側身瞓既我完全唔郁得, 背脊feel到有風吹緊, d頭髮都俾風吹起, 但係我背脊對住牆, 窗又冇開, 冷氣出風位都唔喺呢邊, 風從何來?

好肯定當時我係清醒既, 因為我視線正好對住鬧鐘, 睇住時間一分鐘一分鐘咁過去...

背後既風越吹越猛烈, 跟住我開始聽到聲, 就好似喺一間好多人既酒樓入面聽到既嘈雜人聲, 間中夾雜住一兩聲叫喊, 又有d似有遊行隊伍經過咁樣. 講唔出d聲喺邊度傳黎, 好似好近, 但又完全聽唔到班人既談話內容, 淨係知佢地名符其實係"好鬼嘈".

過左成十分鐘, d聲都唔停, 我開始煩燥, 喺心中講左句, "妖, 嘈完未呀? 聽日要返工架!" 哈, 班"人"好似聽到我心聲咁, 即時靜晒, 背脊既風都停埋, 我亦郁得返.

第二日同阿媽講我俾"人"騷擾, 佢話近七月十四, 可能真係有"人"過路咁啱俾我枝天線接收左, 可以不理!

懷疑撞鬼事件 (四)

仍然係同一地點...

我間房有個窄窄長長既露台, 老媽子種左幾盆花喺度. 平時除左淋花之外, 我好少行出去, 一來樓望樓冇景睇, 二來我住廿幾樓, 個欄杆單單薄薄, 成日好似會跌落街咁.

因為獨自留喺房時經常聽到怪聲, 所以我一般唔會拉埋窗帘, 等間房光線充足d, 夜晚瞓覺都唔會拉, 有d街燈透入黎壯下膽. 我張床就面對住露台, 距離六七步左右.

一晚瞓瞓下, 俾d碰碰聲嘈醒左, 初時以為係其它單位傳黎, 但聽聽下, d聲好近. 再聽下, 聲音係來自露台, 我最初仲諗會唔會係大風吹到d門呢? 坐起身望出去, 見到d花花草草搖都唔搖下, 風平浪靜喎. 但出面確係碰聲不絕, 就好似有人被困露台, 搏命大力敲門想我放佢入黎咁, 仲抵死地敲得鬼咁有節奏感, 五下, 隔一陣, 又五下, 再隔一陣, 又再五下...

我婆婆又唔喺度, 咁我唯有跳落床衝去爸媽房求救. 我老豆半夜三更俾我嘈醒當然面色難睇, 但都走入我間房睇下, 佢入到去又冇晒聲啦喎, 於是乎佢既結論就係 "咁啱有風吹架啫", 跟住叫我快d瞓第日要返學.

仲喺度瞓? 好難啦, 我即時"立"晒枕頭同被去佢果邊打地鋪, 懶理我媽EE哦哦, 有覺好瞓緊要!

懷疑撞鬼事件 (三)

依然係同一地點...

一晚半夜醒左去廁所, 出黎時見有隻小強喺地上徘徊, 二話不說即除拖鞋, 我打!!.....打唔到, 小強逃去無蹤. 我開左盞燈四圍揾都揾唔到, 唯有放棄返去繼續瞓. 就喺我企返起身熄燈一剎那, 耳邊聽到幾聲好似忍笑咁既聲, 係女聲黎既.

又有一次, 隔離師奶的埋兩個女過黎同我媽吹水, 我地三個細路玩hide & seek, 輪到我匿埋時我走左去廚房後面個雜物房. 講下廚房設計, 分三部份, 第一部份擺雪櫃同碗櫃, 第二部份係煮食爐同洗碗盆, 再轉右入去有個洗衣房, 旁為工人廁所, 廁所對面有個工人房, 我地用黎擺雜物. 工人房唯一一隻窗就係望返出出面走廊, 對住個洗衣房. 我踎左喺角落頭一個大紙箱後面, 心諗邊條傻婆走入黎我就彈起身嚇死佢.

等呀等, 卒之其中一個靚妹闖入, 喺窗邊探頭探腦, 我彈起身, 對住佢大叫一聲, 但係佢居然好似睇我唔到聽我唔到咁, 望左一陣就行返出去. 滿腹疑問既我企喺度發左一陣呆, 聽到出面傳黎佢既聲, "點解揾唔到xxx既?" 跟住我阿婆答左句嘢, 但係我冇留意內容, 因為呢個時候我隻耳feel到有陣風吹入去, 好似細路仔整蠱人吹人隻耳咁, 然後又係一陣忍笑咁既聲.

