逃過一劫

禮拜六, 冇節目, 兩條友無無聊聊週街遊蕩, 反正冇地方好去, 隨意跳上架赤柱小巴.

喺赤柱都係四處遊蕩, 食下雪糕, 撩下人地d狗, 懶係有feel企喺海邊睇下景, 跟住去飲嘢.

Mocha+cheesecake+吹水+扮有文化睇下書之後, 不如返出去行下跟住食飯.

差唔多到巴士站, 都係杯mocha唔好, 人有三急, 結果要走返轉頭解決. 某君EE哦哦, 不過又跟住去, 後來可能佢要照鏡關係, 我係先出黎等果位.

行返去巴士站, 剛好見到架63號巴士上完客絕塵而去.....

跟住二人互相埋怨, 你話我做乜無啦啦要返轉頭去廁所, 我話你做乜去廁所去咁耐. 爭拗良久, 幸好在大打出手前有小巴經過, 上車.

去到環角道轉舂磡角道位置, 首先見到既係一班人坐喺地上, 咦? 拍戲呀? 跟住一架撞到"食"晒入牆既巴士同地上超長呔痕映入眼瞼. 再望返地上一群人, 原來係可憐既受傷乘客正在接受包紮.

如果我地唔係去廁所既話, 好大可能會上到果架63號...........

樂樂﹑盈盈

兩隻國寶被前呼後擁送黎香港, 大名終於揭盅 ---- 樂樂 & 盈盈.

同意某d討論區所言, 兩個名確係幾"行". 話唔好, 又唔係, 起碼叫好意頭又易讀; 話好, 都唔覺, 普通過普通, 總之就係解開心啦, 係咁多, 深度欠奉. 反觀臥龍方面幫自己旗下熊貓改既思雪, 依寶, 萌萌等, 似乎更有意思更有心思.

廣東話係好衰既, 香港人把口更衰, 兩個名一出左, 即時有人潑冷水. "樂"不幸地同"落"同音, 令人不期然諗起"股市滑落"(!!!). "盈盈"又不幸地同"營營役役"既"營營"同音. 唔提猶自可, 一提就好覺, 啋!

個人意見, 都係某君隨口up既"旺丁""旺財"好d.

當年今日

今日係ANZAC (Australian & New Zealand Army Corps)Day, 記念一次大戰戰死沙場既澳紐軍人.

當年今日亦係我入D記捱騾仔既第一日, 眨下眼就7年!

雖然初返工冇咩特別嘢做, 但係對我黎講都已經係一項大挑戰. 之前份工返9:30, 我慣左9:40左右先到, 然後hea下吹下水做少少嘢5:30準時走人, 頂多做到6:00. 著衫又冇限制, 鐘意既著牛仔褲波鞋都冇人出聲. 入左D記, 一下子變到返8:30唔準遲到套裝絲襪仲要化個淡妝.

記得當日懵下懵下七點就起身妝扮一番, 再懵下懵下出門口. 一直到食晏之前我都係在三魂唔見七魄狀態中, 食完飯後魂魄先歸位. 相信新同事們一定覺得呢件巫婆look女人好樣衰.

之後既日子都唔好講啦, 過左兩個禮拜training既蜜月期後, 每晚返到屋企仲睇得到晚間新聞已經算幾早. 更多時係返到去已經差唔多天光, 沖個涼換件衫又要返工, 只可以喺車上小睡.

好慶幸我喺仲捱得下既日子入去捱, 今時今日叫我返去是但一間"逼科", 我可能會變成第二個趙承熙.

4.25, 對我黎講係一個幾值得記念既日子.

我決定今日唔做嘢好好懷緬一番.

Kill Time

上網見到既, 辦公室最佳kill time活動如下:

炒股 / MSN / Email / 食早餐 / 睇報紙 / Freelance /做功課 /傾電話 /sms /同同事吹水 / 痾屎 / 發白日夢 / 釣魚 / 修甲&搽指甲油 /沖奶茶 or 咖啡 / 寫日記/blog / 聽收音機/mp3

除左 freelance, 做功課同搽指甲油未做過外, 我都可以話係壞事做盡...

請人

請人同見工一樣, 大開眼界, 呢個世界真係乜人都有.

當年請人, 其中一個女仔好適合, 約左第一個見, 原本佢一口應承, 後尾話都係唔黎, 原因係佢阿媽話佢一個女仔去到咁遠返工驚佢危險喎. 睇返佢地址, 應該半個鐘左右就到公司啦, 仲有佢都唔細架啦, 咁受保護既?

有個男仔個CV寫得幾好, 一見之下嚇死我, 條友講嘢全無表情個口唔郁, 全程兩眼發直望住我, 由喉矓"定"發音, 好似喃嘸佬唸經一樣, 我只聽得到大約六成. 最後草草見完就叮佢走.

又有一個, 個樣醒醒目目講嘢有紋有路, 但係一問到點解離開舊公司就花左差唔多一個鐘同我數落佢舊公司d policies幾咁唔掂, d同事幾咁唔係做嘢, 上司幾咁無能等等; 非常激憤. 我知佢可能真係做到一肚氣, 但係洗唔洗數到咁盡呀? 間間公司都會有問題, 我怕我公司d問題大過佢舊公司添, 到時佢容乜易又喺另一次interview度數臭我地?

