執屋執左四晚通宵, 人都癲.
都話d嘢收收埋埋唔覺, 一執出黎就好多架啦, d人又唔信! 攪到兩日內由斜路頂跑到斜路底, 斜路底又跑返去斜路頂幾十次. 半夜三更仲拖住十幾大袋嘢喺路上掙扎. 好彩咁近, 遠d既話咁搬法我已經痴左線.
搬遲d唔知點算, 我既前度惡鄰由前日開始將行動升級, 喺佢屋內傳出既除左係酸縮味同尿味之外, 仲加左濃烈既...屎味.....我搬嘢落樓一路鎖門一路作嘔. 戥我前業主慘, 佢間屋都幾難租得出, 除非租俾個嚴重鼻塞人士.
尋晚辛苦到撻左喺梳化唔識郁. 諗住身心皆疲, 實瞓得著, 點知都係碌到差唔多天光先瞓. 我個難得既好夢發左一半, 就醒左.
呢度原來唔洗較鬧鐘, 7點正下面公園就響起嘈死人音樂, 一班公公婆婆跟住音樂做早操...
2 comments:
你終於唔洗做山區居民, 又可以同惡鄰sayonara啦, 真係鄧你高興.
我都試過新舊屋差果20分鐘路程. 但係搬野時就覺得似橫越大西洋咁遠, 拉d行李拉極都未到新屋. 拉多兩次就手腳發軟.
依家你連鬧鐘電都可以慳埋, 都唔知係好事定壞事.
希望你新居愉快啦.
我新舊屋只係相差10分鐘路程, 行得快5分鐘都得, 但係拖住幾噸垃圾就...
有機會我踢左某某返老家做嘢請你地黎坐啦.
Post a Comment