跟住我當然係飛奔出廳, 驚魂未定仲要俾阿婆吋, "嗱, 我都話左你地唔去揾佢佢就會死死地氣自己走返出黎架啦!"

懷疑撞鬼事件 (二)

都係同一個地點, 某次老媽子個朋友擺個約五, 六歲既女喺度過一晚, 當晚小妹妹被安排同我同房瞓, 阿媽開張摺床擺喺我張床旁邊.

果晚唔知點解我成晚輾轉反側, 喺張床碌黎碌去, 睇住個鐘一點, 兩點, 三點, 三點半....全無睡意, 點都瞓唔著, 仲有d煩燥同坐立不安既感覺, 坐起身兩頭望, 左邊個妹妹同右手邊我婆婆都在熟睡中. 果時係暑假, 反正第二日唔洗返學, 唔夠瞓都冇所謂. 我拎個電筒出黎照住睇書, 一路睇一路留意d光線唔好整醒兩位熟睡人士.

但係我唔知點解越黎越感到坐立不安, 好難集中精神睇書, 成日東張西望, 突然留意到隔離個妹妹喺度郁黎郁去, 好似掙扎緊咁, 跟住仲突然擘大眼望過黎, 不過好快又合埋眼瞓返. 我俾佢嚇死, 驚佢會真係醒, 拿拿臨熄電筒努力令自己入睡, 唔好再攪攪震, 終於成功有睡意, 臨瞓時睇鐘, 已經五點幾, 個天都微微地藍色, 就快天光.

瞓左幾個鐘又要起身, 唔夠瞓烏下烏下既我戇居居對住電視發呆, 個妹妹仔走黎逗我講嘢. 我有一句冇一句咁答佢, 突然間佢話, "姐姐, 你尋晚瞓瞓下做乜摙我條頸? 好痛呀,痛到我醒左."

我諗起個妹妹半夜突然掙扎, 心諗唔係咁猛呀嘛?...但係我仍然安慰佢(亦係自我安慰)話, "你係咪發夢咋?" 妹妹天真無邪地答, "唔係, 我擘大眼見到你仲醒緊既, 你開左電筒係咪丫? 我見到架!"

我成晚醒住, 好彩我乜都見唔到, 更好彩既係, 個妹妹仔似乎冇向我媽或佢阿媽投訴我摙佢條頸, 唔係我水洗都唔清.

懷疑撞鬼事件 (一)

小三時搬左去堡X街華X大廈住, 單位千五呎, 擺左傢私都仲係空空蕩蕩. 第一次上去時我已經有心緒不寧既感覺, 但年紀細唔識表達.

我張書枱放喺睡房其中一角, 喺房入面做功課時, 總係有d難以形容既感覺, 就好似房入面唔止我一個人, 硬係覺得背後仲有一對或更多既眼睛望住自己, 精神好難集中.

到後尾單獨喺房時不安既感覺越黎越強烈, 除左係有被監視既感覺外, 仲開始聽到空無一人既房入面, 有女人嘆息聲同兩三個人在同時細細聲講嘢既聲. 我好肯定d聲唔係由第二度傳黎, 因為聲音好近, 就好似有人企正喺我後面一樣, 每次我拎轉頭望, 或阿媽行入我間房, 就好似熄電視一樣, 突然間冇晒聲.

果時係同婆婆同房, 婆婆喺香港時還好, 佢返左鄉下既話, 我夜晚瞓覺時就好多時俾d不明來歷既講嘢聲同腳步聲驚醒, 由果時開始唔係唔夠瞓就係失眠, 後尾索性走去我爸媽房瞓, 寧願瞓地都唔瞓自己間房.

我亦都怕左果d不明來歷既滋擾, 唔再喺房做功課, 阿媽勁鬧都要搬出廳做. 點知咁樣一樣"賴嘢"!

一日, 我獨自留喺屋企做功課, 做做下冇心機, 拎住枝筆敲響枱面打拍子唱歌仔. 剛唱完一首歌, 我背後有一把伯爺婆聲大叫"好嘢!!!", 仲有拍掌聲添. d聲好近, 就好似對方企正我背後一樣, 我本能地轉身望一眼, 冇人!