仲有一個, 叫佢黎見工時問題多多, 問公司做咩, 有幾多間分公司, 全球有幾多員工, 人工幾多, 每年加幾多, 員工福利, 公司架構, 部門架構, 男上司定女上司, dress code, 有冇shuttle bus等等等等. 佢一論咀up左十幾廿樣, 我叫佢自己上我公司網頁睇飽佢, 覺得滿意先再算啦. 之後就冇左下文.

還有一個, 喺電話同我講英文, 扮晒竹星妹, 但係講黎講去都係"well, um...", "yeah", "you know". 佢猛話佢好忙好忙, 我話你咁忙唔阻你囉, 佢又即刻話會黎 (咁你講咁多嘢做咩?). 佢最後冇蒲頭, 過左約定時間好多個鐘頭後打俾我, 問我可唔可以約晏d見, 但係又講極講唔到晏到幾點, 我叫佢forget it囉 (我都識英文架!).

見工

而家成日in人, 令我諗起自己in既第一份工, 記憶猶新.

果次唔知係個老板有心刁難定咩, 全程窒頭窒勢, 非常乞人憎.

佢第一句就問我, "你喺澳洲有冇讀中文呀?" 我話冇. 佢就教訓左我大半個鐘而家香港市場點樣北望神州, 點樣中國大陸有無限商機無限潛力, 都唔明我地呢d "蕃書妹"點解要拼棄大中華文化, 去到外國就忘本, 中文字都唔識多個 etc etc etc.....

聽到我將近瞓著時, 佢失驚無神飛張紙去我面前, 極其晦氣咁話, "嗱唔好嘥大家時間, 你寫封中文信黎睇下, 我滿意先繼續傾, 我唔滿意就bye bye啦", 仲即時俾左個題目我. 哦, 寫囉.

半粒鐘後佢返入黎, 睇完我封信, 又話, "唔係啦, 你都係寫埋個英文版出黎俾我睇下, 都唔知你地呢d留學生係咪淨係識蒲唐人街既!" 哦, 又寫囉.

再半個鐘後佢又返入黎, 睇完我封信後不置可否. 跟住又揾到第二d嘢黎批評. 佢話佢最憎就係d人send個CV出黎都唔睇多次自己有冇嘢打錯, 錯漏百出照send出去揾工. 佢又發表左大半個鐘之後, 飛左我個CV去我面前, 叫我睇下有邊度寫錯嘢.

我睇過晒, 冇錯喎. 點知佢隊隻手指黎猛篤一個字, Sturt, 好寸咁話, "你知唔知Stuart點串?" 我話我知, 但係呢個真係Sturt, 唔係Stuart喎, 唔信你睇下我張cert? 佢睇下之後, 仲要講句, "車, 都未聽過呢個名, 你間U出名極有限啦" 我心諗, "咁你孤陋寡聞啫!", 當然表面上仍然係恭恭敬敬笑咪咪.

佢又up左一大輪嘢 (我冇認真聽), 跟住無神神彈句問題出黎, "如果個inventory understate左 5K, 即係對profit有咩影響呀?" 一直在發白日夢既我, 當堂呆左. 佢冇理我又再up左成粒鐘工作經驗係好重要, 請人有時唔一定睇學歷, 應該經驗行先 etc etc etc etc.....

由九點上到佢office, 聽個阿叔發表偉論到點幾鐘, 佢終於放我走. 期間我除左寫左兩封信外, 全程講唔夠五句嘢.

兩日後佢話請我!

迷茫

越黎越唔知有咩可以寫.

點解人地可以成日都咁多嘢寫? 就算冇咩特別嘢發生都可以咁多感想?

不如你地日日出個topic俾我寫? 好似小學上作文堂咁?

Holiday report

五日假話咁快就放完, 做左d咩?

星期四: 瞓到日上三竿, 下午茶後閒逛, 條街好多人. 九點未夠就返歸, 想扮勤力做下嘢, 上網窒下窒下, 真係唔生性. 萬分期待既new directives冇影, 好失望.

星期五: 拜山. 某君話唔去又去, 去又扭計, 好煩.

星期六: 屎忽痕入南丫島. 屎忽痕行上山上風力發電站. 沿途不斷埋怨, 點解咁多斜路既? 點解仲未到既? 點解咁多蚊既? 點解咁熱既? 是夜晚膳於"南島書蟲", 食健康有機素食, 唔錯.

星期日: 成功上網, deleted junk mails達三百多個. 期待中既new directives依舊未出現. 正所謂 "猛做不知時日過", 抬頭望鐘時已經零晨五點 (不過我差唔多十二點先開波...).

星期一: 罕有地十點就醒, 努力令自己再次入睡, 不果. 起身行行企企一輪, 開工. 居然全日冇踏出屋門一步, 晏晝只係食一碗仔麥皮充飢, 夜晚食左五大啖Dreyers rocky road, 係咁多. 厲害厲害!

星期二零晨: 冚被又熱, 唔冚被又凍. 成晚不停將張被拉上拉落輾轉難眠. 到真係瞓得著又不斷發怪夢. 夢中既我居然楂槍去打獵, 又夢中有夢, 夢見已故親戚(現實中仍健在, 大吉利是!!) 報夢叫我燒張credit card俾佢....

好唔好打去問下我親戚係咪爭落好多card數?